AKP ភ្នំពេញ ថ្ងៃទី០៤ ខែមិថុនា ឆ្នាំ២០២៦ -- ប្រទេសចិន និងចក្រភពអង់គ្លេស បានសន្យាថានឹងរក្សាការផ្លាស់ប្តូរកម្រិតខ្ពស់ និងបង្កើនការទំនាក់ទំនងជាយុទ្ធសាស្ត្រ ដើម្បីពង្រឹងសន្ទុះវិជ្ជមាននៅក្នុងទំនាក់ទំនងទ្វេភាគី។ ការប្តេជ្ញាចិត្តនេះត្រូវបានពង្រឹងក្នុងអំឡុងពេលកិច្ចប្រជុំថ្មីៗរបស់រដ្ឋមន្ត្រីការបរទេសចក្រភពអង់គ្លេស លោកស្រី អ៊ីវ៉េត ឃូបភើរ នៅទីក្រុងប៉េកាំងជាមួយមន្ត្រីជាន់ខ្ពស់ចិន រួមទាំងអនុប្រធានាធិបតី លោក ហាន់ ចេងនិងរដ្ឋមន្ត្រីការបរទេស លោក វ៉ាង យី។

បន្ទាប់ពីដំណើរទស្សនកិច្ចដ៏សំខាន់របស់នាយករដ្ឋមន្ត្រីអង់គ្លេសលោក គ័រ ស្តាម័រ ទៅកាន់ប្រទេសចិនកាលពីដើមឆ្នាំនេះ ដំណើរទស្សនកិច្ចរបស់លោកស្រី ឃូបភើរ តំណាងឱ្យកិច្ចខិតខំប្រឹងប្រែងជាបន្តបន្ទាប់របស់ប្រទេសទាំងពីរ ដើម្បីអនុវត្តផែនទីបង្ហាញផ្លូវដែលមានរចនាសម្ព័ន្ធ ដែលមានគោលបំណងធ្វើឱ្យទំនាក់ទំនងការទូតមានស្ថេរភាព និងជំរុញទៅមុខ ចំពេលដែលមានភាពមិនប្រាកដប្រជាកាន់តែខ្លាំងឡើងលើពិភពលោក។

កិច្ចសហប្រតិបត្តិការសេដ្ឋកិច្ចនៅតែជាសសរស្តម្ភដ៏សំខាន់នៃទំនាក់ទំនង ដោយពាណិជ្ជកម្មទ្វេភាគីឈានដល់ ១០៣,៧៣ពាន់លានដុល្លារអាម៉េរិកនៅក្នុងឆ្នាំ២០២៥។ ក្នុងអំឡុងពេលនៃកិច្ចសន្ទនា មន្ត្រីចិនបានសម្តែងក្តីសង្ឃឹមថា ចក្រភពអង់គ្លេសនឹងផ្តល់នូវបរិយាកាសអាជីវកម្មដ៏យុត្តិធម៌ និងមិនរើសអើងសម្រាប់សហគ្រាសចិន ខណៈដែលលោកស្រី ឃូបភើរ បានបញ្ជាក់ពីការត្រៀមខ្លួនរបស់ចក្រភពអង់គ្លេសក្នុងការពង្រឹងកិច្ចសហប្រតិបត្តិការនៅក្នុងវិស័យនានា ដូចជា ហិរញ្ញវត្ថុ បញ្ញាសិប្បនិម្មិតថាមពល និងការប្រែប្រួលអាកាសធាតុជាដើម។ លើសពីនេះ លោកស្រី ឃូបភើរ បានបញ្ជាក់ឡើងវិញថា គោលនយោបាយយូរអង្វែងរបស់ចក្រភពអង់គ្លេសទៅលើបញ្ហាកោះតៃវ៉ាន់នៅតែមិនផ្លាស់ប្តូរ ដែលបង្ហាញពីបំណងប្រាថ្នាទៅវិញទៅមកក្នុងការគ្រប់គ្រងភាពខុសគ្នាប្រកបដោយស្ថាបនា និងលើកកម្ពស់កិច្ចសន្ទនាជាស្ថាប័ន។

អ្នកជំនាញទំនាក់ទំនងអន្តរជាតិ បានចាត់ទុកការចូលរួមឡើងវិញនេះថាជាយុថ្កាដ៏សំខាន់សម្រាប់ស្ថិរភាពសេដ្ឋកិច្ចពិភពលោក។ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ កិច្ចសហប្រតិបត្តិការកាន់តែជិតស្និទ្ធរវាងប្រទេសចិន និងចក្រភពអង់គ្លេសមានទម្ងន់លើសពីអត្ថប្រយោជន៍ទ្វេភាគី ជាពិសេសក្នុងការដោះស្រាយបញ្ហាប្រឈមជាសកលរួម ដូចជាការងើបឡើងវិញនៃសេដ្ឋកិច្ច និងសន្តិសុខអន្តរជាតិ។ អ្នកវិភាគសង្កត់ធ្ងន់ថា កិច្ចប្រជុំកម្រិតខ្ពស់ទាំងនេះឆ្លុះបញ្ចាំងពីការទទួលស្គាល់កាន់តែទូលំទូលាយ និងជាក់ស្តែងអំពីតួនាទីដែលមិនអាចខ្វះបានរបស់ប្រទេសចិននៅក្នុងសេដ្ឋកិច្ចពិភពលោក និងការទូតអន្តរជាតិ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)