AKP ភ្នំពេញ ថ្ងៃទី២៥ ខែឧសភា ឆ្នាំ២០២៦-- ក្រុមការងារមូលនិធិកេរតំណែលតំបន់ទេសភាព (LLF) កាលពីថ្ងៃទី២០ ដល់ថ្ងៃទី២៤ ខែឧសភា ឆ្នាំ២០២៦ បានចូលរួមជាមួយអង្គការអភិរក្សអន្តរជាតិកម្ពុជា (អង្គការ CI) ក្នុងដំណើរទស្សនកិច្ចទៅតំបន់ទេសភាពជួរភ្នំក្រវាញកណ្ដាលស្ថិតក្នុងឧទ្យានជាតិភ្នំក្រវាញ គ្របដណ្ដប់លើខេត្តកោះកុង ពោធិ៍សាត់ និងកំពង់ស្ពឺ។

ទស្សនកិច្ចនេះបានបង្ហាញពីឱកាសដ៏មានអត្ថន័យក្នុងការស្វែងយល់ដោយផ្ទាល់អំពីតថភាពជាក់ស្ដែងនៃការងារអភិរក្សនៅមូលដ្ឋាន តាមរយៈការជួបជាមួយក្រុមការងារអភិរក្ស តំណាងរាជរដ្ឋាភិបាល មន្ត្រីឧទ្យានុរក្ស សហគមន៍មូលដ្ឋាន និងជនជាតិដើមភាគតិច ដែលកំពុងធ្វើការរួមគ្នាជារៀងរាល់ថ្ងៃដើម្បីការពារធម្មជាតិដ៏សំខាន់របស់កម្ពុជា និងសកលលោក។ ក្នុងដំណើរនេះដែរ អ្នកចូលរួមបានស្ដាប់សំឡេងសត្វទោចម្កុដ ប្រទះឃើញដាន និងរូបភាពសត្វព្រៃសំខាន់ៗដូចជាដំរីអាស៊ី ឆ្កែព្រៃ ដែលថតជាប់ដោយម៉ាស៊ីនថតស្វ័យប្រវត្តិ។ ពួកយើងក៏មានសំណាងដ៏កម្រដែលបានឃើញសត្វក្រពើភ្នំ ជាប្រភេទសត្វជិតផុតពូជបំផុត នៅក្នុងជម្រកធម្មជាតិរបស់ពួកវា។ ការណ៍នេះបានបង្ហាញពីសារៈសំខាន់នៃភាពជាដៃគូរយៈពេលវែង និងការគាំទ្រប្រកបដោយនិរន្តរភាព ដែលអាចបង្កើតផលវិជ្ជមានសម្រាប់មនុស្ស និងធម្មជាតិ។

តាមរយៈការគាំទ្រពីមូលនិធិ LLF និងដៃគូសំខាន់ៗជាច្រើនទៀត គម្រោងរេដបូកជួរភ្នំក្រវាញកណ្ដាល បន្តគាំទ្រការគ្រប់គ្រងតំបន់ការពារធម្មជាតិស្របតាមគោលការណ៍សិទ្ធមនុស្ស ការស្រាវជ្រាវតាមដានជីវៈចម្រុះ និងសកម្មភាពអភិវឌ្ឍន៍សហគមន៍ ដែលផ្ដល់ផលប្រយោជន៍ដល់ភូមិគោលដៅចំនួន២២ និងប្រជាពលរដ្ឋប្រមាណ ៣ម៉ឺននាក់ ក្នុងនោះរួមមានជនជាតិដើមភាគតិចជង និងព័រ ប្រមាណ ៤ពាន់នាក់ ដែលពឹងអាស្រ័យដោយផ្ទាល់លើធនធានព្រៃឈើ។

អង្គការ CI សូមអរគុណអនេកដល់ការគាំទ្រពីគ្រប់ភាគីទាំងអស់ និងសូមបន្តកិច្ចសហការប្រកបដោយឆន្ទៈមោះមុតរួមគ្នាក្នុងការអភិរក្សធនធានធម្មជាតិនេះ ដើម្បីជាប្រយោជន៍ដល់ធម្មជាតិ និងមនុស្សគ្រប់ជំនាន់៕

ដោយ ណយ នឿន (ប្រភព៖ CI)