​AKP ឧត្តរមានជ័យ ថ្ងៃទី១១ ខែកក្កដា ឆ្នាំ២០២៦ --នៅសាលប្រជុំការិយាល័យអប់រំ យុវជន និងកីឡា នៃរដ្ឋបាលក្រុងសំរោង នាព្រឹកថ្ងៃសុក្រទី១០ ខែកក្កដា ឆ្នាំ២០២៦ លោកស្រី ហេង សុជាតិ អភិបាលរង នៃគណៈអភិបាលក្រុងសំរោង និងជាប្រធានមជ្ឈមណ្ឌលសិក្សាសហគមន៍ក្រុង បានអញ្ជើញដឹកនាំ «កិច្ចប្រជុំស្តីពីការត្រួតពិនិត្យ និងជំរុញការអនុវត្តការងារក្នុងឆមាសទី២»។

កិច្ចប្រជុំត្រួតពិនិត្យការងារអប់រំនេះ មានការពីលោក ប្លុង កូយ ប្រធានការិយាល័យអប់រំ យុវជន និងកីឡា នៃរដ្ឋបាលក្រុងសំរោង, មន្ត្រីជំនាញការិយាល័យ ព្រមទាំងលោកគ្រូ-អ្នកគ្រូដែលជាគ្រូបង្រៀនប្រចាំការនៅតាមមជ្ឈមណ្ឌលសិក្សាសហគមន៍ទូទាំងក្រុងសំរោងផងដែរ។

សូមបញ្ជាក់ថា អង្គប្រជុំបានធ្វើការពិនិត្យ ស្ដាប់របាយការណ៍វឌ្ឍនភាព និងវាយតម្លៃខ្ពស់ចំពោះលទ្ធផលការងារអប់រំក្រៅប្រព័ន្ធ កម្មវិធីអក្ខរកម្ម បំណិនជីវិត និងវគ្គបណ្តុះបណ្តាលជំនាញខ្លីៗ ដែលមជ្ឈមណ្ឌលសម្រេចបាននាពេលកន្លងមក ព្រមទាំងបានពិភាក្សាដោះស្រាយលើបញ្ហាប្រឈមមួយចំនួនរួចមក។

លោក ប្លុង កូយ និងមន្ត្រីជំនាញការិយាល័យអប់រំក្រុង បានថ្លែងថា លោកនឹងប្រឹងប្រែងខិតខំបន្តសហការសម្របសម្រួលបច្ចេកទេស ជួយពិនិត្យតាមដានការបង្រៀនរបស់លោកគ្រូ អ្នកគ្រូ និងត្រៀមលក្ខណៈផ្គត់ផ្គង់សម្ភារសិក្សានានា ដើមី្បធ្វើយ៉ាងណាឱ្យដំណើរការរបស់មជ្ឈមណ្ឌលសិក្សាសហគមន៍ក្រុងសំរោង ដំណើរការទៅបានយ៉ាងរលូន។

លោកស្រី ហេង សុជាតិ មានប្រសា សន៍ថា ការពង្រឹងគុណភាពអប់រំក្រៅប្រព័ន្ធ និងការលើកកម្ពស់តួនាទីរបស់មជ្ឈមណ្ឌលសិក្សាសហគមន៍ ជាយន្តការដ៏សំខាន់ក្នុងការផ្តល់ឱកាសសិក្សាពេញមួយជីវិត ព្រមទាំងការបណ្តុះបណ្តាលជំនាញកែច្នៃជីវភាពជូនបងប្អូនប្រជាពលរដ្ឋនៅថ្នាក់មូលដ្ឋាន ។លោកស្រីអភិបាលរងក្រុង ក៏បានណែនាំ និងដាក់ចេញនូវផែនការសកម្មភាពយ៉ាងម៉ឺងម៉ាត់ ដើមី្បជំរុញការអនុវត្តការងារក្នុងឆមាសទី២ ឱ្យកាន់តែមានប្រសិទ្ធភាពខ្ពស់ ក្នុងនោះរួមមានការកែលម្អបរិស្ថានសិក្សា ការស្វែងរកវិធីសាស្ត្រទាក់ទាញសិក្ខាកាមឱ្យចូលរៀនបានកាន់តែច្រើន និងការរៀបចំកម្មវិធីសិក្សាឱ្យចំតម្រូវការទីផ្សារជាក់ស្តែងក្នុងសហគមន៍។

លោកគ្រូ អ្នកគ្រូទាំងអស់ ខិតខំប្រងប្រែងបង្រៀនពលរដ្ឋ ព្រមទាំងបានក្រើនរំលឹកឱ្យបន្តរួមសាមគ្គីគ្នា ពង្រឹងវត្តមានការងារ និងយកចិត្តទុកដាក់អភិវឌ្ឍសមត្ថភាពសិក្ខាកាមនៅមូលដ្ឋាន ឱ្យទទួលបានចំណេះដឹង និងជំនាញពិតប្រាកដ ដើមី្បយកទៅពង្រឹងសេដ្ឋកិច្ចគ្រួសារឱ្យកាន់តែប្រសើរឡើង ៕

ដោយ៖ ទិត ស្រ៊