AKP កណ្ដាល ថ្ងៃទី០៦ ខែមិថុនា ឆ្នាំ២០២៦ -- លោក ណុប ដារ៉ា អភិបាលរងខេត្តកណ្ដាល នៅថ្ងៃទី០៦ ខែមិថុនា ឆ្នាំ២០២៦ បានអញ្ជើញចូលរួមក្នុងពិធីបញ្ចុះបឋមសិលាកសាង រតនមន្ទីរពុទ្ធមណ្ឌលវិបស្សនាឧដុង្គ ស្ថិតនៅក្នុងបរិវេណពុទ្ធមណ្ឌលវិបស្សនាធុរៈ ស្ថិតនៅក្នុងភូមិភ្នំ ឃុំផ្សារដែក ស្រុកពញាឮ ក្រោមអធិបតីភាពដ៏ខ្ពង់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

គួរបញ្ជាក់ថា រតនមន្ទីរពុទ្ធមណ្ឌលវិបស្សនាឧដុង្គត្រូវបានរៀបចំកសាងឡើងក្នុងគោលបំណងធ្វើជាសារមន្ទីររក្សាទុក និងតាំងបង្ហាញសម្បត្តិវប្បធម៌ព្រះពុទ្ធសាសនា រួមមានព្រះពុទ្ធបដិមា ចម្លាក់ព្រះពុទ្ធបដិមាសិល្បៈខ្មែរគ្រប់សម័យកាល ព្រះពុទ្ធបាទ ព្រះបរមរូបសម្ដេចព្រះមហាសង្ឃរាជ សម្ដេចព្រះសង្ឃនាយក ព្រមទាំងស្នាដៃ និងសមិទ្ធផលរបស់អ្នកប្រាជ្ញពុទ្ធសាសនាខ្មែរ ទាំងព្រះសង្ឃ និងគ្រហស្ថ។ ជាមួយគ្នានេះ សារមន្ទីរក៏នឹងដាក់តាំងបង្ហាញវត្ថុសក្ការៈ គ្រឿងបរិក្ខារព្រះពុទ្ធសាសនា គ្រឿងយសសមណសក្តិ គម្ពីរសាស្ត្រា ក្បួនច្បាប់ខ្មែរ និងឯកសារពាក់ព័ន្ធនឹងព្រះពុទ្ធសាសនាជាច្រើន ដែលជាធម្មមរតកដ៏មានតម្លៃរបស់ជាតិ។

ក្រៅពីតួនាទីជាមជ្ឈមណ្ឌលអភិរក្សបេតិកភណ្ឌព្រះពុទ្ធសាសនា សារមន្ទីរនេះក៏ត្រូវបានរចនាឡើងតាមស្ថាបត្យកម្មបែបខ្មែរ ដើម្បីឆ្លុះបញ្ចាំងពីភាពរុងរឿងនៃសិល្បៈ និងវប្បធម៌ខ្មែរសម័យឧដុង្គ អនុញ្ញាតឱ្យប្រជាពលរដ្ឋ ជាពិសេសយុវជនជំនាន់ក្រោយ បានសិក្សាស្វែងយល់ពីប្រវត្តិសាស្ត្រ និងអត្តសញ្ញាណជាតិខ្មែរ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)