AKP កំពង់ឆ្នាំង ថ្ងៃទី១៦ ខែមិថុនា ឆ្នាំ២០២៦--ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ជួបសំណេះសំណាលជាមួយប្រជាពលរដ្ឋជួបការលំបាកងាយរងគ្រោះ ស្ត្រីមានកូនច្រើន ចាស់ជរាគ្មានទីពឹងនិងគ្រួសារកងទ័ព មកពីស្រុកចំនួន៣ ក្នុងស្រុករលាប្អៀរ ស្រុកជលគិរី និងស្រុកកំពង់ត្រឡាច ខេត្តកំពង់ឆ្នាំង។

កាលពីថ្ងៃទី១៥ ខែមិថុនា ឆ្នាំ២០២៦ ដោយមានការអញ្ជើញចូលរួមពីលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង សប្បុរសជនលោក តាន់ សុខ និង ក្រុមគ្រួសា លោក លោស្រីនិងសហជីពសហព័ន្ធយុវជនកម្ពុជាខេត្តកំពង់ឆ្នាំងផងដែរ ឯកឧត្តម ស៊ុន សុវណ្ណារិទ្ធិ បានមានប្រសាសន៍ថា បច្ចុប្បន្នរាជរដ្ឋាភិបាលកម្ពុជា  ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជានាចក្រកម្ពុជា បានធ្វើឱ្យប្រទេសជាតិមានសុខសន្តិភាព  ស្ថិរភាពនយោបាយ  សណ្ដាប់ធ្នាប់សង្គមនិងមានការអភិវឌ្ឍលើគ្រប់វិស័យ។ 

នាពេលបច្ចុប្បន្នបាននិងកំពុងយកចិត្តទុកដាក់ក្នុងការស្ដារហេដ្ឋារចនាសម្ព័នដូចជា  ផ្លូវ  ថ្នល់  ស្ពាន សាលារៀនគ្រប់កម្រិត  វត្តអារាម  ស្រះទឹក  ប្រឡាយ  សំណង់អគារខ្ពស់ៗ  ដែលកត្តាទាំងនេះបានធ្វើឱ្យប្រជាពលរដ្ឋកាន់តែមានជីវភាពកាន់តែប្រសើឡើង ស្របតាមកម្មវិធីគោលនយោបាយ និងយុទ្ធសាស្ត្របញ្ជកោណ ដំណាក់កាលទី១ នៃរដ្ឋសភា។ 

ទន្ទឹមនឹងនេះឯកឧត្តម បានថ្លែងអំណរគុណដល់ ប្រជាពលរដ្ឋខេត្តកំពង់ឆ្នាំងទាំងអស់ដែលបានរួមសាមគ្គីគ្នាថែរក្សានូវសុខសន្តិភាព និងសូម បន្ត ថែរក្សា នូវអ្វីៗដែលជាសមិទ្ធផលយើងមានសព្វថ្ងៃនេះ គឺជាមោទនភាពរបស់ រាជរដ្ឋាភិបាលដែលដឹកនាំ។ ការដាក់ចេញនិងអនុវត្តន៍ដោយជោគជ័យនូវនយោបាយឈ្នះ-ឈ្នះ សុខសន្តិភាព របស់សម្តេចបវរធិបតី ហ៊ុន ម៉ាណែត ប្រជាពលរដ្ឋនៅក្នុងខេត្ត អាចគោរពព្រះពុទ្ធសាសនា និងជំនឿសាសនាដទៃនានាទៀតបានដោយមិនប្រកាន់ជាតិសាសន៍ណាឡើយ។ តាំងតែពីដើមរហូតមកដល់បច្ចុប្បន្ន វត្តអារាមបានចូលរួមអភិវឌ្ឍសង្គមកម្ពុជាស្ទើរគ្រប់វិស័យ។ 

ថ្លែងក្នុបរិបទនេះឯកឧត្តមបានក្រើនរំលឹកដល់លោកគ្រូអ្នកគ្រូ  មាតាបិតា និងអាណាព្យាបាលសិស្ស  ជួយណែនាំដល់កូនចៅរបស់ខ្លួនយកពេលទំនេរអានសៀវភៅដែលមាននៅតាមបណ្ណាល័យនិងនៅតាមសាលារៀន  ដើម្បីបង្កើននិងពង្រឹងសមត្ថភាពយល់ដឹង  ប្រែខ្លួនក្លាយជាសសរទ្រូងដ៏រឹងមាំរបស់ប្រទេសជាតិទៅថ្ងៃអនាគត ។ ចៀសឱ្យឆ្ងាយពីគ្រឿងញៀន ល្បែងស៊ីសងគ្រប់ប្រភេទ ទង្វើអប្បាយមុខផ្សេងៗដែលសង្គមស្អប់ខ្ពើម និងចូលរួមគោរពច្បាប់ចរាចរណ៏ទាំងអស់គ្នា សូមឱ្យប្រជាពលរដ្ឋយើងធ្វើឱ្យបាន ដើម្បីនាំមកនូវសេចក្ដីសុខសេចក្ដីចម្រើនគ្រប់ៗគ្នា។

នៅក្នុងឱកាសនោះដែរឯកឧត្តមអភិបាលខេត្ត អ្នកដំណាងរាស្ត្រ និងមន្ត្រីអមដំណើរ បានចែកអំណោយជូនប្រជាពលរដ្ឋចំនួន៤០០គ្រួសារក្នុងមួយគ្រួសារៗទទួលបាន មានអង្ករចំនួន២៥គីឡូក្រាម, មី១កេស, ទឹកត្រី១យួរ, ត្រីខ១០កំប៉ុងនិងថវិកា២ម៉ឺនរៀលផងដែរ៕

ដោយ៖ បៃ ស៊ីថុន