AKP ព្រះសីហនុ ថ្ងៃ១៨ ខែមិថុនា ឆ្នាំ២០២៦ -- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ នៅរសៀលថ្ងៃព្រហស្បតិ៍ ទី១៨ ខែមិថុនា ឆ្នាំ២០២៦ បានអញ្ជើញចូលរួមសម្ពោធដាក់ឱ្យដំណើរការជាផ្លូវការហាងភីហ្សាហាត់ (Pizza Hut) និងហាងការ៉េមម៉ូណា ជេឡាតូ (Mona Gelato) (ការ៉េមអ៊ីតាលី) សាខាក្រុងព្រះសីហនុ ដែលមានទីតាំងស្ថិតនៅទីលានសម្តេចតេជោ ក្នុងសង្កាត់លេខ៤ ក្រុងព្រះសីហនុ។
លោក ស្ទីន ភូហ្គាអាដ (Steen Puggaard) អគ្គនាយកប្រតិបត្តិក្រុមហ៊ុន ល្វីស ធី ខូលេកសិន (Luis T Collection) បានឱ្យដឹងថា ការបើកហាងភីហ្សាហាត់នាពេលនេះ មានកត្តាពីរសំខាន់ គឺទី១ ទីតាំងនេះជាតំបន់ផ្សារអន្តរជាតិនាពេលខាងមុខ និងទី២ ទីតាំងនេះនៅជាប់នឹងឆ្នេរសមុទ្រ ទីលានតេជោ ដូច្នេះភ្ញៀវទេសចរជាតិ និងអន្តរជាតិមកកាន់ខេត្តព្រះសីហនុនឹងមកភ្លក់រស់ជាតិភីហ្សាហាត់របស់យើងដែលមានជាច្រើនជម្រើសរស់ជាតិ។ ម្យ៉ាងទៀត គឺចង់ឱ្យភ្ញៀវទេសចរដែលមកកម្សាន្តនៅខេត្តព្រះសីហនុ បានស្គាល់រស់ជាតិភីហ្សាហាត់របស់យើង ជួយបង្កើតការងារដល់យុវជនកម្ពុជា បង្កើនសេដ្ឋកិច្ចគ្រួសារ និងសេដ្ឋកិច្ចជាតិផងដែរ។ លោកសង្ឃឹមថា ភីហ្សាហាត់បើកទ្វារទទួលអតិថិជនមកពិសាររស់ជាតិឆ្ងាញ់ និងអាចយកទៅផ្ញើកូនចៅនៅផ្ទះបានគ្រប់ពេលវេលា។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានថ្លែងថា ពិធីសម្ពោធដាក់ឱ្យដំណើរការជាផ្លូវការហាងភីហ្សាហាត់ និងហាងការ៉េមម៉ូណា ជេឡាតូ សាខាក្រុងព្រះសីហនុនៅលើទឹកដីតំបន់ឆ្នេរសមុទ្រដ៏ស្រស់បំព្រងដែលត្រូវបានប្រសិទ្ធនាមថា ជា «តារារៈនាទិសនិរតី» និងកំណត់ជាតំបន់សេដ្ឋកិច្ចពិសេសគំរូពហុបំណង នាពេលនេះ គឺបានបង្ហាញពីសក្ខីភាពនៃការជឿជាក់របស់អ្នកវិនិយោគលើសេដ្ឋកិច្ច និងការអភិវឌ្ឍរីកចម្រើនរបស់ខេត្តព្រះសីហនុ ជាពិសេសស្ថិរភាពនយោបាយរបស់កម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តមអភិបាលខេត្ត បានស្វាគមន៍ និងអបអរសាទរពិធីសម្ពោធដាក់ឱ្យដំណើរការជាផ្លូវការហាងភីហ្សាហាត់ និងហាងការ៉េមម៉ូណា ជេឡាតូ សាខាក្រុងព្រះសីហនុនាពេលនេះ ដែលពិតជាបានចូលរួមចំណែកយ៉ាងសំខាន់ក្នុងការជួយជំរុញ និងលើកកម្ពស់សេដ្ឋកិច្ចនៅក្នុងខេត្តព្រះសីហនុឱ្យកាន់តែមានការរីកចម្រើនទៅមុខជាលំដាប់ ក៏ដូចជាការផ្តល់នូវអាហារប្រកបដោយគុណភាព សុវត្ថិភាព និងមានឱជារសគួរឱ្យទុកចិត្តសម្រាប់អតិថិជន ជាពិសេសបានផ្តល់ការងារជូនប្រជាពលរដ្ឋទាំងក្នុងខេត្តព្រះសីហនុ និងមកពីបណ្តាខេត្តផ្សេងៗ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ប្រជាពលរដ្ឋស្របតាមគោលនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជ រដ្ឋាភិបាលកម្ពុជា គឺដើម្បីកំណើនការងារ សមធម៌ ប្រសិទ្ធភាព និងចីរភាព ដែលជាមូលដ្ឋានគ្រឹះឆ្តោះទៅសម្រេចបានចក្ខុវិស័យកម្ពុជាឆ្នាំ២០៥០។

ឯកឧត្តម បានបន្តថា រាជរដ្ឋាភិបាលកម្ពុជានីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្រ្តបញ្ចកោណដំណាក់កាលទី១ និងកម្មវិធីនយោបាយនានា ដើម្បីបន្តកសាងនឹងពង្រឹងមូលដ្ឋានគ្រឹះសម្រាប់ជំរុញសន្ទុះនៃការអភិវឌ្ឍប្រទេសជាតិក្នុងរយៈពេលមធ្យម និងរយៈពេលវែង ស្របតាមចក្ខុវិស័យកម្ពុជាឆ្នាំ២០៥០ ប្រកបដោយប្រសិទ្ធភាព ភាពប្រកួតប្រជែងបើកចំហ បរិយាបន្ន និងចីរភាព ដោយរដ្ឋប្រកាន់យកតួនាទីជាយុទ្ធសាស្ត្រវិទូអ្នកដឹកនាំ និងអ្នកគ្រប់គ្រងការអភិវឌ្ឍ ជាអ្នកការពារកម្មសិទ្ធិ និងទ្រព្យសម្បត្តិឯកជន និងជាអ្នកគាំទ្រ និងលើកកម្ពស់ការអភិវឌ្ឍវិស័យឯកជន។
នៅក្នុងការដឹកនាំ និងការគ្រប់គ្រងការអភិវឌ្ឍ រដ្ឋប្រកាន់យកនូវការបើកចំហឆ្ពោះទៅខាងក្រៅដោយពង្រឹង និងពង្រីកក្របខ័ណ្ឌពាណិជ្ជកម្មសេរីទាំងទ្វេភាគី និងពហុភាគី ការរក្សាស្ថិរភាពម៉ាក្រូសេដ្ឋកិច្ច ការជំរុញការធ្វើពិពិធកម្មសេដ្ឋកិច្ច ការអភិវឌ្ឍសេដ្ឋកិច្ច និងសង្គមឌីជីថល និងការបង្កើនភាពរឹងមាំនៃវិស័យហិរញ្ញវត្ថុ។ ដើម្បីឆ្លើយតបទៅនឹងការខិតខំប្រឹងប្រែងរបស់រាជរដ្ឋាភិបាល រដ្ឋបាលខេត្តព្រះសីហនុ បានខិតខំអភិវឌ្ឍន៍លើគ្រប់វិស័យ ដែលរួមមានវិស័យឯកជនផងដែរ ឱ្យកាន់តែរស់រវើកតាមរយៈការលើកកម្ពស់បរិយាកាសធុរកិច្ច និងវិនិយោគ ដែលជាប្រភពបង្កើតការងារ ចំណូល និងចលករជំរុញសកម្មភាពសេដ្ឋកិច្ចសម្រេចបានកំណើនជាបន្តបន្ទាប់ ព្រមទាំងបានខិតខំថែរក្សាការពារនូវសន្តិសុខ សណ្តាប់ធ្នាប់ សុវត្ថិភាពសង្គមបានល្អប្រសើរផ្តល់ឱកាសដល់វិនិយោគិនមកបណ្តាក់ទុននៅខេត្តព្រះសីហនុប្រកបដោយទំនុកចិត្ត និងប្រសិទ្ធភាពខ្ពស់៕
ដោយ៖ ងូ សុមុនី