AKP ភ្នំពេញ ថ្ងៃទី២៦ ខែឧសភា ឆ្នាំ២០២៦--លោក Park Joo Bong ប្រធានសភាពាណិជ្ជកម្ម និងឧស្សាហកម្មទីក្រុងអ៊ីនឆន់ នៃប្រទេសកូរ៉េខាត្បូង មានប្រសាសន៍ថា ក្រុមអ្នកវិនិយោគកំពុងតែស្វែងរកឱកាសបន្ថែមទៀត ដើម្បីវិនិយោគនៅក្នុងប្រទេសកម្ពុជា ពិសេសលើវិស័យកសិកម្ម ដោយផ្ដោតជាសំខាន់លើដំណាំស្វាយចន្ទី។ នេះបើតាមការឱ្យដឹងរបស់ឯកឧត្ដម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតឱ្យ លោក Park Joo Bong ប្រធានសភាពាណិជ្ជកម្ម និងឧស្សាហកម្មទីក្រុងអ៊ីនឆន់ នៃសាធារណរដ្ឋកូរ៉េ ចូលជួបសម្ដែងការគួរសម នាព្រឹកថ្ងៃទី២៦ ខែឧសភា ឆ្នាំ២០២៦ នៅវិមានសាមគ្គីភាពនៃព្រឹទ្ធសភា។

ក្នុងជំនួបនោះ សម្ដេចតេជោ ហ៊ុន សែន បានសម្ដែងនូវការស្វាគមន៍ចំពោះ លោក Park Joo Bong និងសហការី ដែលបានអញ្ជើញមកទស្សនកិច្ចនៅកម្ពុជា។ សម្ដេចតេជោ សង្ឃឹមថា ការទស្សនកិច្ចរបស់ក្រុមអ្នកវិនិយោគកូរ៉េខាងត្បូងមកកាន់កម្ពុជានាពេលនេះ នឹងបានស្វែងរកឱកាសបន្ថែមទៀតក្នុងការវិនិយោគនៅក្នុងប្រទេសកម្ពុជា។ 

ជាមួយគ្នានេះ លោក Park Joo Bong បានសម្ដែងនូវការអរគុណជាអនេកកប្បការចំពោះសម្ដេចតេជោ ដែលបានអនុញ្ញាតឱ្យរូបលោក និងក្រុមអ្នកវិនិយោគ បានជួបសម្ដែងការគួរសម។ លោកបានលើកឡើងនូវទិដ្ឋភាពបរិយាកាសវិនិយោគនៅក្នុងប្រទេសកម្ពុជា ដោយលោកបានរំលេចថា ប្រទេសកម្ពុជា គឺជាប្រទេសមួយ ដែលមានសុវត្ថិភាព ហើយទទួលបានការចាប់អារម្មណ៍អ្នកវិនិយោគរបស់កូរ៉េខាងត្បូង។ លោកបានលើកឡើងថា នៅពេលនេះក្រុមអ្នកវិនិយោគកំពុងតែស្វែងរកឱកាសបន្ថែមទៀត ដើម្បីវិនិយោគនៅក្នុងប្រទេសកម្ពុជា ពិសេសលើវិស័យកសិកម្ម ដោយផ្ដោតជាសំខាន់លើដំណាំស្វាយចន្ទី។

សម្ដេចតេជោ ប្រមុខរដ្ឋស្ដីទីបានសម្ដែងនូវការអរគុណចំពោះការចាប់អារម្មណ៍របស់អ្នកវិនិយោគកូរ៉េខាងត្បូងមកកាន់ប្រទេសកម្ពុជា។ សម្ដេចតេជោបានសម្ដែងនូវការពេញចិត្តចំពោះការចាប់អារម្មណ៍វិនិយោគទៅលើផ្នែកកសិកម្ម ពោលគឺដំណាំស្វាយចន្ទី ដែលសម្ដេចបានរំលេចថា ប្រទេសកម្ពុជា មានផលិតផលជាច្រើនសម្រាប់ធ្វើការវិនិយោគបន្តទៀត ជាពិសេសផលិតផលកសិកម្មដែលជាវត្ថុធាតុដើម។ សម្ដេចតេជោបានបន្ដថា អ្វីដែលកម្ពុជាត្រូវការបន្ថែមនោះ គឺអ្នកវិនិយោគដែលអាចកែច្នៃនូវកសិផលរបស់កម្ពុជា ដើម្បីយកទៅលក់នៅទីផ្សារកូរ៉េ ជាពិសេសនៅទីផ្សារពិភពលោក។ សម្ដេចតេជោបានសង្កត់ធ្ងន់ថា ចំណុចស្នូលរវាងកម្ពុជា និងកូរ៉េខាងត្បូង គឺពាណិជ្ជកម្ម និងការវិនិយោគនេះឯង ហើយតាមរយៈក្រុមអ្នកវិនិយោគរបស់កូរ៉េខាងត្បូងមកកាន់ប្រទេសកម្ពុជានាពេលនេះ នឹងជាឱកាសបន្ថែមទៀតដើម្បីធ្វើការវិនិយោគនៅក្នុងប្រទេសកម្ពុជា។ 

ជាមួយគ្នានេះដែរ សម្ដេចតេជោ ក៏បានសង្កត់ធ្ងន់ទៅលើទំនាកទំនងរវាងកម្ពុជា និងកូរ៉េខាងត្បូង ដែលពេលនេះជាដៃគូយុទ្ធសាស្ត្រជាមួយគ្នា ហើយសម្ដេចតេជោ សង្ឃឹមថា ទៅថ្ងៃខាងមុខជាពិសេសក្នុងឱកាសខួប៣០ឆ្នាំ នៃការបង្កើតទំនាក់ទំនងរវាងកម្ពុជានិងកូរ៉េខាងត្បូងឡើងវិញនោះ គឺប្រទេសទាំងពីរ នឹងអាចដើរដល់ជំហ៊ានមួយទៀត គឺការបង្កើតជាដៃគូយុទ្ធសាស្ត្រគ្រប់ជ្រុងជ្រោយជាមួយគ្នា៕

ដោយ៖ ជឹម ណារី