AKP កំពង់ធំ ថ្ងៃទី២៩ ខែឧសភា ឆ្នាំ ២០២៦--ឧត្តមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍ នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ នាព្រឹកថ្ងៃទី២៩ ខែឧសភា ឆ្នាំ២០២៦នេះបានដឹកនាំសហការី រួមជាមួយអាជ្ញាធរដែនដី សមត្ថកិច្ចជំនាញពាក់ព័ន្ធ ផ្សព្វផ្សាយសេចក្តីជូនដំណឹង ស្ដីពីរដូវបិទនេសាទ ឆ្នាំ២០២៦ ជូនដល់កងកម្លាំងចម្រុះ និងអាជ្ញាធរដែនដី ព្រមទាំងប្រគល់ប្រេងឥន្ធនៈ ស្បៀងអាហារ គ្រឿងឧបភោគបរិភោគ ជូនដល់កងកម្លាំង នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលកំពុងប្រចាំការ ការពារ ទប់ស្កាត់ និងបង្ក្រាបបទល្មើសនេសាទ ប្រចាំទីបញ្ជាការស្រាលនៅឃុំពាមបាង ស្រុកស្ទោង និងទីបញ្ជាការស្រាលប្រចាំការនៅឃុំផាត់សណ្ដាយ ស្រុកកំពង់ស្វាយ។ ពិធីនេះប្រព្រឹត្តទៅនៅកោះក្របីតំបន់អភិរក្សអតីតឡូលេខ២ ស្ទួន នៅឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។

លោកអនុសេនីយ៍ឯក លុយ សុភាព នាយទាហាន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ប្រធានក្រុមប្រចាំការនៅទីបញ្ជាការស្រាល ឃុំពាមបាង និងលោកអនុសេនីយ៍ឯក ហែម ថន ប្រធានក្រុមទីបញ្ជាការស្រាល ប្រចាំការនៅឃុំផាត់សណ្ដាយនិងលោក ឡេង សុខ ប្រធានក្រុមប្រឹក្សាឃុំផាត់សណ្តាយបានឡើងរាយការណ៍អំពីសភាពការណ៍ទូទៅ និងលទ្ធផលស្តីពីការការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ក្នុងភូមិសាស្ត្រទទួលខុសត្រូវ រយៈពេលកន្លងទៅ ជាលទ្ធផលបទល្មើសនេសាទក្នុងតំបន់បឹងទន្លេសាប ក្នុងឃុំពាមបាង និងឃុំផាត់សណ្តាយ មានការថយចុះ ពី ៧០% ទៅ ៨០% ព្រមទាំងបានគូសបញ្ជាក់អំពីបញ្ហាប្រឈមមួយចំនួនដែលត្រូវធ្វើការដោះស្រាយ ។

លោក ជិន ស៊ីថា នាយខ័ណ្ឌរដ្ឋបាលជលផល ខេត្តកំពង់ធំ បានឡើងអានសេចក្តី ជូនដំណឹងស្ដីពីរដូវបិទនេសាទឆ្នាំ ២០២៦ ដែលនឹងត្រូវចាប់ផ្ដើមអនុវត្តន៍ពីថ្ងៃទី០១ ខែកក្កដាដល់ថ្ងៃទី ៣០ ខែកញ្ញា ឆ្នាំ ២០២៦ រួមមាន៖ ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្តរមានជ័យ សៀមរាប កំពង់ធំ ព្រះវិហារ រតនគិរី មណ្ឌលគិរី ក្រចេះ ត្បូងឃ្មុំ កំពង់ចាម និងមួយផ្នែកនៃរាជធានីភ្នំពេញ និងខេត្តកណ្ដាល ដែលស្ថិតនៅខាងជើងខ្សែស្របទន្លេចតុមុខ ។ ជាមួយនេះដែរ លោក ជិន ស៊ីថា ក៍បានបញ្ជាក់បន្ថែមពីឧបករណ៍នេសាទ ដែលប្រជានេសាទអាចនេសាទបានស្របច្បាប់ មានចំនួន ៤៩ មុខ ក្នុងរដូវបិទនេសាទនេះផងដែរ ។

ឧត្តមសេនីយ៍ទោ សោម ស៊ុន បានថ្លែងអំណរគុណ ចំពោះកងកម្លាំងចម្រុះទាំងអស់ រួមជាមួយអាជ្ញាធរដែនដី និងប្រជាពលរដ្ឋ ដែលបានរួមគ្នាក្នុងការការពារធនធានមច្ឆជាតិ ដោយបានសហការជាមួយកងកម្លាំងសម្រុះក្នុងការផ្ដល់ព័ត៌មាននិងចូលរួមបង្ក្រាបបទល្មើសនេសាទខុសច្បាប់ ក្នុងរយៈពេលកន្លងទៅទទួលបានលទ្ធផលល្អប្រសើរ ធ្វើឱ្យទិន្នផលត្រីបានសម្បូរឡើងវិញ ដែលមជ្ឈដ្ឋានទូទៅមានការកោតសរសើរដល់កងទ័ព ដែលបានរួមចំណែកសហការជាមួយស្ថាប័នពាក់ព័ន្ធ ក្នុងការបង្ក្រាបបទល្មើសនេសាទខុសច្បាប់ ទទួលបានជោគជ័យគួរជាទីមោទនៈ ។

ឧត្តមសេនីយ៍ទោ សោម ស៊ុន បានប្រគល់ភារកិច្ចដល់អាជ្ញាធរដែនដីស្ថាប័នជំនាញពាក់ព័ន្ធ ពិសេសទំនាញជលផល សូមមេត្តារួមគ្នាជាមួយកងកម្លាំងចម្រុះ បន្តការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ឲ្យទទួលបានជោគជ័យបន្ថែមទៀត ពិសេសបន្តការពារឱ្យបានឡូត៍អភិរក្សពូជត្រី ដើម្បីរក្សាទុកឱ្យត្រីពងកូននៅក្នុងរដូវវស្សាខាងមុខនេះ ។ ជាមួយគ្នានោះដែរ ត្រូវរួមគ្នាក្នុងការអនុវត្តន៍ឱ្យបានជោគជ័យនូវសេចក្តីជូនដំណឹងស្ដីពីរដូវបិទការនេសាទឆ្នាំ ២០២៦ ឱ្យមានប្រសិទ្ធភាព ។

នៅក្នុងឱកាសនោះដែរ ឧត្តមសេនីយ៍ទោ សោម ស៊ុន បាននាំយក នូវប្រេងសាំងចំនួន ៧០០លីត្រ អង្ករចំនួន ២៥០ គីឡូក្រាម មីជាតិចំនួន ១០កេស និងគ្រឿងឧបភោគបរិភោគមួយចំនួនទៀត ដែលជាអំណោយរបស់ឯកឧត្តម វង្សី វិស្សុត ឧបនាយករដ្ឋមន្ត្រី រដ្ឋមន្ត្រីប្រចាំការទីស្ដីការគណៈរដ្ឋមន្ត្រី និងជាប្រធានក្រុមការងាររបស់រាជរដ្ឋាភិបាលចុះមូលដ្ឋានខេត្តកំពង់ធំ ប្រគល់ជូនកងកម្លាំងចម្រុះ ដើម្បីបន្តសកម្មភាពការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ដោយគ្មានការដកថយឡើយ៕

ដោយ ស៊ុម វណ្ណា