AKP ឧត្តរមានជ័យ ថ្ងៃទី១៦ ខែមិថុនា ឆ្នាំ២០២៦--លោក រិន សាគរ អភិបាលរង នៃគណៈអភិបាលក្រុងសំរោង នាថ្ងៃចន្ទទី១៥ ខែមិថុនា ឆ្នាំ២០២៦បានអញ្ជើញចូលរួមក្នុងកម្មវិធីសិក្ខាសាលាដ៏មានសារៈសំខាន់ «ស្តីពីការគ្រប់គ្រងប្រព័ន្ធធារាសាស្ត្រដោយសុចរិតភាព សម្រាប់ការគ្រប់គ្រងប្រព័ន្ធធារាសាស្ត្រខ្នាតតូច ដល់សហគមន៍កសិករប្រើប្រាស់ទឹក (FWUC) និងសមាជិកសហគមន៍»។ សិក្ខាសាលានេះមានរយៈពេល ២ថ្ងៃ (ចាប់ពីថ្ងៃទី១៥ ដល់ថ្ងៃទី១៦ ខែមិថុនា ឆ្នាំ២០២៦) ដែលត្រូវបានរៀបចំឡើងដោយការសហការគ្នាយ៉ាងជិតស្និទ្ធរវាង មន្ទីរធនធានទឹក និងឧតុនិយមខេត្ត គម្រោងនីឆ័រ (NATURE) និងមន្ទីរកសិកម្ម រុក្ខាប្រមាញ់ និងនេសាទ ខេត្តឧត្តរមានជ័យ ដោយប្រារព្ធធ្វើឡើងនៅទីតាំងសាលាឆទានភូមិពុរ សង្កាត់សំរោង ក្រុងសំរោង ខេត្តឧត្តរមានជ័យ។

លោក រិន សាគរ បានលើកឡើងថា ការគ្រប់គ្រង និងការបែងចែកប្រភពទឹកប្រកបដោយសមធម៌ តម្លាភាព និងសុចរិតភាព គឺជាគន្លឹះយុទ្ធសាស្ត្រក្នុងការធានានូវសន្តិសុខទឹក និងស្ថិរភាពសេដ្ឋកិច្ចរបស់បងប្អូនកសិករ ក្នុងកិច្ចការងារអភិវឌ្ឍន៍សមត្ថភាពសហគមន៍ ។ វគ្គបណ្តុះបណ្តាលនេះ គឺជាការពង្រឹងសមត្ថភាពដល់គណៈកម្មការ និងសមាជិកសហគមន៍កសិករប្រើប្រាស់ទឹក ឱ្យយល់ដឹងពីរបៀបគ្រប់គ្រង ថែរក្សា និងបែងចែកទឹកប្រកបដោយតម្លាភាព គណនេយ្យភាព និងគ្មានអំពើពុករលួយ ព្រមទាំងជៀសវាងទំនាស់ក្នុងការដណ្ដើមទឹកគ្នារដូវវស្សានិងរដូវប្រាំង។ នេះជាការការពារហេដ្ឋារចនាសម្ព័ន្ធធារាសាស្ត្រខ្នាតតូចមតាមរយៈការណែនាំបច្ចេកទេសថែទាំប្រឡាយ ទំនប់ និងទ្វារទឹកខ្នាតតូចនៅក្នុងមូលដ្ឋាន ឱ្យមានភាពរឹងមាំ ធន់នឹងការប្រើប្រាស់ ដើម្បីធានាបាននូវការផ្គត់ផ្គង់ទឹកដល់ផ្ទៃដីកសិកម្មបានយូរអង្វែង។

លោកអភិបាលរងក្រុង បានសង្កត់ធ្ងន់លើទិសស្លោក «គ្រប់គ្រងទឹកបានល្អ នាំឲ្យវិស័យកសិកម្មរីកចម្រើន» ដោយបានជម្រុញឱ្យបងប្អូនកសិករទាំងអស់ យកចិត្តទុកដាក់ក្រេបជញ្ជក់ចំណេះដឹងពីវគ្គបណ្តុះបណ្តាលនេះ ដើម្បីយកទៅអនុវត្តផ្ទាល់ក្នុងសហគមន៍ ជួយឱ្យការដាំដុះទទួលបានទិន្នផលខ្ពស់ និងបង្កើនចំណូលគ្រួសារ។ លោកក៏សូមថ្លែងអំណរគុណយ៉ាងជ្រាលជ្រៅចំពោះ មន្ទីរជំនាញពាក់ព័ន្ធ និងគម្រោងនីឆ័រ ដែលបានជ្រើសរើសភូមិសាស្ត្រសង្កាត់សំរោង ក្នុងការរៀបចំវគ្គបណ្តុះបណ្តាលដ៏មានប្រយោជន៍នេះឡើង ដើម្បីរួមគ្នាកសាងសហគមន៍កសិកម្មដាំដុះប្រកបដោយភាពវៃឆ្លាត និងចីរភាព ៕ 

ដោយ ទិត ស្រ៊