AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦ -- លោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងការអភិវឌ្ឍ ក្រសួងព័ត៌មាន ជាតំណាងដ៏ខ្ពង់ខ្ពស់ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន និងជាប្រធានគណៈកម្មាធិការសមាគមអតីតយុទ្ធជន និងនិវត្តជនកម្ពុជាវិស័យព័ត៌មាន (អ.ន.ក វិស័យព័ត៌មាន) នៅថ្ងៃទី៣១ ខែកក្កដា ឆ្នាំ២០២៦នេះ បានអញ្ជើញចុះសួរសុខទុក្ខនិវត្តជន ដែលជាអតីតមន្ត្រីរាជការបម្រើការងារនៅក្រសួងព័ត៌មានចំនួន ២រូប រួមមាន៖
១. លោក គន់ ហួន អតីតមន្ត្រីរាជការបម្រើការងារនៅអគ្គនាយកដ្ឋានវិទ្យុជាតិកម្ពុជា។
២. លោក ប៉ាន សាន់ អតីតមន្ត្រីរាជការបម្រើការងារនៅអគ្គលេខាធិការដ្ឋាន។

ពិធីចុះសួរសុខទុក្ខនេះ ក៏មានការអមដំណើរដោយ លោកជំទាវ ទេស ផល្លីន អគ្គលេខាធិការ និងជាប្រធានលេខាធិការដ្ឋាន អ.ន.ក វិស័យព័ត៌មាន ព្រមទាំងលោកជំទាវ លោក លោកស្រី ជាសមាជិក សមាជិការនៃលេខាធិការដ្ឋាន អ.ន.ក វិស័យព័ត៌មានផងដែរ។

ក្នុងឱកាសជួបសំណេះសំណាល លោកជំទាវ ទុយ សិរីរតនៈ នេត្រភក្ត្រា បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តម នេត្រ ភក្ត្រា ដោយបានគូសបញ្ជាក់ថា ឯកឧត្តមរដ្ឋមន្ត្រី ព្រមទាំងថ្នាក់ដឹកនាំក្រសួងព័ត៌មាន តែងតែនឹករលឹក និងចងចាំនូវគុណបំណាច់របស់និវត្តជនទាំងអស់ ដែលបានខិតខំបំពេញភារកិច្ច និងចូលរួមចំណែកយ៉ាងសំខាន់ក្នុងការអភិវឌ្ឍន៍វិស័យព័ត៌មាន និងសោតទស្សន៍នៅកម្ពុជានាពេលកន្លងមក។

ក្នុងឱកាសនោះដែរ និវត្តជនទាំង ២រូប ក៏ទទួលបាននូវគ្រឿងឧបភោគបរិភោគ និងថវិកា ដែលជាអំណោយដ៏ថ្លៃថ្លារបស់ ឯកឧត្តមរដ្ឋមន្ត្រី នេត្រ ភក្ត្រា និងលោកជំទាវ ដើម្បីជួយសម្រួលដល់ជីវភាពរស់នៅផងដែរ។ជាមួយគ្នានេះដែរ ក្រុមការងារក៏បានជូនដំណឹងអំពីការចុះឈ្មោះជាសមាជិកសមាគមនិវត្តជន ជូនដល់និវត្តជនទាំងពីររូប ដើម្បីផ្សារភ្ជាប់ទំនាក់ទំនងឱ្យបានកាន់តែជិតស្និទ្ធ និងទទួលបានការយកចិត្តទុកដាក់បន្ថែមទៀត។ 
ទន្ទឹមនឹងនេះ តំណាងក្រុមការងារបានឱ្យដឹងថា កន្លងមកមាននិវត្តជនជាអតីតមន្រ្តីរាជការក្រសួងព័ត៌មានមួយចំនួន បានផ្លាស់ប្តូរទីលំនៅ ឬទៅស្នាក់អាស្រ័យជាមួយបងប្អូន និងកូនក្មួយ ដែលធ្វើឱ្យមានការលំបាកក្នុងការទំនាក់ទំនង ប៉ុន្តែក្រសួងនៅតែបន្តខិតខំស្វែងរក ដើម្បីស្តែងឱ្យឃើញពីការយកចិត្តទុកដាក់ និងការដឹងគុណចំពោះអតីតមន្ត្រីរាជការដែលបានបម្រើជាតិមាតុភូមិ៕ 

ដោយ ទូច វលក្ខ័ណ (រូបភាព​៖ ឡុង​ ដេវីត​ )