AKP បន្ទាយមានជ័យ ថៃ្ងទី១២ ខែមិថុនា ឆ្នាំ២០២៦--ក្នុងកិច្ចប្រឹងប្រែងដើម្បីលើកកម្ពស់ជីវភាព និងធានាបាននូវសុវត្ថិភាពសង្គមជូនប្រជាពលរដ្ឋដែលរងផលប៉ះពាល់ រដ្ឋបាលខេត្តបន្ទាយមានជ័យ បានបើកកិច្ចប្រជុំពិភាក្សាលើការត្រៀមលក្ខណៈអនុវត្តន៍ «កម្មវិធីជំនួយសង្គមពិសេសបន្ថែម» ជូនគ្រួសារភៀសសឹកដែលមិនទាន់អាចវិលត្រឡប់ទៅលំនៅឋានដើមវិញបាន។

កិច្ចប្រជុំនេះត្រូវបានធ្វើឡើងកាលពីព្រឹកថ្ងៃទី១២ ខែមិថុនា ឆ្នាំ២០២៦ ក្រោមអធិបតីភាព លោក ឃ្លោក នួយ អភិបាលរងខេត្ត តំណាងដ៏ខ្ពង់ខ្ពស់របស់ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ ដោយមានការចូលរួមពីតំណាងក្រុមប្រឹក្សាជាតិគាំពារសង្គម អភិបាលរងស្រុកពាក់ព័ន្ធ និងមន្ត្រីជំនាញជាច្រើនរូប។

ក្នុងឱកាសនោះ លោក ឃ្លោក នួយ បានគូសបញ្ជាក់យ៉ាងច្បាស់ពីការយកចិត្តទុកដាក់ដ៏ខ្ពង់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ លោកបានលើកឡើងថា ប្រមុខរាជរដ្ឋាភិបាលមិនដែលបោះបង់ចោលពលរដ្ឋក្នុងគ្រាដ៏លំបាកនោះឡើយ ដោយបានប្រគល់ភារកិច្ចផ្ទាល់ដល់ក្រុមការងារចំពោះកិច្ច ដើម្បីរៀបចំដីធ្លី និងសាងសង់លំនៅឋានជូនពួកគាត់ឱ្យមានជីវភាពប្រសើរជាងមុន។ បច្ចុប្បន្ន គ្រួសារភៀសសឹកដែលកំពុងស្នាក់នៅក្នុងមណ្ឌលសុវត្ថិភាពបណ្តោះអាសន្នមានចំនួន ៣ ៣១៨ គ្រួសារស្មើនឹងមនុស្សសរុប ១១ ២១៧ នាក់ (ស្រី ៥ ៦៦៣ នាក់ និងកុមារ ៣ ៨៣៩ នាក់)។

លោកអភិបាលរងខេត្ត បានជម្រាបជូនពីវឌ្ឍនភាពនៃការងារសាងសង់នៅឯ «មណ្ឌលសមាគមអតីតយុទ្ធជនភូមិរងចាំ» ស្ថិតក្នុងឃុំស្លក្រាម ស្រុកស្វាយចេកថា ល្បឿននៃការសាងសង់គិតចាប់ពីថ្ងៃទី១៤ ខែកុម្ភៈ ដល់ដំណាច់ខែមេសា ឆ្នាំ២០២៦ និងបន្តរហូតមកដល់បច្ចុប្បន្ន ក្រោមការចង្អុលបង្ហាញផ្ទាល់ពី ឯកឧត្តមទេសរដ្ឋមន្ត្រី គន់ គីម ផ្ទះចំនួន ២ ៨០៥ ខ្នង ត្រូវបានសាងសង់រួចរាល់។ ការរៀបចំសហគមន៍គំរូ ទីតាំងលំនៅឋានថ្មីនេះត្រូវបានរៀបចំឡើងជាប្រព័ន្ធភូមិ ដោយមានស្នាក់ការភូមិគ្រប់គ្រាន់សម្រាប់ភូមិទាំង៦។ និរន្តរភាពជីវភាព ក្រៅពីលំនៅឋាន រដ្ឋបាលខេត្តក៏បានរៀបចំដីសម្រាប់ធ្វើកសិកម្មជូនប្រជាពលរដ្ឋ ដោយមានការសហការសម្របសម្រួលយ៉ាងជិតស្និទ្ធជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីធានាថាពលរដ្ឋមានរបរចិញ្ចឹមជីវិតប្រកបដោយចីរភាព។

កិច្ចប្រជុំនេះមិនត្រឹមតែបង្ហាញពីការត្រៀមខ្លួនអនុវត្តន៍កម្មវិធីជំនួយសង្គមប៉ុណ្ណោះទេ ប៉ុន្តែថែមទាំងជាការបញ្ជាក់សាជាថ្មីថា រាជរដ្ឋាភិបាល និងអាជ្ញាធរខេត្តបន្ទាយមានជ័យ នឹងបន្តឈរជាមួយប្រជាពលរដ្ឋរហូតដល់ពួកគាត់អាចចាប់ផ្តើមជីវិតថ្មីដោយភាពកក់ក្តៅ និងមានស្ថិរភាព៕

ដោយឈុនសារ៉ាត