AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦ -- ក្រសួងទេសចរណ៍ប៊ុលហ្គារីបានរាយការណ៍កាលពីពេលថ្មីៗនេះថា រមណីយដ្ឋានឆ្នេរខ្សាច់មាសរបស់ប្រទេសប៊ុលហ្គារីនឹងធ្វើជាម្ចាស់ផ្ទះនៃកិច្ចប្រជុំក្រុមថ្នាក់ដឹកនាំជាន់ខ្ពស់របស់ក្រុមហ៊ុន TUI Group ដែលជាប្រតិបត្តិករទេសចរណ៍ឈានមុខគេមួយរបស់ពិភពលោក ចាប់ពីថ្ងៃទី២៤ ដល់ថ្ងៃទី២៦ ខែកញ្ញា។ អ្នកគ្រប់គ្រងជាន់ខ្ពស់សរុបចំនួន ១៥៥នាក់របស់ក្រុមហ៊ុន TUI ត្រូវបានគេរំពឹងថានឹងចូលរួម។

រដ្ឋមន្ត្រីក្រសួងទេសចរណ៍ប៊ុលហ្គារី លោក អ៊ីលីន ឌីមីត្រូវ បានធ្វើកិច្ចប្រជុំតាមអនឡាញជាមួយលោក ថូម៉ាស់ អ៊ែលឡឺបេកក៍ សមាជិកគណៈកម្មាធិការប្រតិបត្តិរបស់ក្រុមហ៊ុន TUI Group និងជានាយកផ្នែកសាជីវកម្ម និងកិច្ចការបរទេសរបស់ក្រុមហ៊ុន TUI Group និងលោក វីនសេនត៍ ស្នូវ៉ាអឺត ប្រធានទំនាក់ទំនងរដ្ឋាភិបាលនៅប្រតិបត្តិករទេសចរណ៍អាល្លឺម៉ង់។ ពួកគេបានពិភាក្សាអំពីការតភ្ជាប់ផ្លូវអាកាស ការពង្រីកកម្មវិធីទេសចរណ៍ទៅកាន់ប្រទេសប៊ុលហ្គារី និងសកម្មភាពទីផ្សាររួមគ្នាជាមួយក្រុមទេសចរណ៍រួមបញ្ចូលគ្នាដ៏ធំបំផុតមួយនៅលើពិភពលោក។ នេះបើយោងតាមរបាយការណ៍របស់ក្រសួងទេសចរណ៍ប៊ុលហ្គារី។

រដ្ឋមន្ត្រីក្រសួងទេសចរណ៍ត្រូវបានដកស្រង់សម្តី ដែលបាននិយាយថា«គោលដៅរបស់យើង គឺរក្សាភាពជាដៃគូយ៉ាងសកម្មជាមួយក្រុមហ៊ុន TUI ដោយផ្អែកលើផែនការជាក់ស្តែង។ ការធ្វើជាម្ចាស់ផ្ទះនៃកិច្ចប្រជុំនេះ គឺជាឱកាសពិសេសសម្រាប់អ្នកធ្វើការសម្រេចចិត្តដែលទទួលខុសត្រូវចំពោះកម្មវិធីទេសចរណ៍ សមត្ថភាពផ្លូវអាកាស ភាពជាដៃគូសណ្ឋាគារ ការវិនិយោគ និងទីផ្សារ ដើម្បីទទួលបានការយល់ដឹងដោយផ្ទាល់អំពីសក្តានុពលរបស់ប្រទេសប៊ុលហ្គារី»។

លោកបានបន្ថែមថា ប្រទេសប៊ុលហ្គារី គឺជាផ្នែកមួយនៃផលប័ត្រទេសចរណ៍របស់ក្រុមហ៊ុន TUI អស់រយៈពេលជាច្រើនទសវត្សរ៍មកហើយដោយតាមប្រពៃណីជាគោលដៅទេសចរណ៍ឆ្នេររដូវក្តៅ។ មានសក្តានុពលសំខាន់សម្រាប់កិច្ចសន្ទនាជាយុទ្ធសាស្ត្រកាន់តែទូលំទូលាយ និងសម្រាប់ការអភិវឌ្ឍភាពជាដៃគូទ្វេភាគីលើសពីរដូវក្តៅ។

កិច្ចប្រជុំក្រុមថ្នាក់ដឹកនាំជាន់ខ្ពស់របស់ក្រុមហ៊ុន TUI គឺជាគំនិតផ្តួចផ្តើមមួយក្នុងចំណោមគំនិតផ្តួចផ្តើមដែលត្រូវបានអនុម័តដោយក្រុងវ៉ារណាសម្រាប់រយៈពេលខែកញ្ញា-តុលា ដើម្បីផ្សព្វផ្សាយទីក្រុងឆ្នេរសមុទ្រនេះឱ្យក្លាយជាគោលដៅទេសចរណ៍។ កិច្ចប្រជុំនេះនឹងរួមបញ្ចូលនូវដំណើរទស្សនកិច្ចទៅកាន់ទីក្រុងវ៉ារណាសម្រាប់ថ្នាក់ដឹកនាំក្រុមទេសចរណ៍ផងដែរ៕

ដោយ៖ យា ចិន្ដាខន្ដី (ប្រភព៖ BTA)