AKP ភ្នំពេញ ថ្ងៃទី២០ ខែឧសភា ឆ្នាំ២០២៦ -- លោក តេដ្រូស អាដានុម ជេប្រេយេស៊ូស (Tedros Adhanom Ghebreyesus) អគ្គនាយកអង្គការសុខភាពពិភពលោក (WHO) កាលពីថ្ងៃអង្គារ បានសម្តែងការព្រួយបារម្ភយ៉ាងខ្លាំងចំពោះ «ទំហំ និងល្បឿន» ចំពោះការផ្ទុះឡើងនៃជំងឺអេបូឡានៅសាធារណរដ្ឋប្រជាធិបតេយ្យកុងហ្គោ (DRC) និងអ៊ូហ្គង់ដា ដោយលោកបាននិយាយថា គណៈកម្មាធិការបន្ទាន់មួយនឹងជួបគ្នានៅពេលក្រោយដើម្បីចេញអនុសាសន៍បណ្ដោះអាសន្ន។

ថ្លែងទៅកាន់សន្និបាតសុខភាពពិភពលោកលើកទី៧៩ លោក តេដ្រូសបាននិយាយថា លោកបានប្រកាសអាសន្នសុខភាពសាធារណៈដែលជាការព្រួយបារម្ភអន្តរជាតិ ចំពោះការផ្ទុះឡើងនៃជំងឺអេបូឡានៅក្នុងប្រទេសទាំងពីរកាលពីថ្ងៃអាទិត្យ ជាលើកទីមួយហើយដែលប្រធានអង្គការសុខភាពពិភពលោកបានធ្វើដូច្នេះដោយមិនបានកោះប្រជុំគណៈកម្មាធិការបន្ទាន់ជាមុន។

លោក តេដ្រូស បាននិយាយថា «ខ្ញុំមិនបានធ្វើរឿងនេះដោយស្រាលទេ» ដោយលោកបានកត់សម្គាល់ថា ការសម្រេចចិត្តនេះត្រូវបានធ្វើឡើងក្រោមមាត្រាទី១២ នៃបទប្បញ្ញត្តិសុខភាពអន្តរជាតិ បន្ទាប់ពីពិគ្រោះយោបល់ជាមួយរដ្ឋមន្ត្រីសុខាភិបាលនៃប្រទេសទាំងពីរ។ «ខ្ញុំមានការព្រួយបារម្ភយ៉ាងខ្លាំងអំពីទំហំ និងល្បឿននៃការរាតត្បាតនេះ»។

លោក តេដ្រូស បាននិយាយថា ខេត្តអ៊ីទូរី របស់សាធារណរដ្ឋប្រជាធិបតេយ្យកុងហ្គោបានរាយការណ៍ពីករណីដែលបានបញ្ជាក់ចំនួន៣០ករណី ខណៈដែលប្រទេសអ៊ូហ្គង់ដាបានបញ្ជាក់ចំនួន ២ករណីនៅក្នុងរដ្ឋធានីកាមប៉ាឡា រួមទាំងការស្លាប់មួយពាក់ព័ន្ធនឹងអ្នកធ្វើដំណើរមកពីសាធារណរដ្ឋប្រជាធិបតេយ្យកុងហ្គោ។

លោក​បាន​មាន​ប្រសាសន៍​ថា អាជ្ញាធរ​សហរដ្ឋអាមេរិក​ក៏​បាន​រាយការណ៍​ពី​ករណី​មួយ​ដែល​បាន​បញ្ជាក់​ថា​ពាក់ព័ន្ធ​នឹង​ពលរដ្ឋ​អាមេរិក​ម្នាក់​ដែល​ត្រូវ​បាន​បញ្ជូន​ទៅ​ប្រទេស​អាល្លឺម៉ង់ ដោយលោកបាន​កត់​សម្គាល់​ថាអង្គការ WHO កំពុង​ធ្វើការ​យ៉ាង​ជិតស្និទ្ធ​ជាមួយប្រទេស DRC អ៊ូហ្គង់ដា និង​សហរដ្ឋអាមេរិក៕

ដោយ៖ មូល មិនា (ប្រភព៖ ស៊ីនហួ)