AKP កំពង់ធំ ថ្ងៃទី២៩ ខែឧសភា ឆ្នាំ២០២៦--លោកឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំបានអញ្ជើញដឹកនាំកិច្ចប្រជុំផ្សព្វផ្សាយបទបញ្ជារបស់ឯកឧត្ដម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេសដល់នាយទាហាន នាយទាហានរងនិងពលទាហាននៃកងរាជអាវុធហត្ថខេត្តកំពង់ធំបានដាក់គោលការណ៍ចំនួន៦ចំណុចយកទៅអនុវត្តបទបញ្ជាយ៉ាងតឹងរឹងបំផុត នៅសាលប្រជុំកងរាជអាវុធហត្ថខេត្តកំពង់ធំនាព្រឹកថ្ងៃទី២៩ ខែឧសភា ឆ្នាំ២០២៦នេះ ដោយមានការអញ្ជើញចូលរួមពីសំណាក់ លោក លោកស្រីមេបញ្ជាការរងខេត្ត លោកនាយសេនាធិការរង ប្រធាន-អនុប្រធានមន្ទីរ នាយ-នាយរងការិយាល័យ ប្រធានអង្គភាពទាំង២ មេបញ្ជាការមូលដ្ឋានកងរាជអាវុធហត្ថ ក្រុង -ស្រុកទាំង៩ មេបញ្ជាការកងអនុសេនាធំកងរាជអាវុធហត្ថចល័តផងដែរ។
លោកឧត្តមសេនីយ៍ត្រី មាស យ៉ត បានដាក់គោលការណ៍ចំនួន៦ចំណុច ដល់នាយទាហាន នាយទាហានរងនិងពលទាហាននៃកងរាជអាវុធហត្ថកំពង់ធំ យកទៅអនុវត្តបទបញ្ជាយ៉ាងតឹងរឹងបំផុត៖
១.អំពីបញ្ហាបទល្មើស Online Scam បន្ទាប់ពីកម្លាំងមានសមត្ថកិច្ចបានចុះបង្ក្រាប បទលើ្មសឆបោកតាមប្រព័ន្ធបច្ចេកវិទ្យាអនឡាយស្គេមនៅតាមទីតាងធំៗនាពេលបន្លងមកនិងបានឃាត់ខ្លួនមួយចំនួនធំ។ ជាក់ស្ដែងសង្កេតឃើញថា មានក្រុមឆបោកតាមបច្ចេកវិទ្យាអនឡាញនេះ មួយចំនួនតូចបានបន្តរត់គេចខ្លួនទៅនៅតាមបណ្ដាខេត្តនានា។ជាពិសេសក្នុងភូមិសាស្រ្តខេត្តកំពង់ធំកម្លាំងកងរាជអាវុធហត្ថខេត្តបានបន្តចុះស្រាវជ្រាវនៅតាមទីតាំងផ្ទះសំណាក់ កន្លែងធ្វើការក្រុមហ៊ុន របស់ជនបរទេសដែលសង្ស័យដើម្បីបង្ក្រាប និងបោសសម្អាតឱ្យអស់ក្នុងភូមិសាស្ត្រខេត្តកំពង់ធំ។

២.អំពីគ្រោះថ្នាក់ចរាចរណ៍ បច្ចុប្បន្នគ្រោះថ្នាក់ចរាចរណ៍មានការកើនឡើង ដូចនេះក្នុងនាមមន្ត្រីអនុវត្តច្បាប់ត្រូវគោរព និងអនុវត្តឱ្យបានខ្ជាប់ខ្ជួន ។ ដោយឡែកកម្លាំងជំនាញនគរបាលយុត្តិធម៌ នៃកងរាជអាវុធហត្ថខេត្តកំពង់ធំ បានធ្វើការចុះផ្សព្វផ្សាយស្ដីពីច្បាប់ចរាចរណ៍និងផលប៉ះពាល់នៃគ្រោះថ្នាក់ចរាចរណ៍ដល់បងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សនៅភូមិ/ឃុំ និងសាលារៀនជាច្រើនកន្លែងផងដែរ។

៣.បញ្ហាក្មេងទំនើង កម្លាំងកងរាជអាវុធហត្ថទូទាំងខេត្តកំពង់ធំ បានធ្វើការចុះល្បាតជាប្រចាំ ចូលរួមការពារសន្តិសុខ រក្សាសណ្ដាប់ធ្នាប់ ដើម្បីទប់ស្កាត់ បង្ការបង្ក្រាបនៅតាមមូលដ្ឋាន ភូមិ-ឃុំ ក្រុង-ស្រុក ដែលខ្លួនទទួលខុសត្រូវ ។

៤.បញ្ហាការប្រើប្រាស់អាវុធ ត្រូវមានលិខិតបេសកកម្មឱ្យបានត្រឹមត្រូវត្រូវពីលោកមេបញ្ជាការអង្គរភាពមុននឹងចុះបេសកកម្ម ក្រោយពីបញ្ចប់បេសកម្ម ទុកដាក់ឱ្យអាវុធមានរបៀបរៀបរយ ថែទាំដុះលាងជាប្រចាំ។ ៥.អំពីល្បែងស៊ីសងខុសច្បាប់គ្រប់ប្រភេទ ក្នុងភូមិសាស្ត្រ កម្លាំងជំនាញបានចុះធ្វើការណែនាំ ដល់បងប្អូនប្រជាពលរដ្ឋនិង ៦.អំពីបទល្មើសធនធានធម្មជាតិ កម្លាំងកងរាជអាវុធហត្ថចូលរួមយ៉ាងសកម្មក្នុងទប់ស្កាត់បទល្មើសធនធានធម្មជាតិ ទន្រ្ទានកាន់កាប់ដីរដ្ឋយកធ្វើកម្មសិទ្ធផ្ទាល់ខ្លួន ។ រាជរដ្ឋាភិបាលប្រឹងប្រែងទប់ស្កាត់ ក៏ដូចជាឯកឧត្ដម នួន ផារ័ត្ន អភិបាល នៃគណៈអភិបាលខេត្តកំពង់ធំ និងជាប្រធានគណៈបញ្ជាការឯកភាពខេត្តរដ្ឋបាលខេត្ត ខិតខំទប់ស្កាត់បទល្មើសធនធានធម្មជាតិ ទាំងវាលលើ និងវាលក្រោម ស្របតាមច្បាប់ដែលរាជរដ្ឋាភិបាលបានដាក់ចេញ ។

ជាមួយគ្នានេះ លោកឧត្តមសេនីយ៍ត្រី មាស យ៉ត ក៏បានដាក់បទបញ្ជាឱ្យកម្លាំងទាំងអស់ ត្រូវស្ថិតក្នុងស្ថានភាពត្រៀមអន្តរាគមន៍ និងរង់ចាំអនុវត្តបទបញ្ជា ២៤ម៉ោងលើ២៤ម៉ោង ដោយត្រូវគោរពវិន័យ ក្រមសីលធម៌ និងអនុវត្តតួនាទី/ភារកិច្ចប្រកបដោយស្មារតីទទួលខុសត្រូវខ្ពស់៕

ដោយ ស៊ុម វណ្ណា