AKPបន្ទាយមានជ័យ ថ្ងៃទី ១៧ ខែមិថុនាឆ្នាំ២០២៦--ក្នុងស្មារតីរួមគ្នាឆ្ពោះទៅរកគោលដៅ "សំណល់សូន្យ"  រដ្ឋបាលស្រុកម៉ាឡៃ ខេត្តបន្ទាយមានជ័យបានបើកយុទ្ធនា ការទ្រង់ទ្រាយធំក្នុងការសម្អាតបរិស្ថាន និងរើសសំរាមតាមបណ្តោយផ្លូវជាតិលេខ ៥៩ កាលពីថ្ងៃទី១៦ ខែមិថុនា ឆ្នាំ២០២៦នេះ។ 

យុទ្ធនាការដែលប្រព្រឹត្តទៅក្រោមអធិបតីភាពលោក ស្វាយ ជា អភិបាលនៃគណៈអភិបាលស្រុកម៉ាឡៃនេះ បានក្លាយជាកម្លាំងចលករដ៏សំខាន់ក្នុងការដាស់តឿនមនសិការសាធារណជន ឱ្យងាកមកចាប់អារម្មណ៍លើការថែរក្សាអនាម័យបរិស្ថាន។

ថ្លែងក្នុងឱកាសចូលរួមទិវាបរិស្ថានជាតិ និងបរិស្ថានអន្តរជាតិ លោក ស្វាយ ជា បានសង្កត់ធ្ងន់លើសារៈសំខាន់នៃភាពជាម្ចាស់ការ។

លោកបានលើកឡើងថាការសម្អាតបរិស្ថាន និងការគ្រប់គ្រងសំរាមនៅតាមទីសាធារណៈ មិនមែនជាការងាររបស់ស្ថាប័នណាមួយនោះទេ ប៉ុន្តែវាគឺជាកាតព្វកិច្ចរួមរបស់ប្រជាពលរដ្ឋគ្រប់រូប។    

លោកអភិបាលស្រុកបានបន្តទៀតថា ការចូលរួមរបស់មន្ត្រីរាជការ កងកម្លាំងប្រដាប់អាវុធទាំងបីប្រភេទ និងសិស្សានុ សិស្ស គឺដើម្បីធ្វើជា «គំរូឈានមុខ» ក្នុងសង្គម។

លោកបានបញ្ជាក់យ៉ាងច្បាស់ថា សកម្ម ភាពសម្អាតនេះ មិនមែនជាការងាររដ្ឋបាលធម្មតានោះទេ ប៉ុន្តែគឺជា មូលដ្ឋា នគ្រឹះនៃសុខភាពសាធារណៈនិងជាការឆ្លុះបញ្ចាំងពី សេចក្តីថ្លៃថ្នូររបស់សង្គម ជាតិទាំងមូលផងដែរ។

ទិដ្ឋភាពជាក់ស្តែងក្នុងយុទ្ធនាការនេះ ពោរពេញដោយភាពរស់រវើក តាមរយៈការចូលរួមយ៉ាងផុសផុលពីសំណាក់យុវជន និងសិស្សានុសិស្ស។ 

លោក ស្វាយ ជា បានសម្តែងក្តីរីករាយយ៉ាងខ្លាំង ដោយចាត់ទុកសកម្មភាពរបស់យុវជនថាជា «កាតាលីករ» ដ៏សំខាន់ក្នុងការដុតបញ្ឆេះស្មារតីស្រឡាញ់បរិស្ថានដល់ស្រទាប់យុវជនជំនាន់ក្រោយ។

លោកអភិបាលស្រុកបានថ្លែងទាំងក្តីមោទនភាពថា ក្មួយៗសិស្សានុសិស្សដែលបានចូលរួមប្រមូលសំរាម និងផ្សព្វផ្សាយអប់រំបរិស្ថាន បានបង្ហាញនូវទឹកមុខសប្បាយរីករាយ និងមោទនភាពយ៉ាងក្រៃលែងចំពោះសកម្មភាពសង្គមនេះ។ នេះជាសញ្ញាណវិជ្ជមានមួយដែលបង្ហាញថា មនសិការស្រឡាញ់ស្រុក កំណើត កំពុងចាក់ឫសយ៉ាងរឹងមាំក្នុងចិត្តរបស់យុវជន។

យុទ្ធនាការនេះ មានការចូលរួមយ៉ាងច្រើនកុះករពីលោក ខេង ចាន់ថុល អនុប្រធានសហភាពសហព័ន្ធយុវជនកម្ពុជា ស្រុកម៉ាឡៃ ព្រមទាំងតំណាងមេឃុំ ប្រជាពលរដ្ឋ និងបងប្អូនអាជីវករ ដែលបានរួមដៃគ្នាសម្អាតនៅតំបន់ភូមិថ្មី ឃុំម៉ាឡៃ។ ភាពជោគជ័យនៃយុទ្ធនាការនេះ មិនត្រឹមតែបានផ្តល់នូវសោភ័ណភាពស្រស់បំព្រងដល់ផ្លូវលេខ ៥៩ ប៉ុណ្ណោះទេ ប៉ុន្តែថែមទាំងបានពង្រឹងនូវសាមគ្គីភាព និងការទទួលខុសត្រូវរួមគ្នារបស់ប្រជាពលរដ្ឋស្រុកម៉ាឡៃ ក្នុងការថែរក្សាបរិស្ថានឱ្យមាននិរន្តរភាពសម្រាប់ថ្ងៃអនាគត៕

ដោយ ៖ឈុនសារ៉ាត