AKP សៀមរាប ថ្ងៃទី៣០ ខែកក្កដា ឆ្នាំ២០២៦-- ថ្នាក់ដឹកនាំក្រសួងចំនួន៤ រួមមានឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម ឯកឧត្តម ហែម វណ្ណឌី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្ដន៍ និងតំណាងក្រសួងវប្បធម៍ និងវិចិត្រសិល្បៈ និងរដ្ឋបាលខេត្តសៀមរាប បានបើកវេទិកាជាតិលើកទី១ ស្តីពី "ការជំរុញផលិតផលសិប្បកម្មទេសចរណ៍និងវត្ថុអនុស្សាវរីយ៍ខ្មែរ" នៅក្នុងខេត្តសៀមរាប នាព្រឹកថ្ងៃទី៣០ ខែកក្កដា ឆ្នាំ២០២៦។

ឯកឧត្តម ហែម វណ្ណឌី បានមានប្រសាសន៍ថា ការលើកកម្ពស់ស្តង់ដារ និងគុណភាព គឺត្រូវការបង្កើនសមត្ថភាពផលិតតាមរយៈការអនុវត្តស្តង់ដារជាតិ និងការធានាបាននូវសុវត្ថិភាព ភាពធន់ និងសោភ័ណភាពនៃផលិតផល ហើយការប្រើប្រាស់បច្ចេកវិទ្យាសមស្រប និងឧបករណ៍ទំនើបៗមកជួយក្នុងដំណើរការផលិត ដើម្បីបង្កើនបរិមាណ និងកាត់បន្ថយដើមទុន ប៉ុន្តែនៅតែរក្សាបាននូវក្បាច់ក្បូរ និងអត្តសញ្ញាណសិល្បៈប្រពៃណីខ្មែរ។

លោកជំទាវ ចម និម្មល បានវាយតម្លៃខ្ពស់ចំពោះកិច្ចសហការយ៉ាងជិតស្និទ្ធ រវាងក្រសួងទេសចរ ណ៍ ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ក្រសួងវប្បធម៍ និងវិចិត្រសិល្បៈ និងរដ្ឋបាលខេត្តសៀមរាប ក្នុងស្មារតីបំពេញឱ្យគ្នាទៅវិញទៅមក សំដៅជំរុញផលិតផលសិប្បកម្មទេសចរណ៍ និងវត្ថុអនុស្សាវរីយ៍ខ្មែរ។

លោកជំទាវរដ្ឋមន្ត្រីបានគូសបញ្ជាក់ថា ផលិតផលសិប្បកម្មទេសចរណ៍ និងវត្ថុអនុស្សាវរីយ៍ខ្មែរ មិនមែនគ្រាន់តែជាវត្ថុអនុស្សាវរីយ៍ប៉ុណ្ណោះទេ ប៉ុន្តែជាការបង្ហាញពីអត្តសញ្ញាណ វប្បធម៌ ប្រពៃណី និងមរតករបស់ជាតិ ដែលមានសក្តានុពលខ្ពស់ក្នុងការបង្កើតតម្លៃបន្ថែម ជំរុញសេដ្ឋកិច្ចច្នៃប្រឌិត (Creative Economy) បង្កើនប្រាក់ចំណូលដល់ប្រជាជនមូលដ្ឋាន និងពង្រីកទីផ្សារនាំចេញ។

ក្នុងឱកាសនោះ ឯកឧត្តម ហួត ហាក់ បានមានប្រសាសន៍ថា វិស័យទេសចរណ៍ គឺជាសសរស្តម្ភសេដ្ឋកិច្ចដ៏រឹងមាំមួយរបស់កម្ពុជា ដែលមិនត្រឹមតែនាំមកនូវ ចំណូលប៉ុណ្ណោះទេ ប៉ុន្តែថែមទាំងបង្ហាញពីអត្តសញ្ញាណជាតិទៅកាន់សកលលោកផងដែរ។ ក្នុងបរិបទនៃទេសចរណ៍ទំនើប ភ្ញៀវទេសចរមិនចង់បានត្រឹមតែការមើលឃើញនឹងភ្នែកនោះទេ តែពួកគេចង់ទទួលបាននូវបទពិសោធនិងការចងចាំដែលពួកគេអាចប៉ះពាល់ដោយផ្ទាល់បាននិងអាចយកត្រលប់ទៅផ្ទះវិញបាន ហើយនេះគឺជាចំណុចយុទ្ធសាស្ត្រដែលផលិតផលសិប្បកម្មទេសចរណ៍និងវត្ថុអនុស្សាវរីយ៍ខ្មែរត្រូវដើរតួនាទីបំពេញបន្ថែមប្រកបដោយសក្តានុពលខ្ពស់។

ឯកឧត្តមបានបន្តថា សិល្បករ និងវិចិត្រករខ្មែរ បានដើរតួយ៉ាងសំខាន់ក្នុងការបន្តវេនពីបុព្វបុរស តាមរយៈ ការបង្កើតនូវផលិតផលសិប្បកម្មដ៏សម្បូរបែប ដែលផលិតផលទាំងនោះមានតាំងពីសិល្បៈចម្លាក់ថ្ម និងឈើ, ការត្បាញសូត្រដ៏ប្រណីត រហូតដល់ផលិតផលកែច្នៃថ្មីៗដែលធ្វើដោយដៃ។ អ្វីដែលពិសេសបំផុតនោះគឺការ លេចរូបរាងឡើងនូវផលិតផលដែលមានស្លាកសញ្ញា «Made in Cambodia» ដែលជាការបញ្ជាក់ពីគុណតម្លៃ នៃស្នាដៃកូនខ្មែរ។

វត្ថុអនុស្សាវរីយ៍ សម្លៀកបំពាក់ និងគ្រឿងផ្សំអាហារទាំងនេះ មិនមែនគ្រាន់តែជាទំនិញ សម្រាប់លក់ដូរប៉ុណ្ណោះទេ ប៉ុន្តែគឺជាការទូតទេសចរណ៍ មួយដែលឆ្លុះបញ្ចាំងពីអត្តសញ្ញាណជាតិ និង ទេពកោសល្យច្នៃប្រឌិតដែលទេសចរបរទេសចាត់ទុកថាជារបស់មានតម្លៃ និងមានអត្ថន័យជ្រាលជ្រៅបំផុត សម្រាប់រក្សាទុកជាការចងចាំ៕

ដោយ ឃុត សៅ