AKP កំពង់ធំ ថ្ងៃទី១ ខែសីហា ឆ្នាំ២០២៦ -- លោកស្រីឡេង សុឃីមនាយិការងសាខាកាកបាទក្រហមកម្ពុជាខេត្តកំពង់ធំបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នចំពោះជំងឺគ្រុនឈាមក្នុងឱកាសអញ្ជើញសម្របសម្រួលយុទ្ធនាការផ្សព្វផ្សាយអំពីវិធានការការពារជំងឺគ្រុនឈាម ដាក់ថ្នាំអាប៊ែតតាមខ្នងផ្ទះនៅភូមិក្រសាំងឃុំត្រពាំងឬស្សីស្រុកកំពង់ស្វាយខេត្តកំពង់ធំកាលពីថ្ងៃទី៣១ខែកក្កដាឆ្នាំ២០២៦ ដោយមានការចូលរួមពីលោក លោកស្រីមន្ត្រីក្រុមប្រតិបត្តិ មន្ត្រីអនុសាខាបុគ្គលិកមណ្ឌលសុខភាព អ្នកស្ម័គ្រចិត្តកាកបាទក្រហមនិងប្រជាពលរដ្ឋសរុបប្រមាណ៦៧នាក់ព្រមទាំងដាក់ថ្នាំអាប៊ែតបានខ្នងផ្ទះចំនួន៤១ ខ្នងផ្ទះ។ គោលបំណងក្នុងការផ្សព្វផ្សាយនេះគឺដើម្បីឱ្យប្រជាពលរដ្ឋដែលរស់នៅក្នុងសហគមន៍ទាំងអស់យល់ដឹងអំពីវិធានការការពារជំងឺគ្រុនឈាមដោយរដូវនេះជារដូវវស្សាភ្លៀងធ្លាក់គ្រប់ទីកន្លែងមានដក់ទឹកអាចបង្កជាជម្រកមូសរស់នៅ ដោយប្រកាន់ភ្ជាប់នូវគោលជំហរស្របតាមពាក្យស្លោក"ខ្ញុំ នឹងគ្រួសារខ្ញុំជាគ្រួសារគំរូ ព្រោះផ្ទះខ្ញុំ និងលំនៅដ្ឋានរបស់ខ្ញុំ គ្មានដង្កូវទឹក" ។

ឆ្លៀតក្នុងឱកាសនោះលោកស្រីឡេង សុឃីមនាយិការងសាខាកាកបាទក្រហមកម្ពុជាខេត្តកំពង់ធំបានពាំនាំនៅប្រសាសន៍ផ្ដាំផ្ញើសាកសួរសុខទុកពីចម្ងាយអំពីសំណាក់ ឯកឧត្តម នួន ផារ័ត្ន ប្រធានគណៈកម្មាធិការកាកបាទក្រហមកម្ពុជាខេត្តកំពង់ធំ ជូនដល់បងប្អូនប្រជាពលរដ្ឋដែលមានវត្តមានទីនេះទាំងអស់។លោកស្រីនាយិការងបានលើកយកប្រធានបទសំខាន់មួយទៀតដើម្បីឱ្យសហគមន៍មានសុខភាពល្អយើងត្រូវដឹងអំពីជំងឺដែលមិនឆ្លង ៤ ប្រភេទធំៗ ដែលកំពុងតែកើតមានឡើងជារៀងរាល់ថ្ងៃមានដូចជា÷ ជំងឺមហារីក ជំងឺទឹកនោមផ្អែមជំងឺលើសឈាមជំងឺផ្លូវដង្ហើមរ៉ាំរ៉ៃ  ដែលវាកើតឡើងតាមរបបអាហារប្រចាំថ្ងៃ ផ្អែម  ប្រៃ និងខ្លាញ់ជាដើម។ស្របតាមទិសស្លោក"ស្រឡាញ់ខ្លួនស្ងួនចំណី"។

ដើម្បីឱ្យសហគមន៍មានភាពធន់និងអាកាសធាតុ សូមចូលរួមរៀនបន្សាំខ្លួននិងចូលរួមកាត់បន្ថយការប្រើប្រាស់ថង់ប្លាស្ទិក ចូលរួមដាំកូនឈើនៅតាមទីសាធារណៈមិនដុត ឬកប់សំបកដបជ័រក្នុងដី។ ក្នុងពេលនោះផងដែរលោកស្រីនាយិការរងក៏បានផ្សព្វផ្សាយបន្ថែមអំពីការចាក់ថ្នាំបង្ការជំងឺមហារីកមាត់ស្បូន ការជួយសង្គ្រោះបឋម  វិធីជួយជនរងគ្រោះស្លាក់ និងការហូរឈាម វិធីការពាររន្ទះព្រមទាំងសុវត្ថិភាពចរាចរណ៍ផ្លូវគោកជាដើម៕

ដោយ៖ ស៊ុម វណ្ណា