AKP ភ្នំពេញ ទី០៤ ខែមិថុនា ឆ្នាំ២០២៦--កិច្ចប្រជុំដោះស្រាយផលប៉ះពាល់គម្រោងអនុវត្តប្រព័ន្ធធារាសាស្ដ្រ ក្បាលហុង ស្ថិតនៅក្នុងសង្កាត់ស្វាយអាត់ ក្រុងពោធិ៍សាត់ខេត្តពោធិ៍សាត់ ដែលដឹកនាំដោយ លោកជំទាវ វ៉ាន់ ចាន់ថូ អនុរដ្ឋលេខាធិការក្រសួងធនធានទឹក និងឧតុនិយមនិងជានាយកគម្រោងគ្រប់គ្រងធនធានទឹកដោយវិធានការចម្រុះ (IWRM) ដោយមានការចូលរួមពីមន្រ្តីបច្ចេកទេសជាតិ និង ប្រជាពលរដ្ឋដែលមានការប៉ះពាល់ដីអាស្រ័យផលក្នុងគម្រោង នាថ្ងៃព្រហស្បតិ៍ ទី ០៤ ខែមិថុនា ឆ្នាំ២០២៦នេះ។

លោកជំទាវអនុរដ្ឋលេខាធិការបានបញ្ជាក់ថា បន្ទាប់ពីកិច្ចប្រជុំនេះយើង និងចុះពិនិត្យជួបផ្ទាល់ជាក់ស្តែងជាមួយបងប្អូនប្រជាពលរដ្ឋ ក្នុងការពន្លឿនកិច្ចការងារដោះស្រាយផលប៉ះពាល់ឱ្យបានច្បាស់លាស់ មុននឹងឈានដល់ការចាប់ផ្ដើមដំណើរការសាងសង់នាពេលខាងមុខ។

លោកជំទាវក៏បានផ្តល់អនុសាសន៍ណែនាំដល់ក្រុមការងារបច្ចេកទេស និងទីប្រឹក្សាជាតិ-អន្តរជាតិឱ្យបន្តពន្លឿនការងារសិក្សា និងដោះស្រាយផលប៉ះពាល់ជូនបងប្អូនក្នុងគម្រោង រាល់បញ្ហាប្រឈមនានាឱ្យបានទាន់ពេលវេលា ដើម្បីធានាឱ្យការអនុវត្តន៍គម្រោងសម្រេចបានជោគជ័យតាមគោលដៅ និងផែនការដែលបានកំណត់ទុក៕

ដោយ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)