AKP បន្ទាយមានជ័យ ថ្ងៃទី៣០ ខែកក្កដា ឆ្នាំ២០២៦--អាជ្ញាធរស្រុកមង្គលបូរីខេត្តបន្ទាយមានជ័យបានដាក់ចេញនូវការប្ដេជ្ញាចិត្តយ៉ាងមុតមាំក្នុងការលើកកម្ពស់គុណភាពសេវាសាធារណៈ ដោយផ្ដោតសំខាន់លើតម្លាភាព និងប្រសិទ្ធភាពនៃការងារគណនេយ្យភាពសង្គម ដើម្បីឆ្លើយតបឱ្យចំទិសដៅ និងតម្រូវការបស់ប្រជាពលរដ្ឋនៅមូលដ្ឋាន។ ការគូសបញ្ជាក់នេះបានធ្វើឡើងនៅក្នុងកិច្ចប្រជុំតាមដានត្រួតពិនិត្យផែនការសកម្មភាពរួម ស្ដីពីការងារគណនេយ្យភាពសង្គមឆ្នាំ២០២៦ និងរៀបចំផែនការសកម្មភាពរួមឆ្នាំ២០២៧ ដែលដឹកនាំផ្ទាល់ដោយ លោក កែវ តារារស្មីអភិបាលនៃគណៈអភិបាលស្រុក មង្គលបូរី កាលពីថ្ងៃទី២៩ ខែកក្កដា ឆ្នាំ២០២៦។

ថ្លែងក្នុងពិធីនោះ លោក កែវ តារារស្មី បានគូសបញ្ជាក់យ៉ាងស៊ីជម្រៅថា ការងារគណនេយ្យភាពសង្គម គឺជាស្ពានចងភ្ជាប់យ៉ាងរឹងមាំរវាងអាជ្ញាធរ និងប្រជាពលរដ្ឋ។ លោកបានមានប្រសាសន៍ផ្តាំផ្ញើ និងជំរុញយ៉ាងម៉ឺងម៉ាត់ដល់មន្ត្រីពាក់ព័ន្ធទាំងអស់ថា «យើងមិនត្រូវធ្វើការងារនេះគ្រាន់តែដើម្បីបញ្ចប់របាយការណ៍នៅលើក្រដាសនោះទេ! អ្វីដែលសំខាន់បំផុត គឺលទ្ធផលជាក់ស្តែងដែលប្រជាពលរដ្ឋទទួលបាន។ រាល់បញ្ហាប្រឈម និងសំណូមពររបស់បងប្អូនប្រជាពលរដ្ឋនៅមូលដ្ឋាន ត្រូវតែទទួលបានការយកចិត្តទុកដាក់ ដោះស្រាយដោយតម្លាភាព ស្មោះត្រង់ និងមានគណនេយ្យភាពខ្ពស់បំផុត»។

លោកអភិបាលស្រុកក៏បានសង្កត់ធ្ងន់បន្ថែមទៀតអំពីសារសំខាន់នៃការវាយតម្លៃ និងពិនិត្យមើលឡើងវិញនូវរាល់សកម្មភាពដែលបានអនុវត្តក្នុងឆ្នាំ២០២៦ ដើម្បីដកស្រង់ជាបទពិសោធន៍ ស្វែងរកចំណុចខ្វះខាត និងយកមកធ្វើជាមូលដ្ឋានគ្រឹះយ៉ាងរឹងមាំ ក្នុងការរៀបចំផែនការសកម្មភាពរួមសម្រាប់ឆ្នាំ២០២៧ ឱ្យកាន់តែមានប្រមាណវិធីច្បាស់លាស់ និងមានប្រសិទ្ធភាពខ្ពស់ជាងមុន។

កិច្ចប្រជុំដ៏មានសារសំខាន់នេះ ក៏មានការអញ្ជើញចូលរួមយ៉ាងច្រើនពីសំណាក់អភិបាលរងស្រុក នាយក និងនាយករងរដ្ឋបាលស្រុក ប្រធាន និងអនុប្រធានការិយាល័យចំណុះរដ្ឋបាលស្រុក តំណាងអង្គការទស្សនៈពិភពលោក (World Vision) អ្នកសម្របសម្រួលគណនេយ្យភាពសហគមន៍ (CAF) មេឃុំ ជំទប់ និងក្រុមប្រឹក្សាឃុំទូទាំងស្រុក។ វត្តមានចូលរួមពីគ្រប់ភាគីពាក់ព័ន្ធ ចាប់តាំងពីថ្នាក់ដឹកនាំស្រុក មន្ត្រីជំនាញ អាជ្ញាធរឃុំ រហូតដល់តំណាងអង្គការសង្គមស៊ីវិល និងអ្នកសម្របសម្រួលសហគមន៍ (CAF) បានស្តែងឱ្យឃើញពីស្មារតីសហការយ៉ាងរឹងមាំ ក្នុងការរួមគ្នាកសាងអភិបាលកិច្ចល្អនៅថ្នាក់មូលដ្ឋាន។

ក្នុងអង្គប្រជុំ អង្គពិធីទាំងមូលបានពិភាក្សាយ៉ាងផុសផុលលើសមិទ្ធផលសម្រេចបាន បញ្ហាប្រឈមដែលបានជួបប្រទះនាពេលកន្លងមក និងបានផ្លាស់ប្តូរយោបល់យ៉ាងស៊ីជម្រៅ ដើម្បីកំណត់ទិសដៅការងារបន្ត ក្នុងគោលបំណងធានាថា ប្រជាពលរដ្ឋគ្រប់រូបទទួលបានសេវាសាធារណៈ ដូចជា សេវារដ្ឋបាល សុខាភិបាល និងអប់រំ ដោយស្មើភាព មានគុណភាព និងគ្មានការរើសអើងឡើយ៕

ដោយ ឈុន សារ៉ាត