AKP ភ្នំពេញ ថ្ងៃទី២១ ខែកក្កដា ឆ្នាំ២០២៦-- កម្ពុជា និងធុរកិច្ចសហរដ្ឋអាម៉េរិកបន្តពង្រឹងភាពជាដៃគូជាមួយគ្នាដើម្បីជំរុញការវិនិយោគ និងការធ្វើពាណិជ្ជកម្មនៅកម្ពុជា ខណៈដែលរដ្ឋមន្ត្រីក្រសួងពាណិជ្ជកម្មបានបញ្ជាក់ជាថ្មីអំពីការប្តេជ្ញាចិត្តរបស់ក្រសួងក្នុងការគាំទ្រ និងការពារផលប្រយោជន៍របស់វិស័យឯកជន។

នៅថ្ងៃទី២១ ខែកក្កដា ឆ្នាំ២០២៦ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានជួបជាមួយឯកឧត្តម Brian D. McFeeters ប្រធាន និងនាយកប្រតិបត្តិនៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន (US-ASEAN Business Council) ដើម្បីពិភាក្សាលើការស្វែងរកឱកាសវិនិយោគថ្មី និងពង្រីកការវិនិយោគនៅកម្ពុជា។

លោកជំទាវរដ្ឋមន្ត្រីបានមានប្រសាសន៍ថា កិច្ចជំនួបនេះបានឆ្លុះបញ្ចាំងពីការបន្តពង្រឹងភាពជាដៃគូរវាងកម្ពុជា និងវិស័យធុរកិច្ចរបស់សហរដ្ឋអាម៉េរិក សំដៅជំរុញការវិនិយោគ ការធ្វើពាណិជ្ជកម្ម និងការអភិវឌ្ឍសេដ្ឋកិច្ចប្រកបដោយបរិយាបន្ន និងចីរភាព ស្របតាមគោលនយោបាយរបស់រាជរដ្ឋាភិបាលកម្ពុជា។

ជាមួយគ្នានេះ លោកជំទាវរដ្ឋមន្ត្រីបានបញ្ជាក់ជាថ្មីអំពីការប្តេជ្ញាចិត្តរបស់ក្រសួងពាណិជ្ជកម្មក្នុងការគាំទ្រ និងការពារផលប្រយោជន៍របស់វិស័យឯកជន រួមមាន ធុរជន វិនិយោគិន និងអ្នកប្រើប្រាស់ពីគ្រប់ទីមជ្ឈដ្ឋានលើសកលលោកតាមរយៈការរៀបចំការកែទម្រង់ និងការអនុវត្តគោលនយោបាយពាណិជ្ជកម្មប្រកបដោយប្រសិទ្ធភាព។

បន្ថែមពីនេះ លោកជំទាវរដ្ឋមន្ត្រីបានគូសបញ្ជាក់អំពីកិច្ចខិតខំប្រឹងប្រែងជាបន្តបន្ទាប់របស់ក្រសួងពាណិជ្ជកម្ម ក្នុងការត្រៀមខ្លួនសម្រាប់ការចាកចេញរបស់កម្ពុជាពីចំណាត់ថ្នាក់ប្រទេសអភិវឌ្ឍន៍តិចតួច (Least Developed Country – LDC) នាពេលខាងមុខ ស្របតាមទិសដៅអភិវឌ្ឍន៍សេដ្ឋកិច្ចប្រកបដោយចីរភាព ព្រមទាំងបន្តពង្រឹងកិច្ចសន្ទនារវាងរាជរដ្ឋាភិបាល និងវិស័យឯកជន ដើម្បីលើកកម្ពស់បរិយាកាសធុរកិច្ច ការវិនិយោគ និងការប្រកួតប្រជែងរបស់កម្ពុជាឱ្យកាន់តែមានភាពទាក់ទាញ និងអំណោយផល។

ជាការឆ្លើយតប ឯកឧត្តម Brian D. McFeeters បានបញ្ជាក់ពីការប្តេជ្ញាចិត្តរបស់ក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន ក្នុងការពង្រឹងកិច្ចសហប្រតិបត្តិការជាមួយរាជរដ្ឋាភិបាលកម្ពុជា និងគាំទ្រដល់ការអនុវត្តយុទ្ធសាស្ត្របញ្ចកោណ - ដំណាក់កាលទី១ ជាពិសេសលើការអភិវឌ្ឍសេដ្ឋកិច្ចឌីជីថល និងការអភិវឌ្ឍធនធានមនុស្ស ដែលជាវិស័យក្រុមហ៊ុនអាមេរិកមានជំនាញ បទពិសោធន៍ នវានុវត្តន៍ និងសមត្ថភាពប្រកួតប្រជែងខ្ពស់៕

ដោយ៖ ស្រីពេជ្រ