AKP ភ្នំពេញ ថ្ងៃទី១៣ ខែឧសភា ឆ្នាំ២០២៦--ក្នុងជំនួបពិភាក្សាទ្វេភាគីរវាងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និងឯកឧត្តម អែលឈិន អាមៀបាយ៉ូវ (Elchin Amirbayov) តំណាងប្រធានាធិបតីនៃសាធារណរដ្ឋអាស៊ែបៃហ្សង់ ទទួលបន្ទុកកិច្ចការពិសេស បានវាយតម្លៃខ្ពស់ចំពោះទំនាក់ទំនងកិច្ចសហប្រតិបត្តិការដ៏ល្អរវាងប្រទេសទាំងពីរ (កម្ពុជា-អាស៊ែបៃហ្សង់) ដែលមានតាំងពីយូរមកហើយថាបានឈរលើការជឿជាក់គ្នា ការគោរពគ្នា និងការយោគយល់គ្នាទៅវិញទៅមក ដើម្បីផលប្រយោជន៍ប្រទេសទាំងសងខាង និងផលប្រយោជន៍រួម។ នេះបើតាមអ្នកនាំពាក្យសម្តេចប្រធានរដ្ឋសភា។
ឯកឧត្តម កែវ ពិសិដ្ឋ នាយកខុន្ទកាល័យ និងជាអ្នកនាំពាក្យសម្តេចប្រធានរដ្ឋសភាបានឱ្យដឹងថានៅក្នុងជំនួបកម្ពុជា-អាស៊ែបៃហ្សង់ មានទស្សនៈ និងឆន្ទៈដូចគ្នាក្នុងការលើកកម្ពស់សន្តិសុខ ផ្តោតលើផលប្រយោជន៍របស់ប្រជាពលរដ្ឋ។

ការលើកឡើងនេះ បានធ្វើឡើងនៅក្នុងឱកាស សម្តេចប្រធានរដ្ឋសភា ទទួលជួបពិភាក្សាជាមួយ ឯកឧត្តម អែលឈិន អាមៀបាយ៉ូវ និងសហការី នាព្រឹកថ្ងៃទី១៣ ខែឧសភា ឆ្នាំ២០២៦ ក្នុងឱកាសដែលឯកឧត្តមបានដឹកនាំគណៈប្រតិភូមកបំពេញទស្សនកិច្ចការងារនៅកម្ពុជា។

សម្តេចរដ្ឋសភាធិបតី បានលើកឡើងថាវត្តមានរបស់ឯកឧត្តម តំណាងប្រធា នាធិបតីនៃសាធារណរដ្ឋអាស៊ែបៃហ្សង់ បានឆ្លុះបញ្ចាំងឱ្យឃើញពីការបន្តរឹតចំណងទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលបានកសាងឡើងតាំងពីឆ្នាំ១៩៩៥ ឱ្យកាន់តែរឹងមាំ និងស៊ីជម្រៅបន្ថែមទៀត។

សម្តេចប្រធានរដ្ឋសភា បានគូសបញ្ជាក់ថា សម្តេចធ្លាប់បានអញ្ជើញទៅចូលរួមកិច្ចប្រជុំនៅអាស៊ែបៃហ្សង់ និងតែងតែបានជួបពិភាក្សាការងារជាមួយលោកជំទាវ សាហ៊ីបា ហ្គារ៉ុវ៉ា (Sahiba Gafarova) ប្រធានរដ្ឋសភានៃសាធារណរដ្ឋអាស៊ែបៃហ្សង់ នៅក្នុងឱកាសចូលរួមវេទិកាអន្តរសភានានា។ សម្តេចបានសម្តែងការអបអរសាទរចំពោះការអភិវឌ្ឍរបស់អាស៊ែបៃហ្សង់។

សម្តេចបានគូសបញ្ជាក់បន្តថា ក្នុងរយៈ ពេលចុងក្រោយនេះ ទំនាក់ទំនង និងកិច្ចសហប្រតិបត្តិការទ្វេភាគីរបស់យើង បានវិវឌ្ឍន៍រីកចម្រើនគួរកត់សម្គាល់ តាមរយៈការផ្លាស់ប្តូរ និងការជួបប្រាស្រ័យទាក់ទងគ្នាជាបន្តបន្ទាប់រវាងថ្នាក់ដឹកនាំ និងមន្ត្រីជំនាញជាន់ខ្ពស់ ពិសេសក្រុមមិត្តភាពរដ្ឋសភាប្រទេសទាំងពីរ។ រដ្ឋសភាប្រទេសទំាងពីរបានចុះអនុស្សរណៈនៃការយោគយល់គ្នា (MoU) កាលពីឆ្នាំ២០២២ ក្នុងអំឡុងដំណើរទស្សនកិច្ចផ្លូវការរបស់ លោកជំទាវ ប្រធានរដ្ឋសភានៃសាធារណរដ្ឋអាស៊ែបៃហ្សង់ នៅកម្ពុជា។

បើតាមអ្នកនាំពាក្យសម្តេចប្រធានរដ្ឋសភាបានលើកឡើងថានៅក្នុងជំនួបឯកឧត្តម អែលឈិន អាមៀបាយ៉ូវ បានថ្លែងអំណរគុណសម្តេចប្រធានរដ្ឋសភា ដែលបានចំណាយពេលវេលាដ៏មានតម្លៃ និងមមាញឹកទទួលជួបពិភាក្សាការងារជាមួយគណៈប្រតិភូនាឱកាសនេះ។
ឯកឧត្តមបានឯកភាពចំពោះការលើកឡើងរបស់សម្តេចប្រធានរដ្ឋសភា និងបានអបអរសាទរចំពោះការអភិវឌ្ឍយ៉ាងឆាប់រហ័សរបស់កម្ពុជាលើគ្រប់វិស័យ។

ជាមួយគ្នានេះ ឯកឧត្តមបានជម្រាបជូនសម្តេចប្រធានរដ្ឋសភា អំពីលទ្ធផលជោគជ័យនៃជំនួបរវាងឯកឧត្តម និងសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា ក៏ដូចជាជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តមប្រធានគណៈប្រតិភូ បានគូសបញ្ជាក់ថា ជំនួបទាំងពីរនេះ បានផ្តល់នូវឱកាសថ្មីមួយទៀតសម្រាប់ប្រទេសទាំងពីរ ពង្រឹងកិច្ចសហប្រតិបត្តិការរួមគ្នាកាន់តែស៊ីជម្រៅ និងសកម្មឡើង លើផ្នែកពាណិជ្ជកម្ម សេដ្ឋកិច្ច ទេសចរណ៍ កសិកម្ម ជាដើម។ ឯកឧត្តម សង្ឃឹមថា សម្តេចនាយករដ្ឋមន្ត្រីនៃព្រះរាជាណាចក្រកម្ពុជា នឹងបំពេញទស្សនកិច្ចនៅប្រទេសអាស៊ែបៃហ្សង់ នៅខែតុលា ឆ្នាំ២០២៦នេះ។ ដំណើរទស្សនកិច្ចនេះ នឹងជាការបើកទំព័រថ្មីមួយទៀត ដែលនឹងលើកកម្ពស់កិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំបន្ថែមទៀត បន្ទាប់ពីដំណើរទស្សនកិច្ចរបស់សម្តេចតេជោ ហ៊ុន សែន នៅអាស៊ែបៃហ្សង់ កាលពីឆ្នាំ២០១៤ កន្លងទៅ។

សម្តេចប្រធានរដ្ឋសភា និងឯកឧត្តមតំណាងពិសេសរបស់ប្រធានាធិបតីនៃសាធារណរដ្ឋអាស៊ែបៃហ្សង់ ក៏បានផ្លាស់ប្តូរទស្សនៈជុំវិញការវិវត្តនៃសភាពការណ៍ពិភពលោកនាពេលបច្ចុប្បន្ន ក៏ដូចស្ថានភាពព្រំដែននៃប្រទេសជិតខាង និងការការពារអធិបតេយ្យជាតិ។ សម្តេចមហារដ្ឋសភាធិការធិបតី ឃួន សុដារី បានចែករំលែកព័ត៌មានជុំវិញករណីភាគីថៃដែលបានសម្រេចលុបចោលអនុស្សរណៈនៃការយោគយល់គ្នា (MOU 2001) ជាឯកតោភាគី។

សម្តេចបានបញ្ជាក់ច្បាស់ៗពីជំហររបស់រាជរដ្ឋាភិបាលកម្ពុជា ក្នុងការដោះស្រា យបញ្ហាប្រឈមទាំងនេះដោយសន្តិវិធី ផ្អែកលើច្បាប់អន្តរជាតិ សន្ធិសញ្ញានានា និងការតម្កល់ផលប្រយោជន៍ជាតិជាធំ។

ឯកឧត្តម អែលឈីន អាមៀរបាយ៉ូវ ក៏បានចែករំលែកនូវបទពិសោធន៍របស់អាស៊ែបៃហ្សង់ក្នុងការដោះស្រាយជម្លោះព្រំដែន និងការការពារបូរណភាពទឹកដីពីការឈ្លានពានរបស់ប្រទេសជិតខាងផងដែរ។ អាស៊ែបៃហ្សង់សម្រេចបានជោគជ័យតាមរយៈការកសាងផ្ទៃក្នុងជាតិឱ្យរឹងមាំ ទាំងផ្នែកសេដ្ឋកិច្ច និងយោធា ព្រមទាំងការប្រើប្រាស់រូបមន្ត "សន្តិភាពឈ្នះ-ឈ្នះ"

ដើម្បីបញ្ចប់សង្គ្រាមនៅប្រទេសរបស់លោក។
ឯកឧត្តមប្រធានគណៈប្រតិភូបានសម្តែងការអបអរសាទរចំពោះវឌ្ឍនភាពរបស់កម្ពុជា ដែលសម្រេចបាននាពេលកន្លងមក និងបានវាយតម្លៃខ្ពស់ថា កម្ពុជាកំពុងដើរលើមាគ៌ាដ៏ត្រឹមត្រូវ ហើយនឹងអាចសម្រេចបាននូវដំណោះស្រាយប្រកបដោយយុត្តិធម៌ និងទទួលបានសន្តិភាពពេញលេញឡើងវិញជាក់ជាមិនខាន។

សម្តេចប្រធានរដ្ឋសភា បានកោតសរសើ រចំពោះការប្តេជ្ញាចិត្តរបស់រដ្ឋាភិបាល និងប្រជាជនអាស៊ែបៃហ្សង់ ក្នុងការរួមចំណែ កលើកកម្ពស់ចលនាមិនចូលបក្សសម្ព័ន្ធ (NAM) ឱ្យចលនានេះមានភាពសកម្ម រស់រវើក និងកាន់តែសំខាន់ឡើង។
ចលនាមិនចូលបក្សសម្ព័ន្ធ គឺជាខែលសំខាន់មួយដើម្បីការពារប្រទេសតូចៗ ដូចជាកម្ពុជា និងអាស៊ែបៃហ្សង់ នៅក្នុងស្ថានការណ៍សណ្តាប់ធ្នាប់ពិភពលោក កំពុងប្រឈមហានិភ័យខ្ពស់ ហ៊ុមព័ទ្ធដោយសង្គ្រាមនោះ។ ចលនានេះ សំដៅធ្វើយ៉ាងណាស្តា និងលើកកម្ពស់សណ្តាប់ធ្នាប់ពិភពលោកឡើងវិញ ឱ្យមានសមធម៌ យុត្តិធម៌ និងបរិយាបន្ន ដោយផ្អែកលើច្បាប់អន្តរជាតិ។

ជាមួយគ្នានេះ សម្តេចប្រធានរដ្ឋសភាបានមានប្រសាសន៍ថា នៅចុងឆ្នាំ២០២៦នេះ សភាកម្ពុជា នឹងធ្វើជាម្ចាស់ផ្ទះសន្និសីទប្រធានសភាពិភព លោក (ISC) លើកទី២។

សម្តេចបានអញ្ជើញសភាប្រទេសអាស៊ែបៃហ្សង់ ចូលរួមសន្និសីទដ៏មានសារៈសំខាន់នេះ។ សម្តេចបានគូសបញ្ជាក់ថា យើងចាំបាច់ត្រូវពង្រឹងការងារការទូតសភា និងកិច្ចសហប្រតិបត្តិការសភា ឱ្យកាន់តែរឹងមាំ និងផ្តោតឆ្ពោះទៅអនាគត ដើម្បីសន្តិភាព កិច្ចសហប្រតិបត្តិការ និងការអភិវឌ្ឍ ទាំងក្នុងកម្រិតតំបន់ និងសកលលោក។

សម្តេចប្រធានរដ្ឋសភានិង ឯកឧត្តមប្រធានគណៈប្រតិភូបានយល់ស្របគ្នាថា ការទូតសភាមានសារៈសំខាន់ណាស់ ជាស្ពាន់តភ្ជាប់ទំនាក់ទំនងប្រជាជននិងប្រជាជន ឈានឆ្ពោះទៅការពង្រឹងវិស័យនានា ទំាងពាណិជ្ជកម្ម សេដ្ឋកិច្ច ទេសចរណ៍ ថាមពលនិងបច្ចេកវិទ្យាជាដើម៕

ដោយ៖ ប៊ុនរិទ្ធ