AKP ព្រះវិហារ ថ្ងៃទី១៦ ខែមិថុនា ឆ្នាំ២០២៦--នៅអនុសាខាកាកបាទក្រហមកម្ពុជា ស្រុកគូលែន នាថ្ងៃចន្ទទី១៥ ខែមិថុនា ឆ្នាំ២០២៦ បានបើកវគ្គបណ្តុះបណ្តាលស្តីអំពី ចំណេះដឹងជាមូលដ្ឋាន ប្រវត្តិចលនា គោលការណ៍គ្រឹះកាកបាទក្រហម អឌ្ឍចន្ទក្រហម វិជ្ជាសង្គ្រោះបឋមកាកបាទក្រហមកម្ពុជា និងផ្សព្វផ្សាយពីការប្រើប្រាស់ថង់ប្លាសស្ទិច សុវត្ថិភាពចរាចរណ៍ ជូនយុវជនកាកបាទក្រហមកម្ពុជាប្រចាំវិទ្យាល័យ ស្រយង់ ចំនួន៨៩នាក់ ស្រី ៦៨នាក់ និងយុវជនកក្រក ទើបរើសថ្មីចំនួន៤៥នាក់ ស្រី ៣៧នាក់ ស្ថិតនៅភូមិស្រយង់ជើង ឃុំស្រយង់ ស្រុកគូលែន ក្រោមវត្តមាន លោក ម៉ក់ ឌុង អនុប្រធានគណៈកម្មាធិការ អនុសាខាកាកបាទក្រហមកម្ពុជា ស្រុកគូលែន ។

លោក ម៉ក់ ឌុង បានលើកឡើងថា ដើម្បីបន្ថែមសមាជិកយុវជនដែលបានប្រឡងជាប់ហើយទៅបន្តការសិក្សា សាលាបានរើសយុវជនបំពេញ និងបើកវគ្គជាមូលដ្ឋានយុវជនកាកបាទក្រហមកម្ពុជាជូននាពេលនេះគោលបំណងដើម្បីអោយប្អូនៗបានដឹងអំពីប្រវត្តិគោលការណ៍គ្រឹះ ចលនាអន្តរជាតិកាកបាទក្រហម អឌ្ឍចន្ទក្រហម តួនាទីរបស់យុវជនកាកបាទក្រហម ពិសេសវិជ្ជាសង្គ្រោះបឋម។ 

លោកម៉ក់ ឌុង ក៏បានធ្វើការផ្តាំផ្ញើដល់ប្អូនៗត្រូវខិតខំរៀនសូត្រអោយក្លាយជាកូនល្អ សិស្សល្អ មិត្តល្អ ជៀសអោយឆ្ងាយពីគ្រឿងញៀន ធ្វើដំណើរតាមដងផ្លូវត្រូវគោរពច្បាប់ចរាចរណ៍អោយខ្ចាប់ខ្ជួន ចូលរួមថែរក្សាអនាម័យ និងសំអាតនៅទីធ្លាសាលា និងតាមកន្លែងផ្សេងៗចៀសវាងការប្រើប្រាស់អំពើហឹង្សា និងជួយកិច្ចការផ្ទះ បន្ទាប់ពីការសិក្សា រៀនសូត្រ ៕ 

ដោយ ទិត ស្រ៊