AKP កំពង់ស្ពឺ ថ្ងៃទី៣០ ខែកក្កដា ឆ្នាំ២០២៦-- រដ្ឋបាលខេត្តកំពង់ស្ពឺបានរៀបចំពិធីវេរប្រគេនទៀនព្រះវស្សាដល់វត្តចំនួន១៨វត្ត ដែលបានប្រារព្ធឡើងនៅវត្តមុនីរង្សី រតនារាម ហៅវត្តម្រុំខាងជើង ក្រោមអធិបតីភាពឯកឧត្តម យឹម សុខុម ប្រធានក្រុមប្រឹក្សាខេត្ត និងឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត ព្រមទាំងលោកជំទាវ ម៉េង វ៉ាន់ដានីន និង ដោយមានការអញ្ជើញចូលរួមផងដែរពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធានមន្ទីរ-អង្គភាពជុំវិញខេត្ត មន្ត្រីរាជការ កងកម្លាំងប្រដាប់អាវុធ ព្រមទាំងពុទ្ធបរិស័ទយ៉ាងច្រើនកុះករ ដើម្បីចូលរួមចាប់មគ្គផល និងរាប់បាតប្រគល់ទានថ្វាយព្រះសង្ឃដែលបាននិមន្តគោចរបិណ្ឌបាតយ៉ាងអធិកអធម។
‎

ពិធីនេះត្រូវបានរៀបចំឡើងក្នុងគោលបំណងថែរក្សា និងលើកកម្ពស់ប្រពៃណីព្រះពុទ្ធសាសនា ដែលជាសាសនារបស់រដ្ឋ ព្រមទាំងដើម្បីឧទ្ទិសកុសលផលបុណ្យជូនដល់បុព្វការីជន ញាតិសន្តានដែលបានចែកឋានទៅ និងបួងសួងសុំសេចក្តីសុខចម្រើន សន្តិភាព និងវឌ្ឍនភាព ជូនដល់ថ្នាក់ដឹកនាំ មន្ត្រីរាជការ និងប្រជាពលរដ្ឋទូទាំងខេត្តកំពង់ស្ពឺទាំងមូល។

‎

នៅក្នុងឱកាសនោះ ទេយ្យវត្ថុ និងសម្ភារដែលរដ្ឋបាលខេត្តបាននាំយកមកវេរប្រគេនដល់វត្តនីមួយៗ រួមមាន៖ ទៀនវស្សា អង្ករ មីជាតិ ឆៃប៉ូវ ទឹកត្រី ទឹកស៊ីអ៊ីវ សាប៊ូ អំបិល ស្ករស ទឹកសុទ្ធ ភេសជ្ជៈ ព្រមទាំងទេយ្យវត្ថុ១កញ្ចប់ កន្ត្រកផ្លែឈើ១កន្ត្រក និងបច្ច័យមួយចំនួនសម្រាប់វត្តនីមួយៗផងដែរ៕

ដោយ៖ ម៉ែន ប៊ុនធីម