AKP ភ្នំពេញថ្ងៃទី១៦ ខែមិថុនា ឆ្នាំ ២០២៦–មូលនិធិអភិវឌ្ឍន៍ជំនាញ SDF នៃក្រសួង សេដ្ឋកិច្ច និងហិរញ្ញវត្ថុ និង ILO រួមគ្នាពង្រឹង និងពង្រីកការបណ្ដុះបណ្ដាលគ្រូបង្គោលក្នុងវិស័យដែលកំពុងងើបឡើង ដើម្បីបង្កើនមូលធនមនុស្សសំដៅបង្កើតឱកាសការងារ និងបង្កើនប្រាក់ចំណូល។

ក្រោយវគ្គបណ្ដុះបណ្ដាលគ្រូបង្គោលលើជំនាញ EV នៅប្រទេសចិនកាលពីឆ្នាំទៅមិញទទួលបានជោគជ័យ SDF អង្គការ អន្តរ ជាតិខាងការងារ (ILO) និងវិទ្យាស្ថានបច្ចេកទេសឧស្សាហកម្មប៉េកាំង (BITC) បានរៀបចំវគ្គបណ្តុះបណ្តាលគ្រូបង្គោលលើកទី២ ស្តីពី ជំនាញថែទាំយានយន្តអគ្គិសនីកម្រិតខ្ពស់ ដល់គ្រូបង្គោល ៣០ នាក់ នៅវិទ្យាស្ថានបច្ចេកទេសឧស្សាហកម្ម ចាប់ពីថ្ងៃទី១៥-១៧ ខែមិថុនា ឆ្នាំ២០២៦។

ទន្ទឹមនេះមូលនិធិអភិវឌ្ឍន៍ជំនាញ  SDF និង ILO បានចុះអនុស្សរណៈនៃការយោគយល់គ្នា (MOU) ក្នុងគោលបំណងរួមគ្នាដោះស្រាយ បញ្ហាខ្វះខាតគ្រូបង្គោលក្នុងស្រុក តាមរយៈការចាប់ដៃគូជាមួយគ្រឹះស្ថានបណ្ដុះបណ្ដាលនៅប្រទេសចិន ដើម្បីផ្តល់វគ្គបណ្ដុះបណ្ដាល ក្នុងវិស័យដែលកំពុងងើបឡើង និងមានសក្តានុពលខ្ពស់ដូចជា ការថែទាំរថយន្តអគ្គិសនីកម្រិតខ្ពស់, មនុស្សយន្តឧស្សាហកម្ម, សំណង់ឌីជីថល និងជាងអគ្គិសនី, និងការថែទាំយានយន្តទំនើបៗដែលដើរដោយថាមពលអគ្គិសនី ឬប្រភពថាមពលស្អាតផ្សេងទៀត។

ក្នុងឱកាសនេះដែរ ឯកឧត្តម គី សុខគីម នាយកប្រតិបត្តិ SDF បានគូសបញ្ជាក់ថា វគ្គបណ្តុះបណ្តាលជំនាញ EV គឺជាការវិនិយោគយុទ្ធសាស្ត្រ ដើម្បីបង្កើតការងារដែលមានជំនាញ និងប្រាក់ចំណូលខ្ពស់ ស្របតាមការផ្លាស់ប្តូរទៅរកវិស័យឌីជីថល និងបៃតង ដែលជាគន្លឺះក្នុងការបង្កើនភាពប្រកួតប្រជែងផ្នែកសេដ្ឋកិច្ចរបស់កម្ពុជា។ SDF នឹងបន្តធ្វើការយ៉ាងជិតស្និទ្ធជាមួយ ILO និងវិស័យឯកជន ដើម្បីធានាថាការបណ្តុះបណ្តាល ឆ្លើយតបនឹងតម្រូវការទីផ្សារការងារជាក់ស្តែង។

គួរបញ្ជាក់ថា វគ្គបណ្តុះបណ្តាលជំនាញ EV នេះ ដឹកនាំផ្ទាល់ដោយគ្រូជំនាញពី BITC និងមានការចូលរួមពីគ្រូបង្គោលមកពីវិស័យឯកជន ដូចជា រោងចក្រ-សហគ្រាសយានយន្ត វិទ្យាស្ថានបណ្តុះបណ្តាលបច្ចេកទេសរដ្ឋ-ឯកជន និងអង្គការនានា។ នេះ គឺជាការរួមចំណែកយ៉ាងសំខាន់មួយ ក្នុងការគាំទ្រដល់ប្រព័ន្ធអេកូឡូស៊ីជំនាញនៅកម្ពុជា ៕

ដោយ៖ ណយ នឿន (ប្រភព៖SDF)