AKP ភ្នំពេញ ថ្ងៃទី២៦ ខែមិថុនា ឆ្នាំ២០២៦ -- រដ្ឋាភិបាលឥណ្ឌូណេស៊ីបានស្នើឱ្យដាក់បញ្ចូលសេចក្តីព្រាងច្បាប់ ស្តីពីមជ្ឈមណ្ឌលហិរញ្ញវត្ថុអន្តរជាតិឥណ្ឌូណេស៊ី (IIFC) ទៅក្នុងកម្មវិធីនីតិបញ្ញត្តិជាតិឆ្នាំ២០២៦ ដោយមានគោលបំណងពង្រឹងសមត្ថភាពប្រកួតប្រជែងរបស់ប្រទេសជាមជ្ឈមណ្ឌលហិរញ្ញវត្ថុអន្តរជាតិ និងទាក់ទាញការវិនិយោគ។

ថ្លែងនៅក្នុងកិច្ចប្រជុំការងារសភាមួយនៅទីក្រុងហ្សាកាតា អនុរដ្ឋមន្ត្រីក្រសួងច្បាប់ឥណ្ឌូណេស៊ី លោក អេវើត អូម៉ា ស្សារីហ្វ ហ៊ីអារីជបាននិយាយថា ច្បាប់ដែលបានស្នើឡើងនេះនឹងបម្រើជាមូលដ្ឋានច្បាប់សម្រាប់បង្កើត IIFC ស្របតាមអាណត្តិក្រោមច្បាប់អភិវឌ្ឍន៍ និងពង្រឹងវិស័យហិរញ្ញវត្ថុ។

លោក ហ៊ីអារីជ បាននិយាយថា គោលបំណងទីមួយ គឺដើម្បីកែលម្អសមត្ថភាពប្រកួតប្រជែងរបស់ប្រទេសឥណ្ឌូណេស៊ីជាមជ្ឈមណ្ឌលហិរញ្ញវត្ថុអន្តរជាតិ។ ទីពីរ ដើម្បីលើកទឹកចិត្តដល់ការពង្រឹង និងនវានុវត្តន៍វិស័យហិរញ្ញវត្ថុ។ ទីបី ដើម្បីទាក់ទាញការវិនិយោគ និងអ្នកធុរកិច្ចពីវិស័យហិរញ្ញវត្ថុក្នុងស្រុក និងអន្តរជាតិ។

លោកបានបន្ថែមថា គំនិតផ្តួចផ្តើមនេះក៏មានគោលបំណងសម្រួលដល់ការផ្តល់ហិរញ្ញប្បទានសម្រាប់វិស័យជាក់ស្តែង គម្រោងយុទ្ធសាស្ត្រជាតិការផ្តល់ហិរញ្ញប្បទានប្រកបដោយចីរភាព ការផ្តល់ហិរញ្ញប្បទានទាក់ទងនឹងអាកាសធាតុ ការអភិវឌ្ឍហេដ្ឋារចនាសម្ព័ន្ធ និងតម្រូវការផ្តល់ហិរញ្ញប្បទានយុទ្ធសាស្ត្រផ្សេងទៀតផងដែរ។

មន្ត្រី​រូប​នេះ​បាន​កត់​សម្គាល់​ថា ច្បាប់​លេខ៤ ឆ្នាំ២០២៦ ស្តីពី​ការ​អភិវឌ្ឍនិង​ពង្រឹង​វិស័យ​ហិរញ្ញវត្ថុ តម្រូវ​ឱ្យ IIFC ត្រូវ​បាន​គ្រប់គ្រង​តាម​រយៈ​ច្បាប់​ជាក់លាក់ ដែល​ត្រូវ​តែ​អនុម័ត​ក្នុង​រយៈពេល​បី​ខែ​បន្ទាប់​ពី​ច្បាប់​នេះ​ចូល​ជា​ធរមាន​នៅ​ថ្ងៃ​ទី១៧ ខែ​មិថុនា ឆ្នាំ២០២៦។

IIFC ត្រូវបានគេមើលឃើញថា ជាមជ្ឈមណ្ឌលសម្រាប់សេវាកម្មហិរញ្ញវត្ថុ ការអភិវឌ្ឍបច្ចេកវិទ្យាហិរញ្ញវត្ថុ និងសេវាកម្មគាំទ្រពាក់ព័ន្ធដោយដំណើរការក្រោមគោលការណ៍នៃប្រសិទ្ធភាព តម្លាភាព និងភាពសុចរិត។

បន្ទាប់ពីកិច្ចប្រជុំ ស្ថាប័ននីតិបញ្ញត្តិនៃសភាតំណាងរាស្ត្របានអនុម័តសំណើរបស់រដ្ឋាភិបាល ដើម្បីបន្តកិច្ចពិភាក្សាលើសេចក្តីព្រាងច្បាប់ក្រោមនីតិវិធីនីតិបញ្ញត្តិស្តង់ដារ៕

ដោយ៖ យា ចិន្ដាខន្ដី (ប្រភព៖ VNA)