AKP ឧត្តរមានជ័យ ថ្ងៃទី២៧ ខែមិថុនា ឆ្នាំ២០២៦-- នៅសាលប្រជុំសាលាក្រុងសំរោង កាលពីថ្ងៃសុក្រ ទី២៦ ខែមិថុនា ឆ្នាំ២០២៦ លោកស្រី អាត ស្រីមុំ ប្រធានក្រុមប្រឹក្សាក្រុងសំរោង ដឹកនាំកិច្ចប្រជុំសាមញ្ញលើកទី២៥ របស់ក្រុមប្រឹក្សាក្រុងសំរោង អាណត្តិទី៤ ដោយមានការចូលរួមពីសំណាក់ លោក ផុន ចាន់និល អភិបាល នៃគណៈអភិបាលក្រុងសំរោង សមាជិកក្រុមប្រឹក្សាក្រុង អភិបាលរងក្រុង នាយក-នាយករងរដ្ឋបាល ប្រធានការិយាល័យ អង្គភាពជំនាញជុំវិញក្រុង មេបញ្ជាការកងកម្លាំងទាំងបី ប្រធាន គ.ក.ស.ក ក្រុង ព្រមទាំងចៅសង្កាត់ និងមន្ត្រីពាក់ព័ន្ធជាច្រើនរូបទៀត។

លោកស្រី អាត ស្រីមុំ បានថ្លែងថា ការប្រារព្ធកិច្ចប្រជុំសាមញ្ញជាទៀងទាត់របស់ក្រុមប្រឹក្សាក្រុង ជាយន្តការតាមដាន ត្រួតពិនិត្យ និងជំរុញការទទួលខុសត្រូវខ្ពស់ក្នុងការអនុវត្តតួនាទី ភារកិច្ច របស់គណៈអភិបាល និងការិយាល័យ អង្គភាពជំនាញ។ លោកស្រីបន្តថានៅក្នុងកិច្ចប្រជុំសាមញ្ញនេះ អង្គប្រជុំមាននូវរបៀបវារៈសំខាន់ៗមកពិនិត្យ ពិភាក្សា និងអនុម័ត ដូចជាការ ពិនិត្យ និងអនុម័តកំណត់ហេតុកិច្ចប្រជុំចាស់ ធ្វើការផ្ទៀងផ្ទាត់ និងអនុម័តលើកំណត់ហេតុកិច្ចប្រជុំសាមញ្ញលើកទី២៤ កន្លងទៅ ដើមី្បធានានិរន្តរភាពការងាររដ្ឋបាល។ ការពិភាក្សាលើរបាយការណ៍ប្រចាំខែ ពិនិត្យយ៉ាងលម្អិតលើរបាយការណ៍លទ្ធផលសកម្មភាពការងាររបស់គណៈអភិបាលក្រុង ក្នុងការគ្រប់គ្រងសន្តិសុខ សណ្តាប់ធ្នាប់សង្គម ការងារអភិវឌ្ឍន៍ហេដ្ឋារចនាសម្ព័ន្ធក្រុង ការងារសង្គមកិច្ច និងវឌ្ឍនភាពនៃការផ្តល់សេវាសាធារណៈជូនពលរដ្ឋតាមរយៈច្រកចេញចូលតែមួយ។ លើកទិសដៅការងារ និងដោះស្រាយបញ្ហាប្រឈម សមាជិកក្រុមប្រឹក្សាក្រុង និងគណៈអភិបាល ត្រូវរួមគ្នាជជែកដេញដោល ស្វែងរកដំណោះស្រាយលើបញ្ហាប្រឈមចំពោះមុខ និងដាក់ចេញនូវទិសដៅផែនការសកម្មភាពគន្លឹះៗសម្រាប់ខែបន្ទាប់ សំដៅពន្លឿនការងារអភិវឌ្ឍន៍មូលដ្ឋានឱ្យកាន់តែមានប្រសិទ្ធភាព និងចំគោលដៅ។

លោកស្រីប្រធានក្រុមប្រឹក្សា និងលោកអភិបាលក្រុងសំរោង បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះសមាជិកអង្គប្រជុំទាំងអស់ និងការិយាល័យជំនាញ ដែលបានខិតខំប្រឹងប្រែងរួមគ្នាបំពេញភារកិច្ច និងផ្តល់ធាតុចូលល្អៗ ព្រមទាំងបានជម្រុញឱ្យគ្រប់ផ្នែកពាក់ព័ន្ធទាំងអស់ បន្តពង្រឹងសាមគ្គីភាពផ្ទៃក្នុង និងបង្កើនការទទួលខុសត្រូវទ្វេដង ក្នុងការបម្រើពលរដ្ឋ និងអភិវឌ្ឍក្រុងសំរោងយើងឱ្យកាន់តែរីកចម្រើនគួរឱ្យមោទនៈ៕

ដោយ ទិត ស្រ៊