AKP ភ្នំពេញ ថ្ងៃទី១១ ខែមិថុនា ឆ្នាំ២០២៦--លោក ខូវ មាស អគ្គលេខាធិការរងអាជ្ញាធរទន្លេសាប កាលពីថ្ងៃទី១០ ខែមិថុនា ឆ្នាំ២០២៦ បានដឹកនាំកិច្ចប្រជុំពិភាក្សា ស្តីពីការតាមដានត្រួតពិនិត្យការកាប់ទន្រ្ទានព្រៃលិចទឹក និងការបន្តអាស្រ័យផលក្នុងតំបន់៣ ស្ថិតក្នុងភូមិសាស្ត្រស្រុកឯកភ្នំ ខេត្តបាត់ដំបង។

លោក អគ្គលេខាធិការរងអាជ្ញាធរទន្លេសាប ខូវ មាស បានបញ្ជាក់ថា កិច្ចប្រជុំមានគោលបំណងចំនួនបួនគឺ ទី១.ជំរុញបន្តពង្រឹងការត្រួតពិនិត្យតាមដានជាប្រចាំ តាមរយៈការចុះពិនិត្យទីតាំងជាក់ស្តែងក្នុងតំបន់៣ ដោយផ្តោតលើសកម្មភាពនៃការកាប់ទន្ទ្រាន ការកាន់កាប់ និងប្រើប្រាស់ដីព្រៃលិចទឹកតំបន់៣ដោយខុសច្បាប់។ ទី.២ ជំរុញវិធានការផ្លូវច្បាប់ក្នុងគោលបំណងទប់ស្កាត់ បង្ការ និងបង្ក្រាបបទល្មើសឱ្យបានទាន់ពេលវេលា សំដៅការពារ និងអភិរក្សព្រៃលិចទឹក ព្រមទាំងធានាបាននូវការគ្រប់គ្រងធនធានធម្មជាតិប្រកបដោយប្រសិទ្ធភាព និងចីរភាព។  ទី.៣ លើកទឹកចិត្តដល់អាជ្ញាធរមូលដ្ឋានបន្តផ្សព្វផ្សាយ អប់រំ អំពីអត្ថប្រយោជន៍តំបន់៣ ដល់សហគមន៍ និងប្រជាពលរដ្ឋ ក្នុងការការពារ និងចូលរួមអភិរក្សព្រៃលិចទឹក ដែលជាជម្រក និងតំបន់ត្រីពងកូន និងទី៤  ជុំរុញការអនុវត្តវិធានការអភិរក្ស និងដាំស្តារព្រៃលិចទឹកឡើងវិញដែលរងការខូចខាត ដើម្បីការពារប្រព័ន្ធអេកូឡូស៊ី ធនធានជលផល និងជីវៈចម្រុះគ្រប់ប្រភេទនៅតំបន់បឹងទន្លេសាប ។

ក្នុងកិច្ចប្ជុំនោះមានការចូលរួមពី អភិបាលរងស្រុកឯកភ្នំ លោកប្រធានភូមិបាលស្រុក លោកនាយករដ្ឋបាលសាលាស្រុក លោកមេបញ្ជារងកងរាជអាវុធហត្ថស្រុក លោកអធិការរងស្រុក នាយផ្នែកជលផល លោក លោកស្រីមេឃុំ ក្រុមប្រឹក្សាឃុំ លោកមេភូមិ និងប្រធានសហគមន៍ ៕

ដោយ៖ ណយ នឿន (ប្រភព៖អាជ្ញាធរទន្លេសាប)