AKP ភ្នំពេញ ថ្ងៃទី២២ ខែកក្តដា ឆ្នាំ២០២៦ -- ក្នុងជំនួបពិភាក្សាការងារជាមួយលោកអនុប្រធាន​ និងជាអគ្គនាយកក្រុមហ៊ុន Korean Airទូតកម្ពុជាប្រចាំនៅប្រទេសកូរ៉េបានបញ្ជាក់ថាKorean Air បាន និងកំពុងដើរតួនាទីយ៉ាងសំខាន់ក្នុងវិស័យដឹកជញ្ជូនតាមផ្លូវអាកាសរបស់ប្រទេសកម្ពុជា​ ដែលបានតភ្ជាប់រាជធានីភ្នំពេញទៅកាន់ទីក្រុងសេអ៊ូល និងទីក្រុងធំៗ។

កាលពីរសៀលថ្ងៃអង្គារ​ ទី ២១  ខែកក្កដា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញជួបសម្តែងការគួរសម និងពិភាក្សាការងារជាមួយលោក WOO Keehong អនុប្រធាន​ និងជាអគ្គនាយកក្រុមហ៊ុន Korean Air នៅទីស្នាក់ការកណ្តាលនៃក្រុមហ៊ុន Korean Air ក្នុងតំបន់គីមផូ ខេត្តខ្យង់គីដូ សាធារណរដ្ឋកូរ៉េ។ 

ក្នុងឱកាសនៃជំនួបភាគីទាំងពីរបានផ្លាស់ប្តូរយោបល់អំពីស្ថានភាពវិវត្តន៍ថ្មីៗនៃការធ្វើដំណើររបស់ប្រជាជនកម្ពុជា និងកូរ៉េ តាមជើងហោះហើររបស់ក្រុម ហ៊ុន Korean Air ។ 

ឯកឧត្តមឯកអគ្គរាជទូត បានលើកឡើងថាក្រុមហ៊ុន Korean Air បាន និងកំពុងដើរតួនាទីយ៉ាងសំខាន់ក្នុងវិស័យដឹកជញ្ជូនតាមផ្លូវអាកាសរបស់ប្រទេសកម្ពុជា​ ដែលបានតភ្ជាប់រាជធានីភ្នំពេញទៅកាន់ទីក្រុងសេអ៊ូល និងទីក្រុងធំៗ ក្នុងសហរដ្ឋអាមេរិក ដូចជាទីក្រុងញ៉ូវយ៉ក ប៊ូសស្តុន និងទីក្រុងវ៉ាស៊ីនតោន ជាដើម។ 

ឯកឧត្តម សង្ឃឹមថាក្រុមហ៊ុន Korean Air នឹងបន្តរក្សា និងពង្រីកទីផ្សារអាកាសចរណ៍របស់ខ្លួនក្នុងប្រទេសកម្ពុជាក្នុងនាមជាអាកាសចរណ៍ឈានមុខទី១ របស់ប្រទេសកូរ៉េ៕

ដោយ៖ ប៊ុនរិទ្ធ