AKP ភ្នំពេញ ថ្ងៃទី០៣ ខែមិថុនា ឆ្នាំ២០២៦--

ក្រុមកីឡាការិនីបាល់បោះអង្គុយជនពិការកម្ពុជាបានយកឈ្នះ២ប្រកួតនៅវគ្គជម្រុះក្នុងពូល ដោយឈ្នះម្ចាស់ផ្ទះ ក្រុមកីឡាការិនីម៉ាឡេស៊ី ៣-០ និងបន្តឈ្នះក្រុមកីឡាការិនីឥណ្ឌា ៣-០ ខណៈក្រុមបុរសកម្ពុជា បានយកឈ្នះក្រុមបុរសឥណ្ឌា ៣-០ ដូចគ្នា នៅក្នុងការប្រកួតកីឡាបាល់បោះជនពិការជើងឯកអាស៊ី (2nd Asian Para Throwball championship 2026) លើកទី២ នៅប្រទេសម៉ាឡេស៊ី នៅថ្ងៃទី០៣ ខែមិថុនា ឆ្នាំ២០២៦។

នេះបើតាមការគូសបញ្ជាក់របស់លោកជំទាវ សុង សុខលាភ អគ្គលេខាធិការរង គណៈកម្មាធិការជាតិប៉ារ៉ាឡាំពិកកម្ពុជា ប្រាប់ទីភ្នាក់ងារសារព័ត៌មានកម្ពុជា AKP នៅវេលាម៉ោង ៩យប់ថ្ងៃទី០៣ ខែមិថុនា ឆ្នាំ២០២៦ពីប្រទេសម៉ាឡេស៊ី តាមរយៈសារអេឡិចត្រូនិក។

លោកជំទាវ សុង សុខលាភ បានបង្ហាញលទ្ធផលបច្ចេកទេសមកថា នៅក្នុងប្រកួតវគ្គជម្រុះក្នុងពូលនេះ គឺក្រុមនារីកម្ពុជាបានយកឈ្នះក្រុមម្ចាស់ផ្ទះ ម៉ាឡេស៊ី ដោយលទ្ធផល ៣-០ ក្នុងពិន្ទុ ២១-១៨, ២១-៩ និង២១ទល់១១។ ក្រុមនារីកម្ពុជាបានបន្តយកឈ្នះក្រុមនារីឥណ្ឌា នៅប្រកួតទី២ ដោយបានយកឈ្នះដោយលទ្ធផល ៣-០ ក្នុងពិន្ទុ ២១-៣, ២១-៥ និង២១-១២។ ចំណែកឯក្រុមជនពិការកម្ពុជាផ្នែកបុរស បានយកឈ្នះក្រុមឥណ្ឌា ក្នុងប្រកួតដំបូង ដោយលទ្ធផល ៣-០ ក្នុងពិន្ទុ ២១-៣, ២១-២ និង២១-២។

នេះជាលទ្ធផលដ៏ល្អ នៅក្នុងវគ្គជម្រុះប្រចាំពូល សម្រាប់ក្រុមបាល់បោះអង្គុយជនពិការកម្ពុជា ទាំងផ្នែកបុរស និងក្រុមនារី ដែលជាចូលរួមប្រកួតការពារម្ចាស់មេដាយមាសទាំងពីរវិញ្ញាសា ដែលធ្លាប់ដណ្តើមបាន កាលពីប្រកួតជើងឯកអាស៊ី លើកទី១ ដែលព្រះរាជាណាចក្រកម្ពុជាទទួលរៀបចំធ្វើម្ចាស់ផ្ទះ កាលពីខែមីនា ឆ្នាំ២០២៥កន្លងទៅ។

គួរបញ្ជាក់ថា ការប្រកួតកីឡាបាល់បោះអង្គុយជនពិការ ជើងឯកអាស៊ីលើកទី២ ឆ្នាំ២០២៦ (2nd Asian Para Throwball Championship 2026) នៅប្រទេសម៉ាឡេស៊ីមាន៨ប្រទេសចូលរួម ដោយវិញ្ញាសាក្រុមបុរសមាន៨ប្រទេសចូលរូម ក្នុងនោះពូល A មានក្រុមកម្ពុជា ឥណ្ឌា បង់ក្លាដែស និងប៊ូតង់ ខណៈផ្នែកនារីមាន៦ប្រទេស ក្នុងនោះក្រុមកម្ពុជា ស្ថិតនៅក្នុងពូលA ជាមួយក្រុមម្ចាស់ផ្ទះម៉ាឡេស៊ី និងប៊ូតង់។ ប្រតិភូគ្រូបង្វឹក អត្តពលិកពិការកម្ពុជាដឹកនាំដោយឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា៕

ដោយ ហេង ណាលីន (រូបភាព៖ ប្រតិភូកីឡាជនពិការកម្ពុជា)