AKP ភ្នំពេញ ថ្ងៃទី២១ ខែឧសភា ឆ្នាំ២០២៦ -- លោក លី ហុងហ្សុង (Li Hongzhong) អនុប្រធានគណៈកម្មាធិការអចិន្ត្រៃយ៍សភាប្រជាជនចិន(CNPC) បានមានប្រសាសន៍នៅទីក្រុងប្រាទីស្លាវ៉ា ថា សភា CNPC មានឆន្ទៈក្នុងការបង្កើនការផ្លាស់ប្តូរកម្រិតពេញលេញជាមួយក្រុមប្រឹក្សាជាតិស្លូវ៉ាគីក្នុងវិស័យផ្សេងៗ ផ្តល់តួនាទីពេញលេញដល់មុខងាររបស់ស្ថាប័ននីតិប្បញ្ញត្តិ និងចូលរួមចំណែកដល់ការអភិវឌ្ឍទំនាក់ទំនងទ្វេភាគីកាន់តែទូលំទូលាយ។

លោក លី ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានធ្វើសេចក្តីថ្លែងការណ៍នេះខណៈពេលកំពុងដឹកនាំគណៈប្រតិភូមួយទៅទស្សនកិច្ចនៅប្រទេសស្លូវ៉ាគីចាប់ពីថ្ងៃចន្ទដល់ថ្ងៃពុធ។

នៅទីក្រុងប្រាទីស្លាវ៉ា លោក លី បានជួបជាមួយប្រធានាធិបតីស្លូវ៉ាគីលោក ផេទឺ ផេលឡេហ្គ្រីនី (Peter Pellegrini) នាយករដ្ឋមន្ត្រីស្លូវ៉ាគីលោក រ៉ូបឺត ហ្វីកូ (Robert Fico) និងប្រធានក្រុមប្រឹក្សាជាតិស្លូវ៉ាគី លោក រីឆាដ រ៉ាស៊ី (Richard Rasi) ។ លោកក៏បានជួបពិភាក្សាជាមួយអនុប្រធានក្រុមប្រឹក្សាជាតិស្លូវ៉ាគី លោក ទីប័រ ហ្គាស្ពារ (Tibor Gaspar) ផងដែរ។

លោក លី បាននិយាយថា ក្រោមការណែនាំជាយុទ្ធសាស្ត្ររបស់ប្រធានាធិបតីចិន លោក ស៊ី ជីនពីង (Xi Jinping) និងមេដឹកនាំស្លូវ៉ាគី ការអភិវឌ្ឍភាពជាដៃគូយុទ្ធសាស្ត្រចិន-ស្លូវ៉ាគី បានចូលដល់ដំណាក់កាលថ្មីមួយ។ ភាគីទាំងពីរគួរតែបន្តពង្រឹងទំនុកចិត្តគ្នាទៅវិញទៅមកខាងនយោបាយពង្រឹងមិត្តភាពប្រពៃណី និងគាំទ្រយ៉ាងរឹងមាំចំពោះផលប្រយោជន៍ស្នូល និងកង្វល់ធំៗ ដោយកសាងមូលដ្ឋានគ្រឹះនៃទំនាក់ទំនងទ្វេភាគី។

លោកបានមានប្រសាសន៍ថា ប្រទេសចិននឹងចែករំលែកឱកាសអភិវឌ្ឍន៍ជាមួយប្រទេសដទៃទៀតនៅទូទាំងពិភពលោកតាមរយៈការអភិវឌ្ឍដែលមានគុណភាពខ្ពស់ ដោយលោកបានបន្ថែមថា ប្រទេសចិនមានឆន្ទៈក្នុងការពង្រឹងការសម្របសម្រួលជាយុទ្ធសាស្ត្រជាមួយស្លូវ៉ាគី ធ្វើឱ្យស៊ីជម្រៅ និងពង្រីកកិច្ចសហប្រតិបត្តិការជាក់ស្តែងក្នុងវិស័យពាណិជ្ជកម្ម និងវិនិយោគ ថាមពលថ្មី សេដ្ឋកិច្ចឌីជីថល និងវិស័យផ្សេងៗទៀត លើកកម្ពស់ការសាងសង់រួមគ្នាដែលមានគុណភាពខ្ពស់នៃគម្រោងខ្សែក្រវាត់ និងផ្លូវ និងកិច្ចសហប្រតិបត្តិការចិន-បណ្តាប្រទេសនៅអឺរ៉ុបកណ្តាល និងខាងកើតព្រមទាំងបង្កើនការផ្លាស់ប្តូរប្រជាជន និងវប្បធម៌ ដែលនាំមកនូវអត្ថប្រយោជន៍កាន់តែច្រើនដល់ប្រជាជនទាំងពីរ។

ភាគីស្លូវ៉ាគីបាននិយាយថា ពួកគេយកចិត្តទុកដាក់យ៉ាងខ្លាំងចំពោះឋានៈរបស់ប្រទេសចិនជាប្រទេសធំមួយ និងទំនាក់ទំនងមិត្តភាពរវាងស្លូវ៉ាគី និងចិន។ ប្រទេសស្លូវ៉ាគីប្រកាន់ខ្ជាប់យ៉ាងរឹងមាំនូវគោលនយោបាយចិនតែមួយហើយត្រៀមខ្លួនរួចជាស្រេចសម្រាប់ការផ្លាស់ប្តូរ និងកិច្ចសហប្រតិបត្តិការយ៉ាងជិតស្និទ្ធជាមួយប្រទេសចិនក្នុងវិស័យសេដ្ឋកិច្ច ពាណិជ្ជកម្ម វប្បធម៌ និងវិស័យផ្សេងៗទៀត។

ពួកគេបានស្វាគមន៍សហគ្រាសចិនកាន់តែច្រើនមកវិនិយោគ និងធ្វើអាជីវកម្មនៅក្នុងប្រទេសស្លូវ៉ាគី ហើយបាននិយាយថា រដ្ឋាភិបាលនឹងពង្រឹងការផ្លាស់ប្តូររវាងស្ថាប័ននីតិប្បញ្ញត្តិទាំងពីរ និងលើកកម្ពស់ភាពជាដៃគូយុទ្ធសាស្ត្រស្លូវ៉ាគី-ចិន ឱ្យកាន់តែស្វាហាប់៕

ដោយ៖ មូល មិនា (ប្រភព៖ ស៊ីនហួ)