AKP ភ្នំពេញ ថ្ងៃទី១២ ខែឧសភា ឆ្នាំ២០២៦—ឯកឧត្តម សេរី ជំនះ រដ្ឋលេខាធិការក្រសួងអប់រំ យុវជន និងកីឡា បានថ្លែងថា ការងារស្ម័គ្រចិត្តមិនត្រូវចាត់ទុកថាជាការងារសម្រាប់មនុស្សដែលទំនេរគ្មានការងារធ្វើនោះឡើយ ប៉ុន្តែជារឿងរបស់មនុស្សដែលចេះចាត់ចែងពេលវេលាដ៏មានតម្លៃរបស់គេដើម្បីផ្ដល់ក្ដីស្រឡាញ់ដល់សហគមន៍ និងសង្គមជាតិ។ ចំណែកឯទឹកចិត្តអ្នកស្ម័គ្រចិត្ត គឺមិនអាចកាត់ថ្លៃបានឡើយ ហើយការលះបង់ពេលវេលា និងកម្លាំងកាយចិត្តដើម្បីសហគមន៍ គឺជាអំពើដ៏ឧត្តុង្គឧត្តមបំផុត។

ក្នុងឱកាសនៃការបើកវគ្គបណ្ដុះបណ្ដាលថ្នាក់ជាតិដល់យុវជនស្ម័គ្រចិត្តជាង ៧០០នាក់ នៃកម្មវិធី «ការស្ម័គ្រចិត្តដើម្បីសហគមន៍ខ្ញុំ ឆ្នាំ២០២៦» រយៈពេល ៣ថ្ងៃ ចាប់ពីថ្ងៃទី១១ ដល់ថ្ងៃទី១៣ ខែឧសភា ដែលរៀបចំឡើងដោយនាយកដ្ឋានអភិវឌ្ឍកម្មវិធីយុវជន នៃក្រសួងអប់រំ យុវជន និងកីឡា នៅមជ្ឈមណ្ឌលជាតិយុវជនកម្ពុជា ឯកឧត្តម សេរី ជំនះ បានគូសបញ្ជាក់ថា ការងារស្ម័គ្រចិត្ត គឺជាចលនាដ៏មានសារៈសំខាន់សម្រាប់ការអភិវឌ្ឍសង្គមជាតិ ដែលត្រូវបានមហាសន្និបាតនៃអង្គការសហប្រជាជាតិអនុម័តនៅឆ្នាំ១៩៨៥ ដោយកំណត់យកថ្ងៃទី០៥ ខែធ្នូ ដើម្បីប្រារព្ធទិវាអ្នកស្ម័គ្រចិត្តអន្តរជាតិជារៀងរាល់ឆ្នាំ ដែលគុណតម្លៃមហាសាលនៃការងារស្ម័គ្រចិត្ត គឺស្ថិតនៅត្រង់ការផ្ដល់ឱ្យដោយមិនរំពឹងផលតបស្នងជាប្រាក់កាស ប៉ុន្តែទទួលបានមកវិញនូវការផ្លាស់ប្ដូរជីវិតបុគ្គលស្ម័គ្រចិត្ត និងសង្គមឱ្យកាន់តែប្រសើរ ដែលរួមមាន ១.គុណតម្លៃចំពោះបុគ្គល៖ ជាសាលារៀនជីវិតដ៏អស្ចារ្យ ដែលជួយយុវជនឱ្យទទួលបានការអភិវឌ្ឍជំនាញសតវត្សរ៍ទី២១ ជំនាញទន់ ការយល់ដឹងពីតម្លៃខ្លួនឯង និងជួយដល់ការអប់រំសុខភាពផ្លូវចិត្ត និងផ្លូវកាយ។

២.គុណតម្លៃចំពោះសហគមន៍ និងសង្គមជាតិ៖ ជាស្ពានតភ្ជាប់ទំនាក់ទំនងក្នុងសង្គម ជួយបំពេញចន្លោះខ្វះខាតដែលរដ្ឋ ឬវិស័យឯកជនមិនទាន់ទៅដល់ និងជួយបង្កើនសាមគ្គីភាពដើម្បីគោលដៅរួមមួយ។ ៣.គុណតម្លៃចំពោះអាជីពការងារ៖ ជាដើមទុនដ៏សំខាន់សម្រាប់យុវជនក្នុងការកសាងបទពិសោធន៍ការងារ ស្មារតីធ្វើការងារជាក្រុម និងបណ្ដាញទំនាក់ទំនង។ ៤.គុណតម្លៃផ្នែកសីលធម៌ និងមនុស្សធម៌៖ មិនត្រឹមតែជួយអ្នកដទៃទេ តែជួយឱ្យយុវជនរកឃើញតម្លៃពិតនៃខ្លួនឯង ពង្រឹងភាពធន់ បណ្ដុះទឹកចិត្តមេត្តា និងកសាងវប្បធម៌ចែករំលែក។

សូមបញ្ជាក់ថា កម្មវិធីការស្ម័គ្រចិត្តដើម្បីសហគមន៍ខ្ញុំ ឬហៅកាត់ថា (ស.ស.ខ) ត្រូវបានបង្កើតឡើងតាំងពីឆ្នាំ២០១៩។ ចាប់តាំងពីឆ្នាំ២០២១ រហូតមកដល់ឆ្នាំ២០២៥ កម្មវិធីនេះបានពង្រីកការអនុវត្តនៅទូទាំង២៥ រាជធានី-ខេត្ត ដោយរយៈពេល ៧ឆ្នាំកន្លងមក កម្មវិធីបានបណ្ដុះបណ្ដាលយុវជនស្ម័គ្រចិត្តចំនួន ៣ ១៩០នាក់ និងបានអនុវត្តគម្រោងសហគមន៍ចំនួន ៥៣៨គម្រោង។ ក្នុងឆ្នាំ២០២៦នេះ កម្មវិធី ស.ស.ខ មានអ្នកស្ម័គ្រចិត្តបង្គោលរាជធានី-ខេត្តចំនួន ១១៥នាក់ និងយុវជនស្ម័គ្រចិត្តសរុបចំនួន ៦២៩ នាក់៕

ដោយ៖ ចាន់ សុភឿន (ប្រភព៖ ក្រសួងអប់រំ)