AKP ភ្នំពេញ ថ្ងៃទី២៤ ខែមិថុនា ឆ្នាំ២០២៦ -- រដ្ឋាភិបាលហ្វីលីពីនកំពុងស្វែងរកហិរញ្ញប្បទានរហូតដល់ ១,៥ពាន់លានដុល្លារអាម៉េរិកពីធនាគារអភិវឌ្ឍន៍អាស៊ី (ADB) ដើម្បីគាំទ្រកម្មវិធីដែលមានគោលបំណងកាត់បន្ថយផលប៉ះពាល់សេដ្ឋកិច្ចនៃវិបត្តិដែលកំពុងបន្តកើតមាននៅមជ្ឈិមបូព៌ា។

លោក ហ្រ្វេដឺរីក ហ្គោ រដ្ឋមន្ត្រីក្រសួងហិរញ្ញវត្ថុហ្វីលីពីន ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុកដែលបាននិយាយកាលពីពេលថ្មីៗនេះថា ទីក្រុងម៉ានីលបានបង្ហាញចំណាប់អារម្មណ៍ក្នុងការទទួលបានមូលនិធិគាំទ្ររបស់ធនាគារ ADB ដែលជាឧបករណ៍ហិរញ្ញប្បទាន ដែលត្រូវបានរចនាឡើងដើម្បីជួយប្រទេសជាសមាជិកទប់ទល់នឹងវិបត្តិសេដ្ឋកិច្ចដែលមិននឹកស្មានដល់។

មូលនិធិនេះត្រូវបានគេរំពឹងថានឹងគាំទ្រដល់កញ្ចប់បង្រួបបង្រួមសម្រាប់ជីវភាពរស់នៅ ឧស្សាហកម្ម អាហារ និងដឹកជញ្ជូន (UPLIFT) របស់រដ្ឋាភិបាល ដែលជាគំនិតផ្តួចផ្តើមរបស់រដ្ឋាភិបាលទាំងមូល ដែលមានគោលបំណងកាត់បន្ថយផលប៉ះពាល់សេដ្ឋកិច្ចពីជម្លោះមជ្ឈិមបូព៌ា និងការពារជីវភាពរស់នៅទូទាំងប្រទេស។

លោក ហ្គោ បាននិយាយថា ប្រទេសនេះបានបង្ហាញពីចេតនារបស់ខ្លួនក្នុងការទាញយកមូលនិធិគាំទ្ររបស់ធនាគារ ADB ក្នុងចំនួនទឹកប្រាក់រហូតដល់ ១,៥ពាន់លានដុល្លារអាម៉េរិក ដើម្បីផ្តល់មូលនិធិបន្ថែមដើម្បីគាំទ្រវិធានការឆ្លើយតបក្រោមក្របខ័ណ្ឌនៃគំនិតផ្តួចផ្តើម UPLIFT ដើម្បីឆ្លើយតបកាន់តែប្រសើរឡើងចំពោះផលប៉ះពាល់ដែលកំពុងបន្តកើតមាននៃជម្លោះមជ្ឈិមបូព៌ា។

គំនិតផ្តួចផ្តើម UPLIFT ត្រូវការថវិកាយ៉ាងហោចណាស់ ១៥៥ពាន់លានប៉េសូ (ជាង ២,៥ពាន់លានដុល្លារអាម៉េរិក) ដើម្បីផ្តល់ហិរញ្ញប្បទានដល់កម្មវិធី និងគម្រោងរបស់ខ្លួន។

កាលពីខែមុន ធនាគារ ADB បាននិយាយថា ខ្លួនបានទទួលសំណើសុំជំនួយហិរញ្ញវត្ថុពីប្រទេសចំនួន១៥ នៅក្នុងតំបន់ដែលរងផលប៉ះពាល់ដោយវិបត្តិមជ្ឈិមបូព៌ា រួមទាំងប្រទេសហ្វីលីពីនផងដែរ។ ជាការឆ្លើយតប ធនាគារនេះបានដាក់ចេញកញ្ចប់ជំនួយចំនួន ៤ពាន់លានដុល្លារអាម៉េរិក ដែលរួមមានជំនួយផ្ទាល់ចំនួន ៣ពាន់លានដុល្លារអាម៉េរិក ដែលស្នើសុំដោយរដ្ឋាភិបាលនិង ១ពាន់លានដុល្លារអាម៉េរិក ជាហិរញ្ញប្បទានពាណិជ្ជកម្ម ដើម្បីជួយធានាការនាំចូលថាមពល និងអាហារ។

កាលពីខែឧសភា លោក ម៉ាសាតូ កាន់ដា ប្រធានធនាគារ ADB បានផ្តល់ជូនលោកប្រធានាធិបតី ហ្វឺឌីនែនដ៍ ម៉ាកូស ជូនៀ រហូតដល់ ១,៧៥ពាន់លានដុល្លារអាម៉េរិក ជាហិរញ្ញប្បទានបន្ថែម ដើម្បីជួយប្រទេសហ្វីលីពីនទប់ស្កាត់វិបត្តិដោយសារជម្លោះ។ ការគាំទ្រនេះអាចត្រូវបានដាក់ពង្រាយតាមរយៈការផ្តល់ប្រាក់កម្ចីបន្ថែមដោយផ្អែកលើគោលនយោបាយ ក៏ដូចជាហិរញ្ញប្បទានពាណិជ្ជកម្មប្រសិនបើចាំបាច់។

ចំនួនទឹកប្រាក់នេះក៏បន្ថែមពីលើប្រាក់កម្ចីប្រហែល ២ពាន់លានដុល្លារអាម៉េរិក ដែលធនាគារ ADB កំពុងរៀបចំសម្រាប់ប្រទេសហ្វីលីពីននៅក្នុងឆ្នាំនេះផងដែរ៕

ដោយ៖ យា ចិន្ដាខន្ដី (ប្រភព៖ VNA)