AKPបន្ទាយមានជ័យថ្ងៃទី១៦ ខែមិថុនា ឆ្នាំ២០២៦– ឱកាសមាស និងពន្លឺនៃក្តីសង្ឃឹមថ្មី បានធ្វើដំណើរទៅដល់ទឹកដីនៃអតីតតំបន់សមរភូមិហើយ ខណៈដែលក្រុមការងារអន្តរក្រសួងថ្នាក់ជាតិ បានចាប់ដៃគ្នាចុះផ្ទាល់ដល់មូលដ្ឋាន ដើម្បីរៀបចំយុទ្ធសាស្ត្រកែប្រែវាសនា និងលើកកម្ពស់គុណភាពជីវិតបងប្អូនភៀសសឹកឱ្យមានភាពចិរភាព។

កាលពីថ្ងៃទី១៥ ខែមិថុនា ឆ្នាំ២០២៦ សហប្រធានទាំង ២រូប នៃក្រុមការងារត្រី-វិស័យ រួមមាន ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងឯកឧត្តម អាន ពេជ្រហត្ថដា រដ្ឋលេខាធិកាក្រសួងធនធានទឹក និងឧតុនិយម ព្រមទាំងឯកឧត្ដម ឃឹម ហ្វីណង់អនុរដ្ឋលេខាធិការ និងសមាជិកអចិន្រ្ដៃយ៍ បានដឹកនាំសមាជិកក្រុមការងារត្រី-វិស័យ និងក្រុមលេខាធិការដ្ឋានអន្តរក្រសួងទាំងបី (កសិកម្ម ធនធានទឹក និងអភិវឌ្ឍន៍ជនបទ) ចុះជួបពិភាក្សាផ្ទាល់ជាមួយថ្នាក់ដឹកនាំភូមិ-ឃុំ និងបងប្អូនភៀសសឹក ស្ថិតនៅភូមិរង់ចាំ (ភូមិស្លរក្រាម) ឃុំស្លរក្រាម ស្រុកស្វាយចេក ខេត្ដបន្ទាយមានជ័យ។

បេសកកម្មការងារនាពេលនេះ មិនមែនត្រឹមតែជាការសួរសុខទុក្ខធម្មតានោះទេ ប៉ុន្តែជាដំណើរចុះពិនិត្យ និងវាយតម្លៃទីតាំង ព្រមទាំងហេដ្ឋារចនាសម្ព័ន្ធជាក់ស្តែង ដើម្បីត្រៀមអនុវត្តអន្តរាគមន៍អន្តរវិស័យ «កសិកម្ម-ទឹក-ជនបទ»។ នេះជាយន្តការគន្លឹះក្នុងការដោះស្រាយបញ្ហាប្រឈមចម្បងៗ ក្នុងគោលបំណងធានាឱ្យបាននូវសន្តិសុខស្បៀង ធានាឱ្យបងប្អូនមានអាហារបរិភោគគ្រប់គ្រាន់ និងមានអាហារូបត្ថម្ភ។

និរន្តរភាពជីវភាព បង្កើតប្រភពចំណូលប្រចាំថ្ងៃ និងរយៈពេលវែង តាមរយៈការងារកសិកម្ម។ការផ្គត់ផ្គង់ទឹករៀបចំប្រព័ន្ធធារាសាស្ត្រសម្រាប់បម្រើឱ្យការដាំដុះ និងការរស់នៅ។«ការចងក្រង និងបង្កើតសហគមន៍កសិកម្មទំនើប "បុរី ៣០០០ ខ្នង" នឹងក្លាយជាឱកាសមាសបន្ថែមសម្រាប់បងប្អូនភៀសសឹក ក្នុងការបំពេញបន្ថែម និងពង្រឹងជីវភាពឱ្យកាន់តែធូរធារ»។

នៅក្នុងឱកាសនោះដែរ ឯកឧត្តមបណ្ឌិត ហ៊ាន វណ្ណហន បានគូសបញ្ជាក់ពីការយកចិត្តទុកដាក់ខ្ពស់របស់ប្រមុខ រាជរដ្ឋាភិបាលក៏ដូចឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទជាប្រធានក្រុមការងាររាជរដ្ខាភិបាលចុះមូលដ្ឋានខេត្តបន្ទាយមានជ័យ ដែលតែងតែបារម្ភ និងណែនាំឱ្យមានការគិតគូរហ្មត់ចត់ពីជីវភាពពលរដ្ឋ។ តាមរយៈការសម្របសម្រួលផ្ទាល់របស់ ឯកឧត្តម ឃឹម ហ្វីណង់ រួមជាមួយអាជ្ញាធរមូលដ្ឋាន និងមន្ត្រីជំនាញ ភាគីពាក់ព័ន្ធបានរួមគ្នារិះរកមធ្យោបាយចងក្រងបងប្អូនភៀសសឹកឱ្យចូលរួមក្នុងវិស័យកសិកម្មបែបឌីជីថល និងទំនើបកម្ម។

ការបង្កើត សហគមន៍កសិកម្មទំនើប «បុរី ៣០០០ ខ្នង» នឹងក្លាយជាខែលការពារ និងជាម៉ាស៊ីនសេដ្ឋកិច្ចថ្មីមួយ ជួយឱ្យបងប្អូនភៀសសឹកអាចផលិតកសិផលដែលមានទីផ្សារច្បាស់លាស់ កាត់បន្ថយហានិភ័យ និងទទួលបានប្រាក់ចំណេញខ្ពស់ ដែលជាជំហានដោះស្រាយភាពក្រីក្រប្រកបដោយភាពវៃឆ្លាត និងចិរភាព។

ការរួមដៃគ្នារវាងក្រសួងទាំងបី និងអាជ្ញាធរដែនដីនៅពេលនេះ បានស្តែងឱ្យឃើញពីស្មារតីសាមគ្គីភាព និងការប្តេជ្ញាចិត្តខ្ពស់របស់រាជរដ្ឋាភិបាល កម្ពុជា ក្នុងការធានាថា «មិនទុកឱ្យពលរដ្ឋណាម្នាក់រស់នៅដោយឯកោ និងគ្មានការយកចិត្តទុកដាក់នោះឡើយ» ខណៈដែលតំបន់ភូមិរង់ចាំ កំពុងត្រៀមខ្លួនផ្លាស់ប្តូរមុខមាត់ថ្មីពីតំបន់ខ្វះខាត ទៅជាតំបន់កសិកម្មគំរូនាពេលដ៏ខ្លីខាងមុខ៕

ដោយ៖ ឈុន សារ៉ាត