AKP ភ្នំពេញ ថ្ងៃទី២៤ ខែមិថុនា ឆ្នាំ២០២៦ -- អាស៊ានគួរតែបង្កើនការចែករំលែកចំណេះដឹង ការផ្ទេរបច្ចេកវិទ្យាឆ្លងដែន កាត់បន្ថយគម្លាតឌីជីថល និងពង្រឹងសមត្ថភាពធនធានមនុស្ស ដើម្បីឱ្យផែនការសកម្មភាពអាស៊ាន ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ (APASTI) អាចបម្រើជាយន្តការស្នូលសម្រាប់ជំរុញកំណើនសេដ្ឋកិច្ច និងដោះស្រាយបញ្ហាប្រឈមបរិស្ថានរបស់ប្លុកប្រកបដោយចីរភាព។ នេះបើយោងតាមមន្ត្រីឡាវម្នាក់។

ថ្លែងនៅក្នុងកិច្ចប្រជុំលើកទី៨៩ នៃគណៈកម្មាធិការអាស៊ាន ស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ (COSTI-89) នៅទីក្រុងវៀងចន្ទន៍កាលពីថ្ងៃទី២៣ ខែមិថុនា ឆ្នាំ២០២៦ លោក ស៊ុកសាវ៉ាត ស៊ីហាប៉ាន់យ៉ាអគ្គនាយកនៃនាយកដ្ឋានវិទ្យាសាស្ត្រ នៃក្រសួងអប់រំ និងកីឡាឡាវបាននិយាយថា កិច្ចប្រជុំនេះមានគោលបំណងកសាងសមិទ្ធផលពីមុន និងពន្លឿនការអនុវត្តផែនការ APASTI ដោយបកប្រែគោលដៅយុទ្ធសាស្ត្រទៅជាសកម្មភាពជាក់ស្តែង។

លោកបានសង្កត់ធ្ងន់ថា វិទ្យាសាស្ត្រ បច្ចេកវិទ្យា និងនវានុវត្តន៍ គួរតែត្រូវបានចាត់ទុកថាមិនត្រឹមតែជាឧបករណ៍សម្រាប់ការអភិវឌ្ឍប៉ុណ្ណោះទេប៉ុន្តែថែមទាំងជាសសរស្តម្ភសំខាន់សម្រាប់ការកសាងតំបន់អាស៊ានឱ្យកាន់តែរឹងមាំ មានការប្រកួតប្រជែង និងបរិយាបន្នផងដែរ។

លោក ស៊ុកសាវ៉ាត បានអំពាវនាវដល់អ្នកចូលរួមឱ្យចូលរួមក្នុងការពិភាក្សាបើកចំហ យុទ្ធសាស្ត្រ និងទស្សនវិស័យទៅមុខ ដោយផ្តោតជាពិសេសទៅលើការអនុវត្តបច្ចេកវិទ្យាដើម្បីដោះស្រាយបញ្ហាបម្រែបម្រួលអាកាសធាតុ ពង្រឹងសន្តិសុខស្បៀងអាហារ និងពន្លឿនការផ្លាស់ប្តូរទៅជាថាមពលកកើតឡើងវិញនៅទូទាំងតំបន់អាស៊ាន។ លោកបានបញ្ជាក់ពីតម្រូវការក្នុងការបង្កើនប្រព័ន្ធអេកូឡូស៊ីនវានុវត្តន៍ក្នុងតំបន់ ដើម្បីគាំទ្រដល់ការអនុម័តដោយសុវត្ថិភាពនៃបញ្ញាសិប្បនិម្មិត ពង្រឹងសន្តិសុខតាមអ៊ីនធឺណិត និងលើកកម្ពស់ការអភិវឌ្ឍទីក្រុងឆ្លាតវៃ។

មន្ត្រីឡាវក៏បានស្នើឱ្យពង្រឹងកិច្ចសហប្រតិបត្តិការជាមួយដៃគូសន្ទនារបស់អាស៊ាន និងវិស័យឯកជនផងដែរ ដើម្បីបកប្រែការស្រាវជ្រាវវិទ្យាសាស្ត្រទៅជាកម្មវិធីពាណិជ្ជកម្ម។

លោកបានសម្តែងជំនឿថា លទ្ធផលនៃកិច្ចប្រជុំនឹងបង្កើតយុទ្ធសាស្ត្រជាក់ស្តែង ដើម្បីពង្រឹងសាមគ្គីភាពក្នុងតំបន់ និងធានាថា គ្មាននរណាម្នាក់ត្រូវបានទុកចោលឡើយ។

ក្រោមអធិបតីភាពរបស់លោក ស៊ុកសាវ៉ាត និងលោក ណាហ្គូលែនឌ្រែន កាងហ្កាយ៉ាតការ៉ាស៊ុ មន្ត្រីជាន់ខ្ពស់មកពីក្រសួងវិទ្យាសាស្ត្របច្ចេកវិទ្យា និងនវានុវត្តន៍របស់ប្រទេសម៉ាឡេស៊ី កិច្ចប្រជុំ COSTI-89 នេះ បានប្រមូលផ្តុំអ្នកតំណាងមកពីរដ្ឋសមាជិកអាស៊ានទាំង១១ រួមជាមួយតំណាងសហគ្រាសឯកជន និងលេខាធិការដ្ឋានអាស៊ាន៕

ដោយ៖ យា ចិន្ដាខន្ដី (ប្រភព៖ VNA)