AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- អ្នកការទូតកំពូលៗរបស់សហភាពអឺរ៉ុប (EU) និងប៉ាគីស្ថាន កាលពីពេលថ្មីៗនេះ បានអំពាវនាវឱ្យមានការទូតប្រកបដោយចីរភាព និងកិច្ចសន្ទនាជាបន្តបន្ទាប់ ដើម្បីបញ្ចប់ជម្លោះនៅមជ្ឈិមបូព៌ា។

ក្រសួងការបរទេសនៅទីក្រុងអ៊ីស្លាម៉ាបាដ បាននិយាយនៅក្នុងសេចក្តីថ្លែងការណ៍មួយថា អ្នកតំណាងជាន់ខ្ពស់របស់សហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខ និងជាអនុប្រធានគណៈកម្មការអឺរ៉ុបលោកស្រី កាចា កាល់ឡាស់ បានជួបជាមួយរដ្ឋមន្ត្រីការបរទេសប៉ាគីស្ថានលោក អ៊ីស្សាក ដារ នៅខាងក្រៅវេទិកាតំបន់អាស៊ានលើកទី៣៣ នៅទីក្រុងម៉ានីល ដើម្បីពិភាក្សាអំពីស្ថានភាពក្នុងតំបន់ដែលកំពុងវិវត្ត។

ក្រសួងការបរទេសនៅទីក្រុងអ៊ីស្លាម៉ាបាដ បាននិយាយនៅក្នុងសេចក្តីថ្លែងការណ៍នោះថា អ្នកទាំងពីរបានគូសបញ្ជាក់ថា ការទូតប្រកបដោយចីរភាពនៅតែជាមាគ៌ាតែមួយគត់ដែលអាចសម្រេចបាន និងប្រើប្រាស់បានយូរឆ្ពោះទៅរកសន្តិភាព និងស្ថិរភាព ជាពិសេសនៅក្នុងបរិបទនៃស្ថានភាពសហរដ្ឋអាមេរិក-អ៊ីរ៉ង់។

ការអំពាវនាវឱ្យមានការទូតប្រកបដោយចីរភាពនេះ បានកើតឡើងចំពេលដែលមានជម្លោះឡើងវិញរវាងសហរដ្ឋអាមេរិក និងអ៊ីរ៉ង់ បើទោះបីជាភាគីទាំងពីរបានចុះហត្ថលេខាលើអនុស្សរណៈយោគយល់គ្នាអ៊ីស្លាម៉ាបាដកាលពីខែមុនក៏ដោយ។

មេដឹកនាំទាំងពីរក៏បានពិភាក្សាគ្នាអំពីផលវិបាកកាន់តែទូលំទូលាយសម្រាប់សន្តិសុខក្នុងតំបន់ ទីផ្សារថាមពលសកលលោក សន្តិសុខដែនសមុទ្រ ពាណិជ្ជកម្ម និងខ្សែសង្វាក់ផ្គត់ផ្គង់ ដោយសង្កត់ធ្ងន់ទៅលើសារៈសំខាន់នៃការបន្តកិច្ចសន្ទនា និងការប្រកាន់ខ្ជាប់នូវច្បាប់អន្តរជាតិ។

ពួកគេបានបញ្ជាក់សារជាថ្មីនូវការប្តេជ្ញាចិត្តរួមគ្នារបស់ពួកគេក្នុងការជំរុញកិច្ចសហប្រតិបត្តិការក្រោមផែនការចូលរួមយុទ្ធសាស្ត្រប៉ាគីស្ថាន-សហភាពអឺរ៉ុប។

លោក ដារ បានបញ្ជាក់សារជាថ្មីនូវការប្តេជ្ញាចិត្តរបស់ប្រទេសប៉ាគីស្ថានចំពោះការអនុវត្តប្រកបដោយប្រសិទ្ធភាពនៃអនុសញ្ញាអន្តរជាតិទាំងអស់ដែលគាំទ្រដល់ក្របខ័ណ្ឌ GSP+ និងបានគូសបញ្ជាក់អំពីសារៈសំខាន់ដែលប្រទេសប៉ាគីស្ថានភ្ជាប់ទៅនឹងភាពជាដៃគូសេដ្ឋកិច្ចរបស់ខ្លួនជាមួយសហភាពអឺរ៉ុប៕

ដោយ៖ យា ចិន្ដាខន្ដី (ប្រភព៖ AA-AKP)