AKP កំពង់ធំ ថ្ងៃទី១២ ខែមិថុនា ឆ្នាំ២០២៦-- លោក សួគ៌ ប៊ុនធង អភិបាលរងស្រុកស្ទោង បានលើកឡើងថា ការដាក់បំពាក់អំពូលសូឡាគឺដើម្បីលើកកម្ពស់សោភ័ណភាព បរិស្ថាន សុវត្ថិភាព និងអភិវឌ្ឍបែបបៃតង។ លោកអភិបាលរងស្រុកស្ទោងបានលើកឡើងនេះក្នុងពិធីដេញថ្លៃ គម្រោងមូលនិធិឃុំព្រះដំរី ដើម្បីបំពាក់សូឡាបំភ្លឺផ្លូវចំនួន១១៥ដើម នៅឃុំព្រះដំរី ស្រុកស្ទោង ខេត្តកំពង់ធំ នាព្រឹកថ្ងៃទី១២ ខែមិថុនា ឆ្នាំ២០២៦។

លោក សួគ៌ ប៊ុនធង បញ្ជាក់ថា គម្រោងមួយនេះមានសារៈសំខាន់ក្នុងការកែលម្អជីវភាពរស់នៅ និងសុវត្ថិភាពរបស់បងប្អូនប្រជាពលរដ្ឋ ដែលជាការឆ្លើយតបតាមតម្រូវការពិតប្រាកដរបស់ប្រជាពលរដ្ឋ នៅក្នុងមូលដ្ឋាន តាមរយៈយន្តការប្រជាធិបតេយ្យនិងការចូលរួមយ៉ាងសកម្មក្នុងការបំពាក់ភ្លើងបំភ្លឺផ្លូវដោយប្រើថាមពលព្រះអាទិត្យ មិនត្រឹមតែជួយបំភ្លឺផ្លូវនៅពេលយប់ប៉ុណ្ណោះទេ ប៉ុន្តែថែមទាំងជួយកាត់បន្ថយអំពើអសន្តិសុខ គ្រោះថ្នាក់ចរាចរណ៍និងលើកកម្ពស់សោភ័ណភាពមូលដ្ឋានផងដែរ។ គម្រោងសូឡាគឺសមស្របជាមួយនឹងគោលនយោបាយអភិវឌ្ឍបៃតង ដែលផ្តោតលើការប្រើប្រាស់ថាមពលស្អាត កាត់បន្ថយការប្រើប្រាស់ថាមពលបែបប្រពៃណីនិងការពារបរិស្ថានក្នុងរយៈពេលវែង។

លើសពីនេះក្រុមហ៊នដែលបានដេញថ្លៃឈ្នះត្រូវគោរពតាមនីតិវិធី បទប្បញ្ញត្តិ និងលក្ខខណ្ឌដែលបានកំណត់ ឱ្យបានត្រឹមត្រូវ តម្លាភាព និងយុត្តិធម៌ ហើយគណៈកម្មការដេញថ្លៃ បំពេញតួនាទីដោយស្មោះត្រង់ យកចិត្តទុកដាក់ និងធានាបាននូវគុណភាព តម្លាភាពក្នុងដំណើរការនិងអនុវត្តគម្រោងឱ្យបានតាមស្តង់ដាបញ្ចប់តាមកាលកំណត់ ធានាគុណភាពប្រើប្រាស់យូរអង្វែង។លើសពីនេះអាជ្ញាធរមូលដ្ឋាន ប្រជាពលរដ្ឋចូលរួមតាមដាន និងថែរក្សាសមិទ្ធផលរួមនេះ ឱ្យបានល្អប្រសើរ៕

ដោយ ស៊ុម វណ្ណា