AKP សៀមរាប ថ្ងៃទី១៦ ខែកក្កដា ឆ្នាំ២០២៦--វត្ថុតាងនិងសារធាតុញៀន ចំនួន៩ប្រភេទរួមទាំងឧបករណ៍ប្រើប្រាស់ពាក់ព័ន្ឋទំងន់សរុបជាង២១១គីឡូក្រាម ត្រូវបានដុតបំផ្លាញចោល នាព្រឹកថ្ងៃទី ១៦ ខែកក្កដា ឆ្នាំ២០២៦ ក្នុងឱកាសដែលរដ្ឋបាលខេត្តសៀមរាប និងអាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំទិវាអន្តរជាតិប្រយុទ្ធប្រឆាំងគ្រឿងញៀន ដើម្បីផ្សព្វផ្សាយដល់ប្រជាពលរដ្ឋយុវជនយុវវ័យសិស្សានុសិស្សឱ្យចៀសឆ្ងាយពីគ្រឿងញៀន ក្រោមប្រធានបទ “រួមគ្នាឆ្លើយតបបញ្ហាគ្រឿងញៀនក្នុងបរិបទថ្មី ប្រកបដោយភាពច្នៃប្រឌិត” ។

លោកវរៈសេនីយទោ ចាប ណារិន ស្នងការរងទទួលផែនបទល្មើសប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានបង្ហាញថា៖ក្នុងរយៈពេល៦ខែដើមឆ្នាំ២០២៦ស្នងការដ្ឋានខេត្ត បានបង្រ្កាបគ្រឿងញៀនសរុប៣០៣ករណី ឃាត់ខ្លួនជនសង្ស័យចំនួន១.២០០នាក់ (ស្រី៧៤នាក់) បានដកហូតវត្ថុតាងគ្រឿងញៀនប្រមាណ ១១,៧៥៥.៤៣ក្រាម។ បានធ្វើការផ្សព្វផ្សាយ និងអប់រំអំពីខ្លឹមសារប្រយុទ្ធប្រឆាំង នឹងគ្រឿងញៀន សរុបចំនួន ៦ ១៣០លើក អ្នកចូលរួមសរុប ៣៩៩ ៦២២នាក់ (ស្រី ២៤៦ ៣៥២នាក់) ។

ឯកឧត្តម ឧត្តមសេនីយ៍ឯក ថោង សុគន្ធា អគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ឋប្រឆាំងគ្រឿងញៀន មានប្រសាសន៍ថា៖ទិវាគ្រឿងញៀននេះ ត្រូវបានប្រារព្ធឡើងជារៀងរាល់ឆ្នាំ និងត្រូវបានរាជរដ្ឋាភិបាល ចាត់ទុកជាទិវាដ៏មានសារៈសំខាន់មួយ សម្រាប់រំលឹកដល់ប្រជាពលរដ្ឋ ក៏ដូចជាបង្ហាញនូវការប្តេជ្ញាចិត្ត កិច្ចខិតខំប្រឹងប្រែងរបស់រាជរដ្ឋាភិបាល កម្ពុជា ក្នុងការចូលរួមប្រយុទ្ធប្រឆាំងគ្រឿងញៀននាពេលកន្លងមក។

ឯកឧត្ដមបានសំណូមពរដល់បងប្អូនគ្រប់ស្រទាប់វ័យ គ្រប់មជ្ឈដ្ឋាន និងគ្រប់វិស័យ សូមបន្តអនុវត្តស្មារតី គឺចាត់ ទុកបញ្ហាគ្រឿងញៀនជាបញ្ហារួម ដែលត្រូវចូលរួមដោះស្រាយនិងលុបបំបាត់ទាំងអស់គ្នា និងបានអំពាវនាវដល់អាជ្ញាធរគ្រប់លំដាប់ថ្នាក់ ភាគីពាក់ព័ន្ធនិងវិស័យឯកជន សូមចូលរួមបង្ការ និងលើកកម្ពស់ការផ្សព្វផ្សាយ អប់រំ ឱ្យបានទូលំទូលាយ ប្រកបដោយភាពទាក់ទាញ  និងមានប្រសិទ្ធភាព។ 

ឯកឧត្តមក៏បានផ្តាំផ្ញើដល់ជនរួមជាតិទាំងអស់ សំខាន់ស្រទាប់យុវវ័យដែលកំពុងសិក្សា ត្រូវចងចាំថា គ្រឿងញៀន មិនមែនជាឱសថសម្រាប់ជួយបំបាត់ទុក្ខព្រួយ ជួយឱ្យរៀនពូកែ ជួយលើកកម្លាំង និងធ្វើឱ្យសម្រស់កាន់តែស្អាតនោះទេ ។ ផ្ទុយទៅវិញការប្រើប្រាស់គ្រឿងញៀននាំឱ្យខូចសុខភាព បង្កបញ្ហាដល់ក្រុមគ្រួសារ ដល់សង្គមជាតិ ខុសច្បាប់ ខូចអនាគត និងស្លាប់ទៀតផង ៕

ដោយ ឃុត សៅ