AKP ភ្នំពេញ ថ្ងៃទី២០ ខែឧសភា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់លោក សេយេដ អាប់បាស់ អារ៉ាកជី (Seyed Abbas Araghchi) និងរដ្ឋមន្ត្រីក្រសួងមហាផ្ទៃប៉ាគីស្ថាន លោក ម៉ូហ៍ស៊ីន ណាកវី (Mohsin Naqvi) បានផ្លាស់ប្តូរទស្សនៈលើកិច្ចខិតខំប្រឹងប្រែងដែលកំពុងបន្តដើម្បីបញ្ចប់សង្គ្រាមរវាងអាម៉េរិក និងអ៊ីស្រាអែលប្រឆាំងនឹងអ៊ីរ៉ង់។

ក្រសួងការបរទេសអ៊ីរ៉ង់បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា នៅក្នុងកិច្ចប្រជុំមួយកាលពីថ្ងៃចន្ទ ភាគីទាំងពីរក៏បានពិភាក្សាអំពីស្ថានភាពសន្តិសុខចុងក្រោយបំផុតនៅក្នុងតំបន់ និងកិច្ចសហប្រតិបត្តិការទ្វេភាគីផងដែរ។

លោក អារ៉ាកជី បានសរសើរដល់ការិយាល័យដ៏ល្អរបស់ប៉ាគីស្ថានក្នុងការជំរុញការទូត និងទប់ស្កាត់ការកើនឡើងនៃភាពតានតឹង ដោយលោកបានលើកឡើងអំពីអាកប្បកិរិយា «ផ្ទុយ និងអតិបរមានិយម» របស់សហរដ្ឋអាមេរិក និងការបរាជ័យរបស់ប្រទេសក្នុងការបំពេញតាមការសន្យារបស់ខ្លួនថាជាឧបសគ្គចម្បងចំពោះមាគ៌ានៃការទូត។

ចំណែកឯលោក ណាកវី បាននិយាយថា លោកបានធ្វើកិច្ចចរចា«ប្រកបដោយការស្ថាបនា និងផ្លែផ្កា» ជាមួយមន្ត្រីអ៊ីរ៉ង់ រួមទាំងប្រធានសភាលោក ម៉ូហាម៉ាដ បាកើ កាលីបាហ្វ(Mohammad Baqer Qalibaf) និងរដ្ឋមន្ត្រីក្រសួងមហាផ្ទៃ លោក អេសកាន់ដារ ម៉ូមេនី (Eskandar Momeni)ក្នុងអំឡុងពេលដំណើរទស្សនកិច្ចរយៈពេលពីរថ្ងៃរបស់លោកទៅកាន់ទីក្រុងតេអេរ៉ង់ ដោយលោកបានបញ្ជាក់ពីការប្តេជ្ញាចិត្តយ៉ាងមុតមាំរបស់រដ្ឋាភិបាលប៉ាគីស្ថានក្នុងការបន្តលើកកម្ពស់ទំនាក់ទំនងពេញលេញជាមួយអ៊ីរ៉ង់។

ទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍កាលពីថ្ងៃចន្ទថា ទីក្រុងតេអេរ៉ង់បានប្រគល់ផែនការសន្តិភាពចុងក្រោយបំផុតចំនួន ១៤ចំណុចរបស់ខ្លួនទៅឱ្យអ្នកសម្របសម្រួលប៉ាគីស្ថានដើម្បីប្រគល់ទៅឱ្យសហរដ្ឋអាមេរិក។

អ៊ីរ៉ង់ សហរដ្ឋអាមេរិក និងអ៊ីស្រាអែលបានឈានដល់បទឈប់បាញ់នៅថ្ងៃទី៨ ខែមេសា បន្ទាប់មកគឺការចរចាសន្តិភាពដោយប្រយោលរវាងទីក្រុងតេអេរ៉ង់ និងទីក្រុងវ៉ាស៊ីនតោន នៅរដ្ឋធានីអ៊ីស្លាម៉ាបាដ ប្រទេសប៉ាគីស្ថាន នៅថ្ងៃទី១១ និង ១២ ខែមេសា ដែលមិនបានសម្រេចកិច្ចព្រមព្រៀង។

ក្នុងរយៈពេលប៉ុន្មានសប្តាហ៍ថ្មីៗនេះ ភាគីទាំងពីរត្រូវបានគេរាយការណ៍ថាបានផ្លាស់ប្តូរផែនការដែលបានស្នើឡើងជាច្រើន ដោយគូសបញ្ជាក់ពីលក្ខខណ្ឌសម្រាប់បញ្ចប់ជម្លោះតាមរយៈប្រទេសប៉ាគីស្ថាន៕

ដោយ៖ មូល មិនា (ប្រភព៖ ភីបផលដេលី)