AKP ភ្នំពេញ ថ្ងៃទី១៣ ខែឧសភា ឆ្នាំ២០២៦ --

ក្រសួងការពារជាតិ នៃព្រះរាជាណាចក្រកម្ពុជា បានបដិសេធយ៉ាងដាច់អហង្ការចំពោះការចុះផ្សាយរបស់សារព័ត៌មានថៃមួយចំនួន ដែលចោទប្រកាន់មកលើកងកម្លាំងកម្ពុជាថា បានបាញ់ចំនួន១១គ្រាប់ នៅទីតាំងច្រកអន្តរជាតិអូរស្មាច់ ខេត្តឧត្តរមានជ័យ។

យោងតាមសេចក្តីប្រកាសព័ត៌មាន របស់លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ ការចុះផ្សាយរបស់សារព័ត៌មានថៃនៅថ្ងៃទី១៣ ខែឧសភា ឆ្នាំ២០២៦ គឺជាព័ត៌មានមិនពិត និងជាការមួលបង្កាច់យ៉ាងធ្ងន់ធ្ងរ។

សេចក្តីប្រកាសព័ត៌មាន បានបញ្ជាក់៖ «អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា សូមបដិសេធចោលទាំងស្រុង អំពីការលើកឡើងខាងលើនេះ និងសូមបញ្ជាក់ថាគឺជាព័ត៌មានមិនពិត និងជាការមួលបង្កាច់ធ្ងន់ធ្ងរ»។

កម្ពុជាបានបញ្ជាក់ម្តងហើយម្តងទៀត នូវការប្តេជ្ញាចិត្តរបស់ខ្លួនក្នុងការថែរក្សាសន្តិភាព និងស្ថិរភាព នៅតាមបណ្តោយព្រំដែនជាមួយប្រទេសថៃ ស្របតាមកិច្ចព្រមព្រៀងដែលមានស្រាប់ និងតាមរយៈយន្តការសហប្រតិបត្តិការដោយសន្តិវិធីរវាងប្រទេសទាំងពីរ៕
 

ដោយ នីកា