AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានចូលរួមអបអរសាទរចំពោះវឌ្ឍនភាពរបស់សាកលវិទ្យាល័យជាតិមានជ័យ និងវាយតម្លៃខ្ពស់ដល់កិច្ចខិតខំប្រឹងប្រែងបំពេញការងាររបស់ថ្នាក់ដឹកនាំ មន្ត្រីរាជការ និងលោកគ្រូ-អ្នកគ្រូទាំងអស់ ដែលបានចូលរួមចំណែកបង្កើតសមិទ្ធផលជាច្រើនកន្លងមកនេះ។

ក្នុងកិច្ចប្រជុំក្រុមប្រឹក្សាភិបាលនៃសាកលវិទ្យាល័យជាតិមានជ័យ ដែលរៀបចំឡើងក្នុងគោលបំណងពិនិត្យពិភាក្សាលើវឌ្ឍនភាពការងាររបស់សាកលវិទ្យាល័យ និងវាយតម្លៃលទ្ធផលការងារកន្លងមក ពិនិត្យលើបញ្ហាប្រឈម ព្រមទាំងលើកទិសដៅការងារអនុវត្តន៍បន្ត នាថ្ងៃទី២៣ ខែកក្កដា ឆ្នាំ២០២៦ នៅសាកលវិទ្យាល័យជាតិមានជ័យ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្ដល់ជាអនុសាសន៍ និងរំលេចចំណុចសំខាន់មួយចំនួនរួមមាន៖ ត្រូវមានការសិក្សាស្រាវជ្រាវឱ្យបានច្បាស់លាស់អំពីស្ថានភាព និងការវិវត្តនៃសេដ្ឋកិច្ចក្នុងខេត្តបន្ទាយមានជ័យផ្ទាល់ ដើម្បីឈ្វេងយល់ពីតម្រូវការជំនាញ ព្រមទាំងរៀបចំជំនាញឱ្យបានត្រឹមត្រូវឆ្លើយតបទៅនឹងទីផ្សារការងារជាក់ស្ដែង។

ពិនិត្យមើលការរៀបចំកម្មវិធីសិក្សា និងបង្កើនកិច្ចសហប្រតិបត្តិការជាមួយសាកលវិទ្យាល័យ និងវិទ្យាស្ថាននានា។ ពិនិត្យកែលម្អកម្មវិធីសិក្សាផ្អែកលើលទ្ធផលទៅតាមតម្រូវការជាក់ស្ដែង ដោយមិនចាំបាច់ធ្វើការផ្លាស់ប្ដូរទាំងអស់ក្នុងពេលតែមួយនោះទេ។ ធានានិរន្តរភាពនៃចំនួនសិស្ស/និស្សិតចូលរៀន និងដាក់ចេញនូវវិធានការចាំបាច់នានា ដើម្បីរក្សានិស្សិតឱ្យនៅបន្តសិក្សាបានជាប់លាប់រហូតបញ្ចប់ការសិក្សា។ យកចិត្តទុកដាក់ពិនិត្យមើល និងផ្ដល់ឱកាសគាំទ្រដល់គ្រូបង្រៀនក្នុងការបំប៉នសមត្ថភាពបន្ថែម ជាពិសេសការលើកកម្ពស់គុណវុឌ្ឍិដល់កម្រិតបរិញ្ញាបត្រជាន់ខ្ពស់ និងបណ្ឌិត។ រៀបចំឱ្យមានវគ្គបណ្ដុះបណ្ដាល និងបំប៉នលើការប្រើប្រាស់បច្ចេកវិទ្យាអប់រំ និងបញ្ញាសិប្បនិម្មិត(AI) ក្នុងការរៀន និងបង្រៀន ព្រមទាំងរៀបចំបង្កើតឱ្យមានឯកសារ EdTech សម្រាប់គ្រូ និងនិស្សិតប្រើប្រាស់ជាជំនួយ។

រៀបចំគម្រោងស្រាវជ្រាវ និងបង្កើតឱ្យមានវគ្គបណ្ដុះបណ្ដាលស្ដីពីការស្រាវ ជ្រាវសម្រាប់ទាំងគ្រូ និងនិស្សិត ដើម្បីពង្រឹងសមត្ថភាពផ្នែកសិក្សាស្រាវជ្រាវឱ្យកាន់តែមានគុណភាព។ បង្កើនការផ្សព្វផ្សាយព័ត៌មាននៅតាមបណ្ដាវិទ្យាល័យជុំវិញតំបន់ ដើម្បីផ្សព្វផ្សាយពីបេសកកម្ម និងកម្មវិធីសិក្សារបស់សាកលវិទ្យាល័យជាតិមានជ័យឱ្យបានទូលំទូលាយ និងសូមបន្តកិច្ចសហការគ្នាឱ្យបានល្អប្រសើរ ដើម្បីជំរុញផែនការសកម្មភាពដែលបានដាក់ចេញទាំងនេះទៅជាលទ្ធផលការងារជាក់ស្ដែង៕

ដោយ៖ ចាន់ សុភឿន (ប្រភព៖ ក្រសួងអប់រំ)