AKP ភ្នំពេញ ថ្ងៃទី១២ ខែមិថុនា ឆ្នាំ២០២៦-- ឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការ បញ្ជាការដ្ឋានការពារអាកាស បានអញ្ជើញជាអធិបតីក្នុងពិធីបើកវគ្គហ្វឹកហ្វឺន បំប៉នជំនាញកាំភ្លើងការពារអាកាស និងព័ត៌មានវិទ្យា រដ្ឋបាលទូទៅ នៅទីបញ្ជាការបញ្ជាការដ្ឋានការពារអាកាសកងទ័ពជើងគោកបានប្រព្រឹត្តទៅនាថ្ងៃទី១២ ខែមិថុនា ឆ្នាំ២០២៦។ វគ្គហ្វឹកហ្វឺនរួមមានរយៈពេល៣ខែ ស្មើនឹង៩១ថ្ងៃ ថ្ងៃហ្វឹកហ្វឺនជាក់ស្ដែង៥៧ថ្ងៃ និងថ្ងៃឈប់សម្រាក៣៤ថ្ងៃ ចំនួនចូលរួម៨៦នាក់ ក្នុងនោះយោធាចារ្យ៩នាក់ សិក្ខាកាម៧៧នាក់ មានពីរមុខវិជ្ជា បំប៉នជំនាញកាំភ្លើងការពារអាកាស និងព័ត៌មានវិទ្យា រដ្ឋបាលទូទៅ។

ឯកឧត្តម ឧត្តមសេនីយ៍ទោ សុខ ប៉ាង បានលើកឡើងអំពីសភាពការណ៍ជាតិ និងអន្តរជាតិថ្មីៗ និងបានកោតសរសើរ ចំពោះគណៈកម្មការដឹកនាំការងារហ្វឹកហ្វឺន ដែលបានអនុវត្តន៍បទបញ្ជាផ្ទាល់មាត់របស់លោកបានយ៉ាងម៉ឺងម៉ាត់ បានចាត់តាំងធ្វើផែនការ និងដំណើរការរៀបចំពិធីបើកវគ្គហ្វឹកហ្វឺននាថ្ងៃនេះបានជោគជ័យ។ ឯកឧត្តមបានគូសបញ្ជាក់ថា យោងតាមសភាពការណ៍ប្រទេសជាតិចំពោះមុខនេះ ទោះមានឬគ្មានផែនការហ្វឹកហ្វឺនរបស់ថ្នាក់លើដាក់ចុះក៏ដោយ ក៏អង្គភាពត្រូវតែមានផែនការចាត់តាំងហ្វឹកហាត់ផ្ទៃក្នុង សំដៅបណ្ដុះបណ្ដាលពង្រឹងសមត្ថភាពដល់ នាយទាហាន នាយទាហានរង និងពលទាហាន ឱ្យក្លាយជាធនធានកងយោធពលខេមរៈភូមិន្ទ ប្រកបដោយវិជ្ជាជីវៈច្បាស់លាស់ មានសមត្ថភាពបំពេញ តួនាទីភារកិច្ចរបស់ខ្លួន ឆ្លើយតបដល់ការពង្រឹងខឿនការពារជាតិឱ្យបានរឹងមាំ តាមរយៈការបំផុសចលនាមហាជនឱ្យមានការសាមគ្គីឯកភាពជាតិជាធ្លុងមួយ ជួយឧបត្ថម្ភទាំងស្មារតី និងសម្ភារៈជ្រោងទង់ស្នេហាជាតិខ្ពស់ ដើម្បីបុព្វហេតុការពារអធិបតេយ្យបូរណភាពទឹកដី។

ឯកឧត្តម សុខ ប៉ាង បានផ្តាំផ្ញើដល់ សិក្ខាកាម គ្រូយោធាចារ្យ ត្រូវខិតខំឱ្យអស់ពីលទ្ធភាព យកចិត្តទុកដាក់ហ្វឹកហាត់រៀនសូត្រឱ្យបានជោគជ័យតាមផែនការកម្មវិធីដែលបានអនុម័តរួចហើយ អនុវត្តចែករំលែកបទពិសោន៍ល្អៗ ដល់បងប្អូនពេលវិលចូលអង្គភាពវិញ។ បន្តក្រើនរំលឹកណែនាំដល់យោធិនយើង ចំពោះអ្នកចេះច្រើនជួយបង្រៀនអ្នកចេះតិច អ្នកចេះតិចជួយបង្រៀនអ្នកមិនចេះសោះ ដោយឈរលើស្មារតីសាមគ្គីភាពទូលំទូលាយមិនរើសអើង រួមគ្នាចែករំលែកទាំងចំណេះដឹង និងចំណេះធ្វើ ដើម្បីបុព្វហេតុការពារជាតិមាតុភូមិ។ ជាចុងក្រោយ ឯកឧត្តម បានប្រសិទ្ធពរជ័យជូនអង្គពិធី និងប្រកាសឱ្យដំណើរការហ្វឹកហ្វឺនចាប់ពីថ្ងៃបើកវគ្គនេះតទៅ។

តំណាងសិក្ខាកាមឡើងប្ដេជ្ញាចិត្តខិតខំរៀនសូត្រហ្វឹកហាត់ឱ្យបានស្ទាត់ជំនាញតាមផែនការ ដើម្បីធានាគ្រប់គ្រងអនុវត្តការងារជំនាញឱ្យបានជោគជ័យ ប្ដេជ្ញាគោរពឱ្យបានម៉ឺងម៉ាត់តាមគោលនយោបាយយុទ្ធសាស្រ្តបញ្ចកោណ របស់រាជរដ្ឋាភិបាល នីតិកាលទី៧ នៃរដ្ឋសភា និងប្ដេជ្ញាចៀសឱ្យឆ្ងាយពីការជួញដូរប្រើប្រាស់គ្រឿងញៀន៕

ដោយ សំ សាម៉ន (ប្រភព៖ កងទ័ពជើងគោកនៃកងយោធពលខេមរភូមិន្ទ)