AKP បន្ទាយមានជ័យ ថ្ងៃទី២៧ ខែកក្កដា ឆ្នាំ២០២៦ — លោក ឈឿន ក្រៃយ៉ុង អភិបាលរងខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាលនៃគណៈអភិបាលខេត្ត បានថ្លែងថា ការផ្តល់ភាពអង់អាចដល់សហគមន៍មូលដ្ឋាន គឺជាយុទ្ធសាស្ត្រដ៏សំខាន់ក្នុងការធានាការគ្រប់គ្រងធនធានធម្មជាតិប្រកបដោយប្រសិទ្ធភាព អភិបាលកិច្ចល្អ និងការអភិវឌ្ឍវិស័យទេសចរណ៍ធម្មជាតិឱ្យមានចីរភាព ដែលអាចបង្កើតចំណូល និងលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់។

ការលើកឡើងនេះ បានធ្វើឡើងក្នុងពិធីបើកសិក្ខាសាលា ស្ដីពីគម្រោង «លើកកម្ពស់ភាពអង់អាចសហគមន៍ក្នុងការគ្រប់គ្រង និងអភិបាលកិច្ចសហគមន៍តំបន់ការពារធម្មជាតិទេសចរណ៍អាងត្រពាំងថ្ម (ECGM-ATT)» នាព្រឹកថ្ងៃចន្ទ ទី២៧ ខែកក្កដា ឆ្នាំ២០២៦ នេះ នៅសាលប្រជុំមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។

សិក្ខាសាលានេះ មានការចូលរួមពីតំណាងមន្ទីរ-អង្គភាពពាក់ព័ន្ធជុំវិញខេត្ត អភិបាលរងស្រុក អាជ្ញាធរឃុំ ព្រមទាំងតំណាងគណៈកម្មការសហគមន៍តំបន់ការពារធម្មជាតិជាច្រើនរូប ដែលសុទ្ធសឹងជាដៃគូដ៏មានសារៈសំខាន់ក្នុងការរួមគ្នាអភិរក្ស និងអភិវឌ្ឍន៍តំបន់ការពារធម្មជាតិឱ្យក្លាយជាប្រភពសេដ្ឋកិច្ចបៃតងសម្រាប់សហគមន៍។

លោក ឈឿន ក្រៃយ៉ុង បានមានប្រសាសន៍ថា ការអភិរក្សធនធានធម្មជាតិ មិនអាចពឹងផ្អែកតែលើស្ថាប័នរដ្ឋនោះទេ ប៉ុន្តែទាមទារឱ្យមានការចូលរួមយ៉ាងសកម្មពីប្រជាពលរដ្ឋ និងសហគមន៍មូលដ្ឋាន ដែលជាអ្នករស់នៅ និងទទួលផលដោយផ្ទាល់ពីធនធានទាំងនោះ។ ដូច្នេះ ការពង្រឹងសមត្ថភាព ការបង្កើនការយល់ដឹង និងការផ្តល់សិទ្ធិឱ្យសហគមន៍ចូលរួមក្នុងការសម្រេចចិត្ត គឺជាមូលដ្ឋានគ្រឹះនៃអភិបាលកិច្ចល្អ និងការអភិវឌ្ឍប្រកបដោយនិរន្តរភាព។

 លោកបានបន្តថា គម្រោង ECGM-ATT នឹងរួមចំណែកពង្រឹងតួនាទីរបស់សហគមន៍ក្នុងការគ្រប់គ្រងតំបន់ការពារធម្មជាតិ បង្កើនកិច្ចសហការរវាងអាជ្ញាធរ ស្ថាប័នពាក់ព័ន្ធ និងដៃគូអភិវឌ្ឍន៍ ព្រមទាំងជំរុញការប្រើប្រាស់ធនធានធម្មជាតិប្រកបដោយការទទួលខុសត្រូវ ស្របតាមគោលនយោបាយរបស់រាជរដ្ឋាភិបាលក្នុងការអភិរក្សបរិស្ថាន និងកាត់បន្ថយផលប៉ះពាល់ពីការប្រែប្រួលអាកាសធាតុ។ ក្នុងឱកាសនោះ លោកក៏បានអំពាវនាវឱ្យគ្រប់ភាគីពាក់ព័ន្ធបន្តរួមសហការគ្នាឱ្យកាន់តែជិតស្និទ្ធ ដើម្បីថែរក្សាសម្បត្តិធម្មជាតិដ៏មានតម្លៃនេះសម្រាប់ជាប្រយោជន៍ដល់មនុស្សជំនាន់បច្ចុប្បន្ន និងមនុស្សជំនាន់ក្រោយ។ 

តំបន់ការពារធម្មជាតិទេសចរណ៍អាងត្រពាំងថ្ម ស្ថិតនៅក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ គឺជាតំបន់អេកូទេសចរណ៍ដ៏សំខាន់មួយនៅភាគពាយ័ព្យនៃប្រទេសកម្ពុជា ដែលមានសក្តានុពលខ្ពស់ទាំងផ្នែកអភិរក្សធម្មជាតិ ទេសចរណ៍ និងការអភិវឌ្ឍសេដ្ឋកិច្ចសហគមន៍។ តំបន់នេះមានអាងទឹកដ៏ធំ ដែលដើរតួនាទីជាប្រភពទឹកសម្រាប់វិស័យកសិកម្ម និងជាជម្រកសត្វស្លាបទឹកជាច្រើនប្រភេទ ជាពិសេស សត្វក្រៀល ដែលជាបក្សីកម្រមួយលើពិភពលោក និងជានិមិត្តរូបនៃការអភិរក្សជីវចម្រុះនៅកម្ពុជា។ ក្រៅពីនេះ នៅមានប្រភេទសត្វស្លាបផ្សេងៗជាច្រើន មច្ឆាជាតិ និងប្រព័ន្ធអេកូឡូស៊ីដ៏សម្បូរបែប ដែលទាក់ទាញអ្នកស្រាវជ្រាវ និងភ្ញៀវទេសចរជាតិ-អន្តរជាតិ។

ជាមួយគ្នានេះ ទេសភាពធម្មជាតិដ៏ស្រស់ស្អាត ខ្យល់អាកាសបរិសុទ្ធ និងភាពស្ងប់ស្ងាត់ បានធ្វើឱ្យអាងត្រពាំងថ្មក្លាយជាគោលដៅដ៏មានសក្តានុពលសម្រាប់ការអភិវឌ្ឍអេកូទេសចរណ៍ ការសង្កេតសត្វស្លាប ការសិក្សាធម្មជាតិ និងទេសចរណ៍សហគមន៍ ដែលអាចបង្កើតការងារ និងចំណូលបន្ថែមដល់ប្រជាពលរដ្ឋក្នុងមូលដ្ឋាន។

អ្នកជំនាញយល់ឃើញថា ប្រសិនបើមានការគ្រប់គ្រងប្រកបដោយប្រសិទ្ធភាព ការចូលរួមយ៉ាងសកម្មពីសហគមន៍ និងការវិនិយោគលើហេដ្ឋារចនាសម្ព័ន្ធទេសចរណ៍សមស្រប តំបន់ការពារធម្មជាតិទេសចរណ៍អាងត្រពាំងថ្ម នឹងក្លាយជាគោលដៅអេកូទេសចរណ៍ដ៏សំខាន់មួយរបស់ខេត្តបន្ទាយមានជ័យ និងរួមចំណែកជំរុញកំណើនសេដ្ឋកិច្ចបៃតង ស្របតាមចក្ខុវិស័យអភិវឌ្ឍន៍ប្រកបដោយចីរភាពរបស់រាជរដ្ឋាភិបាល៕

ដោយ៖ ឈុន សារ៉ាត