AKP ភ្នំពេញ ថ្ងៃទី៨ ខែកក្កដា ឆ្នាំ២០២៦–កម្ពុជា បាននាំចេញអង្ករចំនួន ៦៣០ ពាន់តោន ទៅកាន់ទីផ្សារអន្តរជាតិតាមរយៈក្រុមហ៊ុនចេញអង្ករចំនួន ៦០ក្រុមហ៊ុន សម្រេចបានទឹកប្រាក់ប្រមាណ ៣៦៧.១លានដុល្លារ ក្នុងរយៈពេល ៦ខែនៃឆ្នាំ​២០២៦។ 

យោងតាមរបាយការណ៍របស់សហព័ន្ធស្រូវអង្ករបានឲ្យដឹងថា ក្នុងរយៈពេល ៦ខែនៃឆ្នាំ២០២៦ កម្ពុជាបាននាំចេញអង្ករបានចំនួន ៦៣០៩ ៩០៩តោន​ តាមរយៈក្រុមហ៊ុននាំចេញអង្ករចំនួន ៦០ក្រុមហ៊ុន ទៅកាន់គោលដៅចំនួន៦៤។ 

របាយការណ៍នេះបានបញ្ជាក់ថា ការនាំចេញអង្ករទៅកាន់បណ្តាប្រទេសនៅក្នុងតំបន់អឺរ៉ុបចំនួន​៣២ ​បានបរិមាណអង្ករចំនួន ១៧៩ ៨២៨តោន គិតជាទឹកប្រាក់ចំនួន ១២១.៧៣​លានដុល្លារ, ទៅកាន់ប្រទេសចិន ​និងតំបន់រដ្ឋបាលស្វយ័តចំនួន ១៧០ ៤៨៣តោន គិតជាទឹកប្រាក់ចំនួន ៩៩.៦៧លានដុល្លារ និងទៅកាន់ប្រទេសក្នុងអាស៊ានចំនួន ៥ប្រទេសបានបរិមាណចំនួន ២២៨ ៧៨០តោន​ គិតជាទឹកប្រាក់ចំនួន ៩៨.៩លានដុល្លារ។

បន្ថែមពីនេះ កម្ពុជាក៏បាននាំទៅកាន់គោលដៅ ២៤ប្រទេសផ្សេងទៀតមាន អាហ្វ្រិក មជ្ឈឹមបូព៌ា ។ល។ បានចំនួន ៥១ ២២៨តោន គិតជាទឹកប្រាក់ចំនួន ៤៦.៨លានដុល្លារ។

គួរបញ្ជាក់ដែរថា ចំពោះប្រភេទអង្ករដែលបាននាំចេញអង្កររួមមាន អង្ករក្រអូបចំនួន ៥៩.៨១ភាគរយ, អង្ករសគ្រាប់វែង ២២.៥៨ភាគរយ, អង្ករចំហ៊ុយ ១.៨២ភាគរយ, អង្ករសរីរាង្គចំនួន ១.២៤ភាគរយ និងអង្ករផ្សេងៗចំនួន ០.២ភាគរយ៕

ដោយ៖ ស្រីពេជ្រ