AKP បន្ទាយមានជ័យ ថ្ងៃទី៣០ ខែកក្កដា ឆ្នាំ២០២៦-- ដើម្បីបង្កើនល្បឿននៃការអភិវឌ្ឍ និងលើកកម្ពស់គុណភាពជីវភាពរស់នៅរបស់ប្រជាពលរដ្ឋ រដ្ឋបាលក្រុងប៉ោយប៉ែតបានរៀបចំ «កិច្ចប្រជុំសាមញ្ញលើកទី២៦ របស់ក្រុមប្រឹក្សាក្រុងប៉ោយប៉ែត អាណត្តិទី៤» នាព្រឹកថ្ងៃព្រហស្បតិ៍ ទី៣០ ខែកក្កដា ឆ្នាំ២០២៦ នៅសាលប្រជុំរដ្ឋបាលក្រុង ក្រោមអធិបតីភាពរបស់លោក ឈាន ចំរើន ប្រធានក្រុមប្រឹក្សាក្រុងប៉ោយប៉ែត និង លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត ដោយកិច្ចប្រជុំនេះបានប្រព្រឹត្តទៅដោយមានការអញ្ជើញចូលរួមយ៉ាងច្រើនកុះករពីសំណាក់សមាជិកក្រុមប្រឹក្សាក្រុង អភិបាលរងក្រុង ព្រមទាំងប្រធាន-អនុប្រធានការិយាល័យ និងមន្ត្រីរាជការជំនាញពាក់ព័ន្ធទូទាំងក្រុងប៉ោយប៉ែត។

នៅក្នុងអង្គប្រជុំទាំងមូលបានផ្តោតសំខាន់លើការពិនិត្យ ពិភាក្សា ពិគ្រោះយោបល់ និងអនុម័តលើរបៀបវារៈសំខាន់ៗជាច្រើន ដែលជា កិច្ចការរដ្ឋបាល និងផែនការអភិវឌ្ឍន៍ក្រុងប៉ោយប៉ែត ឱ្យកាន់តែមានភាពស៊ីសង្វាក់គ្នា និងឆ្លើយតបបានទាន់ពេលវេលាចំពោះតម្រូវការជាក់ស្តែងរបស់ប្រជាពលរដ្ឋ។

ក្នុងឱកាសនោះ លោក ឈាន ចំរើន ប្រធានក្រុមប្រឹក្សាក្រុងប៉ោយប៉ែត បានគូសបញ្ជាក់យ៉ាងច្បាស់អំពីតួនាទីដ៏មានសារៈសំខាន់របស់ក្រុមប្រឹក្សាក្រុង ក្នុងការឃ្លាំមើល និងតម្រង់ទិសការងាររដ្ឋបាល។ លោកបានមានប្រសាសន៍ថាការប្រជុំសាមញ្ញនេះ មិនត្រឹមតែជាកាតព្វកិច្ចតាមផ្លូវច្បាប់ប៉ុណ្ណោះទេ ប៉ុន្តែជាវេទិកាយុទ្ធសាស្ត្រក្នុងការប្រមូលផ្តុំទស្សនៈ ដើម្បីពិនិត្យ និងកែលម្អរាល់របៀបវារៈនៃការអភិវឌ្ឍក្រុង។ គោលដៅចម្បងរបស់យើង គឺធានាឱ្យបាននូវតម្លាភាព គណនេយ្យភាព និងការអនុវត្តការងារតាមបែបបទរដ្ឋបាលឱ្យកាន់តែមានស្តង់ដាររឹងមាំ។

ជាមួយគ្នានោះ លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានលើកឡើងពីស្មារតីទទួលខុសត្រូវក្នុងការប្រតិបត្តិការងារ និងការផ្តល់សេវាជូនប្រជាពលរដ្ឋឱ្យមានប្រសិទ្ធភាពខ្ពស់។ លោកបានមានប្រសាសន៍បន្ថែមថាការផ្តល់សេវាសាធារណៈជូនប្រជាពលរដ្ឋក្នុងក្រុងប៉ោយប៉ែត ត្រូវតែធ្វើឡើងដោយភាពរហ័ស ឆាប់រហ័ស និងមានប្រសិទ្ធភាពខ្ពស់បំផុត។ រដ្ឋបាលក្រុងនឹងបន្តពង្រឹងកន្ត្រាក់ការងារគ្រប់គ្រងបែបបទរដ្ឋបាល ព្រមទាំងបូកសរុបបទពិសោធន៍កន្លងមក ដើម្បីដោះស្រាយបញ្ហាតម្រូវការរបស់បងប្អូនប្រជាពលរដ្ឋឱ្យបានទាន់ពេលវេលា និងចំគោលដៅ។

កិច្ចប្រជុំសាមញ្ញលើកទី២៦ ទទួលបានលទ្ធផលយ៉ាងត្រចះត្រចង់ និងជាផ្លែផ្កាគួរឱ្យកត់សម្គាល់ ដោយសមាជិកអង្គប្រជុំទាំងអស់បានផ្លាស់ប្តូរមតិយោបល់ និងទទួលយកបទពិសោធន៍ល្អៗពីថ្នាក់ដឹកនាំ ដើម្បីយកទៅអនុវត្តរៀងៗខ្លួន។ តាមរយៈកិច្ចប្រជុំនេះ រដ្ឋបាលក្រុងប៉ោយប៉ែតបានបង្ហាញពីការប្តេជ្ញាចិត្តយ៉ាងមុតមាំក្នុងការបន្តអភិវឌ្ឍន៍ហេដ្ឋារចនាសម្ព័ន្ធ សម្រួលការផ្តល់សេវាច្រកចេញចូលតែមួយ និងលើកកម្ពស់សុខុមាលភាពសង្គមជូនប្រជាពលរដ្ឋ ដើម្បីប្រែក្លាយក្រុងប៉ោយប៉ែតឱ្យក្លាយជាទីក្រុងព្រំដែនដ៏មានសក្តានុពល និងការរស់នៅប្រកបដោយផាសុកភាព៕

ដោយ ឈុន សារ៉ាត