AKP កំពង់ធំ ថ្ងៃទី១១ ខែកក្កដា ឆ្នាំ២០២៦ --លោកឧត្តមសេនីយ៍ទោ ហេង សុផលស្នងការនគរបាលខេត្តកំពង់ធំបានដាក់ចេញទិសដៅ៧ចំណុចដល់កងកម្លាំង ប៉ុស្តិ៍នគរបាលរដ្ឋបាលដើម្បីធានាសន្តិសុខសុវត្ថិភាពសណ្ដាប់ធ្នាប់មូលដ្ឋាន។

ឧត្តមសេនីយ៍ទោស្នងការបានដាក់ចេញនៅទិសដៅទាំងនេះក្នុងឱកាសអញ្ជើញដឹកនាំកងកម្លាំងចុះសាកសួរសុខទុក្ខមន្ត្រីប៉ុស្តិ៍នគរបាលរដ្ឋបាល ដែលកំពុងប្រចាំការផ្ដល់សេវាសាធារណៈ ជូនប្រជាពលរដ្ឋ ស្ថិតនៅស្រុកកំពង់ស្វាយនិងស្រុកប្រាសាទបល្ល័ង្កខេត្តកំពង់ធំកាលពីថ្ងៃទី១០ខែកក្កដាឆ្នាំ២០២៦។

ក្នុងឱកាសនោះលោកឧត្តមសេនីយ៍ទោ ហេង សុផល បានពាំនាំនូវប្រសាសន៍ ផ្ដាំផ្ញើសាកសួរសុខទុក្ខសំណាក់ឯកឧ ត្តម នាយឧត្តមសេនីយ៍ ស ថេត អគ្គស្នង ការនគរបាលជាតិ និងឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំជូនចំពោះបងប្អូនកងកម្លាំងនគរបាលប៉ុស្តិ៍រដ្ឋបាល ដែលកំពុងតែបំពេញភារកិច្ចយ៉ាងសស្រាក់សស្រាំប្រកបដោយស្មារតី ទទួលខុសត្រូវ តាមបណ្តាអង្គភាពរបស់ខ្លួនលើការងារបម្រើសេវាសាធារណៈ និងកិច្ចប្រតិបត្តិការ ថែរក្សាសន្តិសុខ សុវត្ថិភាពសណ្តាប់ធ្នាប់សង្គម។

លោកឧត្តមសេនីយ៍ទោស្នងការបានកោតសរសើរដល់ថ្នាក់ដឹកនាំនិងកម្លាំងប៉ុស្តិ៍នគរបាលរដ្ឋបាល ដែលមានការឯកភាព សាមគ្គីភាព ឈានទៅសម្រេចបាននូវសមិទ្ធផលនានា ជាបន្តបន្ទាប់ ក្នុងអង្គភាពឱ្យទទួលបានភាពស្រស់បំ ព្រង រីកចម្រើនគួរជាទីមោទនៈ។

ដើម្បីធានាបាននិរន្តរភាពការងារ លោកឧត្តមសេនីយ៍ទោ ស្នងការ បានក្រើនរំ លឹក និងដាក់ចេញទិសដៅ 
៧ចំណុចដល់កម្លាំងអនុវត្តឱ្យទទួលបានប្រសិទ្ធភាពខ្ពស់៖
ទី១.ពង្រឹងបទវិន័យលេខ៨៧៣ របស់កងកម្លាំងនគរបាលជាតិ។ទី២.ពង្រឹងរបបកិច្ចប្រជុំ តាមការកំណត់ ។ទី៣.រៀបចំផែនការសកម្មភាព សម្រាប់អនុវត្ត តួនាទី ភារកិច្ចជាប្រចាំថ្ងៃ(ការផ្ដល់សេវារដ្ឋបាលជូនប្រជាពលរដ្ឋ ដូចជា សៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណសញ្ជាតិខ្មែរ)។ទី៤.ការងារស្ថិតិប្រជាពលរដ្ឋ គ្រប់គ្រងត្រួតពិនិត្យ ធ្វើបច្ចុប្បន្នភាពប្រជាជន ចំណូលចំណាកស្រុក ជាពិសេសការងារគ្រប់គ្រងសន្តិសុខតាមទីតាំង រស់នៅប្រមូលផ្តុំ ឱ្យសកម្មនូវយុទ្ធនាការបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធអនឡាញ ក្នុងភូមិសាស្ត្រទទួលខុសត្រូវរបស់ខ្លួន។ទី៥.បង្កើនការងារសាមគ្គីភាព និងកិច្ចសហការល្អ ជាមួយមន្ត្រីរាជការ អាជ្ញាធរ មហាជនគ្រប់ស្រទាប់វណ្ណ:។ទី៦.បង្កើនការងារផ្សព្វផ្សាយគោលនយោបាយភូមិ-ឃុំ-សង្កាត់មានសុវត្ថិភាព តាមគោលដៅងាយរងគ្រោះ និងទី៧.ការអនុវត្តលើការងារនគរបាល និងសហគមន៍ ត្រូវទំនាក់ទំនងយ៉ាងជិតស្និទ្ធក្នុងការចុះជួបអ្នកពាក់ព័ន្ធ មេភូមិ ឃុំ ចៅសង្កាត់ និងក្រុមប្រឹក្សាឃុំ-សង្កាត់ព្រមទាំងបងប្អូនប្រជាពលរដ្ឋរៀងរាល់ខែ ដោយធ្វើផែនការចុះផ្សព្វផ្សាយខ្លឹមសារនៅតាមគោលដៅដែលបានកំណត់៕

ដោយ៖ ស៊ុម វណ្ណា