EN 
FR 
AR
CN ប្រធានទីភ្នាក់ងារផ្គត់ផ្គង់ការពារជាតិកូរ៉េខាងត្បូងជួបពិភាក្សាអំពីកិច្ចសហប្រតិបត្តិការអាវុធជាមួយរដ្ឋមន្ត្រីការពារជាតិឥណ្ឌា
AKP ភ្នំពេញ ថ្ងៃទី២១ ខែឧសភា ឆ្នាំ២០២៦ -- មន្ត្រីកូរ៉េខាងត្បូងបាននិយាយថា ប្រធានទីភ្នាក់ងារផ្គត់ផ្គង់ការពារជាតិកូរ៉េខាងត្បូង កាលពីថ្ងៃពុធបានជួបជាមួយរដ្ឋមន្ត្រីក្រសួងការពារជាតិឥណ្ឌា និងបានពិភាក្សាអំពីវិធីពង្រីកកិច្ចសហប្រតិបត្តិការអាវុធទ្វេភាគី។
លោក លី យ៉ុងឆុល (Lee Yong-cheol) រដ្ឋមន្ត្រីនៃរដ្ឋបាលទិញអាវុធការពារជាតិ និងរដ្ឋមន្ត្រីក្រសួងការពារជាតិឥណ្ឌា លោក រ៉ាចណាថ ស៊ីងហ៍ (Rajnath Singh) បានជួបគ្នានៅទីក្រុងសេអ៊ូល បន្ទាប់ពីមេដឹកនាំនៃប្រទេសទាំងពីរបានយល់ព្រមបង្កើនកិច្ចសហប្រតិបត្តិការសេដ្ឋកិច្ចក្នុងអំឡុងកិច្ចប្រជុំកំពូលមួយនៅទីក្រុងញូវដេលីកាលពីខែមុន។
កាលពីថ្ងៃពុធ មន្ត្រីទាំងពីរបានយល់ព្រមពង្រីកកិច្ចសហប្រតិបត្តិការអាវុធ ដោយលើកឡើងពីកិច្ចព្រមព្រៀងកាលពីឆ្នាំមុនដើម្បីនាំចេញកាំភ្លើងធំស្វ័យប្រវត្តិ K9 របស់កូរ៉េខាងត្បូងទៅកាន់ប្រទេសឥណ្ឌា។
ភាគីទាំងពីរក៏បានពិភាក្សាអំពីការដាក់ឱ្យដំណើរការវេទិការួមគ្នាមួយដើម្បីភ្ជាប់ក្រុមហ៊ុនការពារជាតិ ក្រុមហ៊ុនចាប់ផ្តើមអាជីវកម្ម និងសាកលវិទ្យាល័យមកពីប្រទេសនីមួយៗដើម្បីពន្លឿនកិច្ចសហប្រតិបត្តិការអាវុធដែលពាក់ព័ន្ធនឹងបច្ចេកវិទ្យាថ្មីៗ ដូចជាបញ្ញាសិប្បនិម្មិត និងយន្តហោះគ្មានមនុស្សបើក។
នៅវេទិកាការពារជាតិមួយដែលបានធ្វើឡើងបន្ទាប់ពីកិច្ចប្រជុំក្រុមហ៊ុនការពារជាតិកូរ៉េខាងត្បូង Hanwha Aerospace និងក្រុមហ៊ុនHanwha Systems Co. បានចុះហត្ថលេខាលើអនុស្សរណៈយោគយល់ជាមួយក្រុមហ៊ុន Larsen & Toubro ដែលមានមូលដ្ឋាននៅទីក្រុងមុំបៃលើកិច្ចសហប្រតិបត្តិការអាវុធទ្វេភាគី៕
ដោយ៖ មូល មិនា (ប្រភព៖ យ៉ុនហាប់)
