AKP បន្ទាយមានជ័យ ថ្ងៃទី២៨ ខែកក្កដា ឆ្នាំ២០២៦--រដ្ឋបាលខេត្តបន្ទាយមានជ័យ នាព្រឹកថ្ងៃទី២៨ ខែកក្កដា ឆ្នាំ២០២៦ នេះ បានប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន (២៦ មិថុនា ២០២៦) យ៉ាងមហោឡារិក នៅសាលប្រជុំធំសាលាខេត្តបន្ទាយមានជ័យ ក្រោមប្រធានបទដ៏មានសារសំខាន់ «រួមគ្នាឆ្លើយតបបញ្ហាគ្រឿងញៀនក្នុងបរិបទថ្មីប្រកបដោយភាពច្នៃប្រឌិត» ដើម្បីពង្រឹងស្មារតីម្ចាស់ការ និងកម្លាំងសរុបក្នុងការប្រយុទ្ធប្រឆាំងគ្រឿងញៀនឱ្យកាន់តែមានប្រសិទ្ធភាព។

ពិធីនេះបានប្រព្រឹត្តទៅក្រោមអធិបតីភាព ឯកឧត្តម ឧត្តមសេនីយ៍ឯក នាក់ យុទ្ធា អគ្គលេខាធិការងអាជ្ញាធរជាតិប្រយុទ្ធប្រឆាំងគ្រឿងញៀន និងជាតំណាងដ៏ខ្ពង់ខ្ពស់ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដោយមានការអញ្ជើញចូលរួមពី ឯកឧត្តម ប្លែក វ៉ារី ប្រធានក្រុមប្រឹក្សាខេត្ត, លោក លី សុវណ្ណារិទ្ធិអភិបាលខេត្តស្តីទី រួមជាមួយមន្ត្រីរាជការ កងកម្លាំងប្រដាប់អាវុធ តំណាងអង្គការ-ស្ថាប័នពាក់ព័ន្ធ លោកគ្រូ-អ្នកគ្រូ និស្សិត សិស្សានុសិស្ស និងយុវជនយ៉ាងកុះករ។

ថ្លែងក្នុងពិធីដ៏មានអត្ថន័យនេះ ឯកឧត្តម ឧត្តមសេនីយ៍ឯក នាក់ យុទ្ធា បានពាំនាំនូវប្រសាសន៍ផ្តាំផ្ញើសួរសុខទុក្ខ និងការណែនាំដ៏ខ្ពង់ខ្ពស់ពី ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ដោយបានគូសបញ្ជាក់យ៉ាងស៊ីជម្រៅថា ការប្រយុទ្ធប្រឆាំងគ្រឿងញៀនក្នុងសម័យកាលបច្ចុប្បន្ន ទាមទារឱ្យមានការផ្លាស់ប្តូរគំនិត និងវិធីសាស្ត្រធ្វើការប្រកបដោយ «ភាពច្នៃប្រឌិត និងទាន់សម័យ»។

ឯកឧត្តម ឧត្តមសេនីយ៍ឯក បានគូសបញ្ជាក់ថាប្រធានបទនៃទិវាអន្តរជាតិនាឆ្នាំនេះ មិនត្រឹមតែជាពាក្យស្លោកប៉ុណ្ណោះទេ ប៉ុន្តែជាបទបញ្ជាសកម្មភាពមួយដែលដាស់តឿន និងក្រើនរំលឹកដល់ជនគ្រប់រូបឱ្យយល់កាន់តែច្បាស់ពីផលប៉ះពាល់ដ៏ធ្ងន់ធ្ងរ និងគ្រោះថ្នាក់បំផ្លិចបំផ្លាញនៃគ្រឿងញៀនមកលើសុខភាព គ្រួសារ និងសន្តិសុខសង្គម។ យើងត្រូវតែសហការគ្នាបង្កើតយន្តការថ្មីៗ ក្នុងការទប់ស្កាត់ ការអប់រំផ្សព្វផ្សាយ និងការបង្ក្រាប ឱ្យទាន់សភាពការណ៍នៃការវិវត្តនៃបទល្មើសគ្រឿងញៀនឌីជីថល និងបច្ចេកវិទ្យា។

ឯកឧត្តមបានបន្តអំពាវនាវ និងបំផុសដល់គ្រប់ភាគីពាក់ព័ន្ធ អាជ្ញាធរដែនដី សមត្ថកិច្ចជំនាញ ជាពិសេសផ្នែកឯកជន និងប្រជាពលរដ្ឋគ្រប់រូប ឱ្យចូលរួម និងគាំទ្រយ៉ាងសកម្មក្នុងគ្រប់រូបភាព និងសកម្មភាពប្រយុទ្ធប្រឆាំងគ្រឿងញៀន ទាំងដោយផ្ទាល់ និងដោយប្រយោល ដើម្បីបង្កើតឱ្យបាននូវ «ភូមិ-ឃុំ-សង្កាត់ ស និងគ្មានគ្រឿងញៀន»។

ជាមួយគ្នានេះដែរ លោក លី សុវណ្ណារិទ្ធិ អភិបាលខេត្តស្តីទី នៃរដ្ឋបាលខេត្តបន្ទាយមានជ័យ បានសម្ដែងនូវការស្វាគមន៍យ៉ាងកក់ក្តៅ និងបានលើកឡើងពីកិច្ចខិតខំប្រឹងប្រែងរបស់អាជ្ញាធរខេត្ត ក្នុងការទប់ស្កាត់ និងបង្រ្កាបបទល្មើសគ្រឿងញៀននាពេលកន្លងមក។

លោកបានគូសបញ្ជាក់ថា ខេត្តបន្ទាយមានជ័យជាខេត្តព្រំដែន ដែលទាមទារឱ្យមានការប្រុងប្រយ័ត្នខ្ពស់ និងការសហការយ៉ាងជិតស្និទ្ធរវាងកងកម្លាំងប្រដាប់អាវុធ អាជ្ញាធរមូលដ្ឋាន និងប្រជាពលរដ្ឋ។ លោកបានប្តេជ្ញាថា រដ្ឋបាលខេត្តនឹងបន្តជម្រុញការងារអប់រំ បង្ការ បង្ក្រាប និងការព្យាបាលស្តារនីតិសម្បទាអ្នកញៀនគ្រឿងញៀន ដោយផ្តោតលើការចូលរួមយ៉ាងសកម្មពីស្រទាប់យុវជន ដែលជាទំពាំងស្នងឫស្សីរបស់ជាតិ។

អង្គពិធីទាំងមូលបានសម្តែងនូវការគាំទ្រយ៉ាងពេញទំហឹងចំពោះគោលនយោបាយរបស់រាជរដ្ឋាភិបាលកម្ពុជា ក្នុងការលុបបំបាត់គ្រោះថ្នាក់នៃគ្រឿងញៀន ព្រមទាំងបានអំពាវនាវដល់ប្អូនៗសិស្សានុសិស្ស និងយុវជន ឱ្យប្រកាន់ខ្ជាប់នូវពាក្យស្លោក «៣ កុំ ១ រាយការណ៍ (កុំពាក់ព័ន្ធ កុំសាក កុំពពាយនាយ និងត្រូវរាយការណ៍ជូនសមត្ថកិច្ច) ដើម្បីការពារខ្លួន គ្រួសារ និងសហគមន៍ ឱ្យចៀសផុតពីអន្ទាក់ដ៏គ្រោះថ្នាក់នៃគ្រឿងញៀន៕

ដោយ ឈុន សារ៉ាត