AKP ភ្នំពេញ ថ្ងៃទី១៨ ខែឧសភា ឆ្នាំ២០២៦ -- ព្រំដែនដែលភ្ជាប់ប្រទេសរវ៉ាន់ដា និងសាធារណរដ្ឋប្រជាធិបតេយ្យកុងហ្គោ (DRC) ក្នុងស្រុករូបាវូ ត្រូវបានបិទកាលពីថ្ងៃអាទិត្យ បន្ទាប់ពីការផ្ទុះឡើងនៃជំងឺអេបូឡានៅក្នុងប្រទេសកុងហ្គោ។

លោក ប្រូស្ពើ មូលីនវ៉ា (Prosper Mulindwa) អភិបាលស្រុករូបាវូក្នុងខេត្តភាគខាងលិចនៃប្រទេសរវ៉ាន់ដា បានប្រាប់ប្រព័ន្ធផ្សព្វផ្សាយក្នុងស្រុកថា ការបិទព្រំដែនដែលភ្ជាប់តំបន់ Goma និងស្រុករូបាវូ-ជីសេនយី នឹងនៅតែមានសុពលភាពសម្រាប់រយៈពេលមិនកំណត់ ដែលជាផ្នែកមួយនៃវិធានការដែលមានគោលបំណងទប់ស្កាត់ការរីករាលដាលនៃជំងឺដ៏សាហាវនេះ។

លោក មូលីនវ៉ា បានមានប្រសាសន៍ថា «ព្រំដែនដែលភ្ជាប់តំបន់Goma និងស្រុកជីសេនយី ត្រូវបានបិទជាបណ្តោះអាសន្ន ដើម្បីឆ្លើយតបទៅនឹងការផ្ទុះឡើងនៃជំងឺអេបូឡា។ យើងនឹងបន្តចូលរួមជាមួយប្រជាពលរដ្ឋរបស់យើង ដើម្បីពន្យល់ពីមូលហេតុដែលការសម្រេចចិត្តនេះត្រូវបានធ្វើឡើង»។

លោកបានជំរុញឱ្យប្រជាពលរដ្ឋរក្សាការអត់ធ្មត់ និងកិច្ចសហប្រតិបត្តិការ ដោយសង្កត់ធ្ងន់ថា ការសម្រេចចិត្តនេះត្រូវបានធ្វើឡើង ដើម្បីការពារសុខភាពសាធារណៈ និងការពារសហគមន៍ពីការឆ្លងមេរោគដែលអាចកើតមាន។

ទោះបីជាមានការបិទជាបណ្តោះអាសន្នក៏ដោយ អាជ្ញាធរសុខាភិបាលនៅតែបន្តត្រួតពិនិត្យជនជាតិរវ៉ាន់ដាដែលឆ្លងកាត់ពីសាធារណរដ្ឋប្រជាធិបតេយ្យកុងហ្គោ ក៏ដូចជាពលរដ្ឋកុងហ្គោដែលវិលត្រឡប់មកផ្ទះវិញដែលនៅតែត្រូវបានអនុញ្ញាតឱ្យប្រើប្រាស់ចំណុចព្រំដែនក្រោមនីតិវិធីត្រួតពិនិត្យសុខភាពយ៉ាងតឹងរ៉ឹង។ នេះបើយោងតាមប្រព័ន្ធផ្សព្វផ្សាយក្នុងស្រុក។

ចំនួនអ្នកស្លាប់ដោយសារការផ្ទុះឡើងនៃជំងឺអេបូឡាចុងក្រោយបង្អស់នៅក្នុងប្រទេសសាធារណរដ្ឋប្រជាធិបតេយ្យកុងហ្គោបានកើនឡើងដល់៨៧នាក់ ការផ្ទុះឡើងនៃជំងឺនេះត្រូវបានបង្កឡើងដោយពពួក Bundibugyo ដែលមិនមានវ៉ាក់សាំងជាក់លាក់សម្រាប់ពពួកនេះទេ ហើយវាមានហានិភ័យខ្ពស់នៃការរីករាលដាលក្នុងតំបន់៕

ដោយ៖ មូល មិនា (ប្រភព៖ ស៊ីនហួ)