​ AKP ឧត្តរមានជ័យ ថ្ងៃទី១១ ខែកក្កដា ឆ្នាំ២០២៦ ---នៅសាលប្រជុំសាលាក្រុងសំរោង នាថ្ងៃសុក្រទី១០ ខែកក្កដា ឆ្នាំ២០២៦ លោក ផុន ចាន់និល អភិបាល នៃគណៈអភិបាលក្រុង និងជាប្រធានគណៈបញ្ជាការឯកភាពរដ្ឋបាលក្រុងសំរោង ដឹកនាំកិច្ចប្រជុំគណៈបញ្ជាការឯកភាពរដ្ឋបាលក្រុងសំរោង ប្រចាំខែកក្កដា ឆ្នាំ២០២៦ មានការចូលរួមពីសំណាក់ លោក លោកស្រីអភិបាលរងក្រុង, លោកនាយករដ្ឋបាលសាលាក្រុង, លោកអធិការនគរបាលក្រុង, លោកមេបញ្ជាការមូលដ្ឋានកងរាជអាវុធហត្ថក្រុង, លោកមេបញ្ជាការផ្នែកសឹករងក្រុងសំរោង, លោក-លោកស្រីប្រធានការិយាល័យ-អង្គភាពចំណុះរដ្ឋបាលក្រុង, ព្រមទាំងលោក-លោកស្រីប្រធានគណៈបញ្ជាការឯកភាពរដ្ឋបាលសង្កាត់ទាំង៥ និងមន្ត្រីពាក់ព័ន្ធជាច្រើនរូបទៀត។

អង្គប្រជុំបានធ្វើការពិនិត្យ ស្ដាប់របាយការណ៍បូកសរុបលទ្ធផលការងារដែលកងកម្លាំងប្រដាប់អាវុធ និងអាជ្ញា ធរសង្កាត់ទាំង៥ សម្រេចបាននាពេលកន្លងទៅ លើការងារគ្រប់គ្រងសន្តិសុខ សណ្តាប់ធ្នាប់តាមខ្សែបន្ទាត់ព្រំដែន និងផ្ទៃក្នុងក្រុង ព្រមទាំងពិភាក្សាផ្លាស់ប្តូរយោបល់លើបញ្ហាប្រឈមជាក់ស្តែង។

លោក ផុន ចាន់និល បានថ្លែងថា ការថែរក្សាសន្តិសុខ សណ្តាប់ធ្នាប់សាធារ ណៈ និងសុវត្ថិភាពសង្គម ជាកិច្ចការងារស្នូលចម្បង ក្នុងការធានានូវភាពសុខ សាន្ត ស្ថិរភាព និងការរស់នៅប្រកប ដោយភាពកក់ក្តៅរបស់បងប្អូនប្រជាព លរដ្ឋទូទាំងក្រុងសំរោង ដែលទាមទារឱ្យមានការត្រួតពិនិត្យ វាយតម្លៃ និងដាក់ចេញនូវវិធានការការងារឱ្យបានដិតដល់ជាប្រចាំ ។

លោកប្រធានគណៈបញ្ជាការឯកភាពរដ្ឋបាលក្រុង បានដាក់ចេញនូវបទបញ្ជា និងណែនាំម៉ឺងម៉ាត់ដល់កងកម្លាំងប្រដាប់អាវុធគ្រប់ប្រភេទ និងរដ្ឋបាលសង្កាត់ ត្រូវបន្តសហការគ្នាជិតស្និទ្ធ ក្នុងការបង្ក្រាបរាល់បទល្មើសផ្សេងៗ ដូចជា បញ្ហាល្បែងស៊ីសងខុសច្បាប់គ្រប់ប្រភេទ, បញ្ហាក្មេងទំនើង, បញ្ហាគ្រឿងញៀន, និងការទប់ស្កាត់រាល់ទម្រង់នៃការឆបោកតាមប្រព័ន្ធឌីជីថល ដើមី្បធានាភាពស្ងប់ស្ងាត់ជូនមូលដ្ឋាន។

លោកអភិបាលក្រុង ក៏បានក្រើនរំលឹកដល់មន្ត្រីជំនាញ និងកងកម្លាំង ត្រូវយកចិត្តទុកដាក់រៀបចំសណ្តាប់ធ្នាប់សាធារណៈ តាមដងផ្លូវ និងទីប្រជុំជនឱ្យមានរបៀបរៀបរយល្អ ព្រមទាំងត្រូវត្រៀមលក្ខណៈជាស្រេចទាំងកម្លាំង និងមធ្យោបាយ ក្នុងការចុះជួយសង្គ្រោះប្រជាពលរដ្ឋឱ្យបានទាន់ពេលវេលា ចំពោះគ្រោះមហន្តរាយធម្មជាតិនានា ដែលអាចកើតឡើងជាយថាហេតុក្នុងរដូវវស្សានេះ ក្នុងស្មារតីរួមគ្នាពង្រឹងសន្តិសុខសង្គម ដើមី្បជំរុញការអភិវឌ្ឍន៍សេដ្ឋកិច្ច និងការរស់នៅរបស់ប្រជាពលរដ្ឋក្នុងក្រុងសំរោង ឱ្យកាន់តែល្អ និងមានសុវត្ថិភាពទ្វេឡើង៕

ដោយ៖ ទិត ស្រ៊