AKP បន្ទាយមានជ័យ ថ្ងៃទី២៨ ខែឧសភា ឆ្នាំ២០២៦--វិស័យព្រះពុទ្ធសាសនា និងការអប់រំតាមបែបពុទ្ធចក្រនៅក្នុងខេត្តបន្ទាយមានជ័យ បានឈានឡើងដល់កម្រិតថ្មីមួយទៀត តាមរយៈការលេចរូបរាងឡើងនូវសមិទ្ធផល «បណ្ណាល័យពុទ្ធសាសនបណ្ឌិត្យសាខាខេត្ត»។ សមិទ្ធផលដ៏ថ្លៃថ្លានេះ ត្រូវបានប្រារព្ធពិធីសម្ពោធឆ្លង និងអង្គផ្កាប្រាក់សាមគ្គីយ៉ាងឱឡារិក នារសៀលថ្ងៃទី២៧ ខែឧសភា ឆ្នាំ២០២៦ ក្រោមបរិយាកាសជ្រះថ្លា និងពោរពេញដោយស្មារតីសាមគ្គីភាពយ៉ាងខ្លាំងក្លា។

ពិធីដ៏មានអត្ថន័យនេះ ត្រូវបានប្រារព្ធធ្វើឡើងនៅវត្តស្វាយចាស់ ដោយមានការយាងចូលរួមជាព្រះអធិបតីភាពដ៏ខ្ពង់ខ្ពស់ពីព្រះធម្មវនវាសីបណ្ឌិត ចន្ទ មុនី ព្រះសមុហ៍គណខេត្តកំពង់ឆ្នាំង និងជាព្រះចៅអធិការវត្តចន្ទប្បញ្ឆោត្តនារាម (ហៅវត្តតាសុត) ព្រមទាំងមានការអញ្ជើញចូលរួមផ្ទាល់ពីឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកជំទាវ ជ័យ ណារី និងឯកឧត្ដម ប្លែក វ៉ារី ប្រធានក្រុមប្រឹក្សាខេត្ត រួមជាមួយមន្ត្រីរាជការ និងពុទ្ធបរិស័ទជិតឆ្ងាយយ៉ាងច្រើនកុះករ។

នៅក្នុងឱកាសដ៏វិសេសវិសាលនោះ ព្រះធម្មវនវាសីបណ្ឌិត ចន្ទ មុនី បានប្រទានព្រះសង្ឃដីកាអប់រំធម៌ ដោយបានសង្កត់ធ្ងន់យ៉ាងស៊ីជម្រៅទៅលើតម្លៃនៃការសិក្សារៀនសូត្រ និងការរក្សាសីលធម៌សង្គម។ ព្រះអង្គបានរំលឹកថា បណ្ណាល័យមិនមែនគ្រាន់តែជាអគារសម្រាប់ផ្ទុកសៀវភៅនោះទេ ប៉ុន្តែវាជា «ជង្រុកនៃបញ្ញា» និងជាកន្លែងបណ្តុះគ្រាប់ពូជនៃចំណេះដឹងទាំងផ្លូវលោក និងផ្លូវធម៌។ «ការកសាងបណ្ណាល័យពុទ្ធសាសនបណ្ឌិត្យនាពេលនេះ គឺជារបងការពារវប្បធម៌ និងអត្តសញ្ញាណជាតិដ៏រឹងមាំ។ បើកាលណាពុទ្ធបរិស័ទ ជាពិសេសស្រទាប់យុវជនមានចំណេះដឹងជ្រៅជ្រះបូករួមនឹងសីលធម៌រស់នៅខ្ពស់ នោះសង្គមជាតិនឹងមានសន្តិភាព និងការអភិវឌ្ឍប្រកបដោយចីរភាព»។ នេះជាផ្នែកមួយនៃព្រះសង្ឃដីកាដាស់តឿនរបស់ព្រះអង្គ។ ព្រះអង្គក៏បានកោតសរសើរដល់ស្មារតីសាមគ្គីភាពរបស់ថ្នាក់ដឹកនាំខេត្ត និងពុទ្ធបរិស័ទទាំងអស់ ដែលបានរួមគ្នាចាប់មគ្គផលតាមរយៈអង្គផ្កាប្រាក់សាមគ្គី ដើម្បីលេចចេញជាសមិទ្ធផលជាប្រវត្តិសាស្ត្រនេះឡើង។

មានប្រសាសន៍ទៅកាន់អង្គពិធីទាំងមូល ឯកឧត្ដម អ៊ុំ រាត្រី អភិបាលខេត្តបន្ទាយមានជ័យ បានសម្ដែងនូវសេចក្ដីត្រេកអរ និងជ្រះថ្លាយ៉ាងក្រៃលែងចំពោះវត្តមានដ៏ខ្ពង់ខ្ពស់របស់ព្រះធម្មវនវាសីបណ្ឌិត ចន្ទ មុនី ដែលបាននិមន្តជួយលើកកម្ពស់វិស័យព្រះពុទ្ធសាសនានៅក្នុងខេត្តផ្ទាល់។ ឯកឧត្ដមអភិបាលខេត្ត បានគូសបញ្ជាក់ថា ភាពរីកចម្រើននៃវិស័យព្រះពុទ្ធសាសនានៅទូទាំងខេត្តបន្ទាយមានជ័យនាពេលបច្ចុប្បន្ន គឺមិនអាចកាត់ផ្ដាច់ចេញពីកត្តាសុខសន្តិភាពពេញលេញរបស់ប្រទេសជាតិបានឡើយ។ ឯកឧត្ដមបានលើកឡើងថា ពុទ្ធចក្រ និងអាណាចក្រ វិស័យទាំងពីរនេះត្រូវតែដើរទន្ទឹមគ្នា ពីព្រោះវត្តអារាម និងបណ្ណាល័យធម៌ គឺជាកន្លែងអប់រំចិត្តគំនិតប្រជាពលរដ្ឋឱ្យដើរលើផ្លូវត្រូវ កាត់បន្ថយអំពើអបាយមុខ និងរួមចំណែកយ៉ាងធំធេងក្នុងការអភិវឌ្ឍសង្គម។  ក្នុងនាមអាជ្ញាធរខេត្ត ឯកឧត្ដមបានប្ដេជ្ញាចិត្តបន្តគាំទ្រ និងបង្កលក្ខណៈងាយស្រួលគ្រប់បែបយ៉ាងដល់គ្រប់សកម្មភាពសាសនា ដើម្បីថែរក្សាទំនៀមទម្លាប់ប្រពៃណីជាតិឱ្យបានគង់វង្ស។

ពិធីបុណ្យសម្ពោធឆ្លង និងផ្កាប្រាក់សាមគ្គីនាឱកាសនោះ បានបង្ហាញឱ្យឃើញយ៉ាងច្បាស់ពីសាមគ្គីភាពរវាងថ្នាក់ដឹកនាំ មន្ត្រីរាជការ និងប្រជាពលរដ្ឋគ្រប់ស្រទាប់វណ្ណៈ។ ថវិកា និងបច្ច័យដែលបានមកពីអង្គផ្កាប្រាក់នេះ នឹងត្រូវយកទៅប្រើប្រាស់សម្រាប់ទ្រទ្រង់ និងអភិវឌ្ឍន៍បណ្ណាល័យពុទ្ធសាសនបណ្ឌិត្យសាខាខេត្តបន្ទាយមានជ័យនេះឱ្យកាន់តែមានភាពសម្បូរបែប ក្នុងគោលដៅបម្រើឱ្យការសិក្សាស្រាវជ្រាវរបស់ព្រះសង្ឃ សិស្ស និស្សិត និងប្រជាពលរដ្ឋទូទៅ។ ព្រឹត្តិការណ៍នេះ មិនត្រឹមតែជាការអបអរសាទរសមិទ្ធផលរូបវន្តប៉ុណ្ណោះទេ ប៉ុន្តែវាជាព្រឹត្តិការណ៍ប្រវត្តិសាស្ត្រមួយដែលជួយដាស់ស្មារតី «ស្រឡាញ់ការអាន និងការយល់ដឹងពីធម៌វិន័យ» ឱ្យកាន់តែរីកសាយភាយនៅក្នុងទឹកដីខេត្តបន្ទាយមានជ័យផងដែរ៕

ដោយ៖ ឈុន សារ៉ាត